ಹೊಸ ನಿಯಮಕ್ಕೆ ಬೆದರಿದ ಟ್ವಿಟ್ಟರ್​.. ನ್ಯೂಯಾರ್ಕ್​, ಸ್ಯಾನ್ ಫ್ರಾನ್ಸಿಸ್ಕೋ ಕಚೇರಿಗಳಿಗೆ ಬೀಗ!

ಅಮೆರಿಕದ ಹೊಸ ನಿಯಮಕ್ಕೆ ಬೆದರಿದ ಟ್ವಿಟ್ಟರ್​ ತನ್ನ ನ್ಯೂಯಾರ್ಕ್​ ಮತ್ತು ಸ್ಯಾನ್ ಫ್ರಾನ್ಸಿಸ್ಕೋ ಕಚೇರಿಗಳಿಗೆ ಬೀಗ ಜಡಿಯಲು ಮುಂದಾಗಿದೆ.

ಸ್ಯಾನ್ ಫ್ರಾನ್ಸಿಸ್ಕೋ:ಯುಎಸ್ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಆ್ಯಂಡ್ ಪ್ರಿವೆನ್ಷನ್ (ಸಿಡಿಸಿ) ಹೊರಡಿಸಿದ ಹೊಸ ಮಾರ್ಗಸೂಚಿಯಿಂದಾಗಿ ಟ್ವಿಟರ್​ನ ನ್ಯೂಯಾರ್ಕ್ ಮತ್ತು ಸ್ಯಾನ್ ಫ್ರಾನ್ಸಿಸ್ಕೋದ ತನ್ನ ಕಚೇರಿಗಳನ್ನು ಮುಚ್ಚುವುದಾಗಿ ಪ್ರಕಟಿಸಿದೆ. ಟ್ವಿಟ್ಟರ್​ ಎರಡು ವಾರಗಳ ಹಿಂದೆ ಅಂದ್ರೆ ಜುಲೈ 12 ರಂದು ಮೈಕ್ರೋಬ್ಲಾಗಿಂಗ್ ಪ್ಲಾಟ್‌ಫಾರ್ಮ್ ಕಚೇರಿಗಳನ್ನು ಮತ್ತೆ ಪುನಾರಂಭಿಸಿತ್ತು.

ಟ್ವಿಟರ್ ನ್ಯೂಯಾರ್ಕ್ ಮತ್ತು ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿ ನಮ್ಮ ಕಚೇರಿಗಳನ್ನು ಮುಚ್ಚುವ ನಿರ್ಧಾರವನ್ನು ತೆಗೆದುಕೊಂಡಿದ್ದು, ಆದಷ್ಟು ಬೇಗ ಕಚೇರಿಗಳನ್ನು ಮುಚ್ಚಲಾಗುವುದು. ನಾವು ಸ್ಥಳೀಯ ಪರಿಸ್ಥಿತಿಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದೇವೆ. ನಮ್ಮ ಟ್ವೀಪ್ಸ್​ ಸುರಕ್ಷತೆಗೆ ಆದ್ಯತೆ ನೀಡುವ ಅಗತ್ಯ ಬದಲಾವಣೆಗಳನ್ನು ಮಾಡುತ್ತಿದ್ದೇವೆ ಎಂದು ಕಂಪನಿಯ ವಕ್ತಾರರು ಟೆಕ್​ಕ್ರಂಚ್​ ಬುಧವಾರ ತಿಳಿಸಿದ್ದಾರೆ.

ಲಸಿಕೆ ಹಾಕಿಸಿಕೊಂಡವರು ಇನ್ಮುಂದೆ ಮಾಸ್ಕ್​ ಧರಿಸುವಂತಿಲ್ಲ ಎಂದು ಸರ್ಕಾರ ಸೂಚಿಸಿತ್ತು. ಮೂರು ತಿಂಗಳ ನಂತರ ಡೆಲ್ಟಾ ಉಲ್ಬಣಗೊಳ್ಳುತ್ತಿದ್ದು, ಸರ್ಕಾರ ಮತ್ತೆ ಎಲ್ಲರಿಗೂ ಮಾಸ್ಕ್​ ಹಾಕಿಕೊಳ್ಳುವಂತೆ ಹೊಸ ನಿಯಮ ಜಾರಿಗೆ ತಂದಿದೆ.

ಇತರ ಟೆಕ್ ಕಂಪನಿಗಳು ಸಹ ಹೊಸ ಸಿಡಿಸಿ ಮಾರ್ಗಸೂಚಿಗಳ ಬಗ್ಗೆ ತಿಳಿದುಕೊಂಡಿವೆ. ಗೂಗಲ್ ಮತ್ತು ಆಲ್ಫಾಬೆಟ್ ಸಿಇಒ ಸುಂದರ್ ಪಿಚೈ ವರ್ಷದ ಕೊನೆಯಲ್ಲಿ ಕಚೇರಿಗೆ ಮರಳುವ ಸಾಧ್ಯತೆಯಿದೆ. ಇದಕ್ಕೂ ಮೊದಲು ಉದ್ಯೋಗಿಗಳಿಗೆ ಲಸಿಕೆ ಹಾಕುವ ಅಗತ್ಯವಿದೆ ಎಂದು ಅವರು ಹೇಳಿದ್ದಾರೆ.

ಗುರುವಾರದಿಂದ, ಆ್ಯಪಲ್ ತನ್ನ 270 ಕ್ಕೂ ಹೆಚ್ಚು ಯುಎಸ್ ರಿಟೈಲ್​ ಶಾಪ್​ಗಳ ಗ್ರಾಹಕರು ಮತ್ತು ಸಿಬ್ಬಂದಿಗೆ ಲಸಿಕೆ ಹಾಕಿದರೂ ಸಹ ಮಾಸ್ಕ್​ ಧರಿಸುವ ಅಗತ್ಯವಿರುತ್ತದೆ. ಫೇಸ್‌ಬುಕ್ ಮತ್ತು ಅಮೆಜಾನ್ ಸಹ ವ್ಯಾಕ್ಸಿನೇಷನ್ ಮತ್ತು ಮಾಸ್ಕ್​ ಧರಿಸುವುದರ ಬಗ್ಗೆ ದೃಢಪಡಿಸಿವೆ.