ವಾಷಿಂಗ್ಟನ್: ಕೋವಿಡ್-19ನಿಂದಾಗಿ ಹಿಂದೆಂದೂ ಕಂಡರಿಯದ ಬಿಕ್ಕಟ್ಟಿಗೆ ಸಿಲುಕಿರುವ ಅಮೆರಿಕದ ಆರ್ಥಿಕ ಪರಿಸ್ಥಿತಿಯನ್ನು ಮತ್ತೆ ಹಳಿಗೆ ತರಲು 2.2 ಟ್ರಿಲಿಯನ್ ಡಾಲರ್ ಆರ್ಥಿಕ ಉತ್ತೇಜನ ಪ್ಯಾಕೇಜ್ಗೆ ಅಧ್ಯಕ್ಷ ಟ್ರಂಪ್ ಸಹಿ ಹಾಕಿದ್ದಾರೆ.
ದೇಶದ ಉದ್ಯಮ ವಲಯದ ಹಿತ ಕಾಪಾಡಲು, ವೈದ್ಯಕೀಯ ಸೇವೆಗಳ ಬಲವರ್ಧನೆಗೆ ಹಾಗೂ ಕೊರೊನಾದಿಂದ ಸಂಕಷ್ಟಕ್ಕೊಳಗಾದ ಕುಟುಂಬಗಳಿಗೆ ಸಹಾಯ ಮಾಡಲು ಈ ಪ್ಯಾಕೇಜ್ ನೀಡಲಾಗಿದೆ. ಪ್ಯಾಕೇಜ್ ಜಾರಿಗೆ ಅಮೆರಿಕ ಸಂಸತ್ ಬಹುತೇಕ ಸರ್ವಾನುಮತದ ಅನುಮೋದನೆ ನೀಡಿತ್ತು.
ಕೊರೊನಾ ವೈರಸ್ ತಡೆಯಲು ದೇಶಾದ್ಯಂತ ಘೋಷಿಸಲಾದ ಲಾಕ್ಡೌನ್ನಿಂದಾಗಿ ಅಮೆರಿಕದ ಅರ್ಥ ವ್ಯವಸ್ಥೆ ಹಿಂಜರಿತ ಕಾಣುತ್ತಿದೆ. ಉದ್ಯಮಗಳು, ಶಾಲಾ-ಕಾಲೇಜುಗಳು ಮುಚ್ಚಿದ್ದರಿಂದ ಬಹುತೇಕ ಅಮೆರಿಕ ಸ್ತಬ್ಧವಾಗಿದೆ.
'ಈ ಪ್ಯಾಕೇಜ್ನಿಂದ ತುರ್ತಾಗಿ ಅಗತ್ಯವಿರುವ ಸಹಾಯ ಸಿಗಲಿದೆ' ಎಂದು ಸಹಿ ಹಾಕಿದ ನಂತರ ಓವಲ್ ಕಚೇರಿಯಲ್ಲಿ ಟ್ರಂಪ್ ಹೇಳಿದರು. ಪ್ಯಾಕೇಜ್ ಬಿಲ್ಗೆ ಅನುಮೋದನೆ ನೀಡಿದ್ದಕ್ಕಾಗಿ ಎರಡೂ ಪಕ್ಷಗಳ ಸದಸ್ಯರನ್ನು ಟ್ರಂಪ್ ಇದೇ ಸಂದರ್ಭದಲ್ಲಿ ಅಭಿನಂದಿಸಿದರು.
2.2 ಟ್ರಿಲಿಯನ್ ಡಾಲರ್ ಮೊತ್ತದ ಈ ಪ್ಯಾಕೇಜ್ ಜಾರಿಯಿಂದ ಅನೇಕ ಅಮೆರಿಕನ್ನರಿಗೆ ಸರ್ಕಾರದಿಂದ 1,200 ಡಾಲರ್ ವರ್ಗಾಯಿಸುವ ಪ್ರಕ್ರಿಯೆ ಸುಲಭವಾಗಲಿದೆ. ಕೆಲಸ ಕಳೆದುಕೊಂಡವರಿಗೆ ಹಣಕಾಸು ಸಹಾಯ ಸಿಗಲಿದೆ. ಅಲ್ಲದೆ ಚಿಕ್ಕ ಹಾಗೂ ದೊಡ್ಡ ಉದ್ಯಮಗಳಿಗೆ ಹೊಸ ಸಾಲ ಹಾಗೂ ತೆರಿಗೆ ವಿನಾಯಿತಿ ಸೌಲಭ್ಯ ದೊರಕಲಿವೆ.