ಚುನಾವಣೆ ಗೆಲ್ಲಲು ಟ್ರಂಪ್​ ತಂತ್ರ: ಅಪರಾಧ ಕೃತ್ಯ ತಡೆಗೆ ಕಠಿಣ ಕ್ರಮ

ಹೆಚ್ಚು ಹಿಂಸಾಚಾರ ನಡೆಯುತ್ತಿರುವ ಚಿಕಾಗೋ - ನ್ಯೂ ಮೆಕ್ಸಿಕೋದ ಅಲ್ಬುಕರ್ಕ್​ಗೆ ಹೆಚ್ಚಿನ ಭದ್ರತೆ ಒದಗಿಸಲು ಫೆಡರಲ್ ಏಜೆಂಟರನ್ನು ಕಳುಹಿಸುವುದಾಗಿ ಟ್ರಂಪ್​ ಘೋಷಿಸಿದ್ದಾರೆ.

ವಾಷಿಂಗ್ಟನ್:ಅಮೆರಿಕದಲ್ಲಿ ಹೆಚ್ಚುತ್ತಿರುವ ಅಪರಾಧ ಕೃತ್ಯಗಳನ್ನ ಎದುರಿಸಲು ಕಠಿಣ ಕ್ರಮ ಕೈಗೊಳ್ಳಲು ಟ್ರಂಪ್​ ನಿರ್ಧರಿಸಿದ್ದಾರೆ. ಹೆಚ್ಚು ಹಿಂಸಾಚಾರ ನಡೆಯುತ್ತಿರುವ ಚಿಕಾಗೋ - ನ್ಯೂ ಮೆಕ್ಸಿಕೋದ ಅಲ್ಬುಕರ್ಕ್​ಗೆ ಹೆಚ್ಚಿನ ಭದ್ರತೆ ಒದಗಿಸಲು ಫೆಡರಲ್ ಏಜೆಂಟರನ್ನು ಕಳುಹಿಸುವುದಾಗಿ ಟ್ರಂಪ್​ ಬುಧವಾರ ಘೋಷಣೆ ಮಾಡಿದ್ದಾರೆ.

ಮುಂಬರುವ ಅಧ್ಯಕ್ಷೀಯ ಚುನಾವಣೆ ಹಿನ್ನೆಲೆಯಲ್ಲಿ ಟ್ರಂಪ್​ ಅವರ ಈ ನಿರ್ಧಾರ ಭಾರಿ ಕುತೂಹಲ ಕೆರಳುವಂತೆ ಮಾಡಿದೆ. ಹೆಚ್ಚುತ್ತಿರುವ ಹಿಂಸಾಚಾರದ ಹಿನ್ನೆಲೆ ಸ್ಥಳೀಯ ಆಡಳಿತದಲ್ಲಿ ಫೆಡರಲ್​​​​​​​ ಎಜೆನ್ಸಿ ಹಸ್ತಕ್ಷೇಪ ಮಾಡಲಿದ್ದು, ಕಾನೂನು ಸುವ್ಯವಸ್ಥೆ ಕಾಪಾಡಲು ಇದು ಅನಿವಾರ್ಯ ಎಂದು ಡೊನಾಲ್ಡ್​ ಟ್ರಂಪ್​ ತಮ್ಮ ಕ್ರಮ ಸಮರ್ಥಿಸಿಕೊಂಡಿದ್ದಾರೆ.

ಡೆಮಾಕ್ರಟಿಕ್ಸ್​ ಆಡಳಿತದಲ್ಲಿರುವ ರಾಜ್ಯಗಳಲ್ಲಿ ಕಾನೂನು ಸುವ್ಯವಸ್ಥೆ ಹದ ಗೆಟ್ಟಿದೆ ಎಂದು ಆರೋಪಿಸಿರುವ ಟ್ರಂಪ್​ ಹಿಂಸಾಚಾರಕ್ಕೆ ಡೆಮಾಕ್ರಟಿಕ್​​​​ಗಳ ಆಡಳಿತ ವೈಫಲ್ಯವೇ ಕಾರಣ ಎಂದು ಹರಿಹಾಯ್ದಿದ್ದಾರೆ. ಕಾನೂನು ತಜ್ಞರ ಸಲಹೆಯಂತೆ ಕೆಲ ಭಾಗಗಳಲ್ಲಿ ಫೆಡರಲ್​ ಎಜೆನ್ಸಿಯನ್ನ ನಿಯೋಜಿಸಲಾಗಿದೆ ಎಂದು ಹೇಳಿದ್ದಾರೆ.

ದೇಶದಲ್ಲಿ ಪೊಲೀಸ್​ ವ್ಯವಸ್ಥೆಯನ್ನ ಹಾಳು ಮಾಡಲು ಅಮೂಲಾಗ್ರ ಆಂದೋಲನ ನಡೆಸಿದೆ ಎಂದು ಇತ್ತೀಚಿಗಷ್ಟೇ ಟ್ರಂಪ್​ ಆರೋಪಿಸಿದ್ದರು. ರಾಷ್ಟ್ರದ ವಿವಿಧ ಭಾಗಗಳಲ್ಲಿ ಹೆಚ್ಚುತ್ತಿರುವ ಗುಂಡಿನ ದಾಳಿ, ಹತ್ಯೆ, ಕೊಲೆ ಮತ್ತು ಹಿಂಸಾಚಾರದ ಭೀಕರ ಅಪರಾಧಗಳ ಹೆಚ್ಚಳ ಆಘಾತಕಾರಿ ಎಂದು ಕಳವಳ ವ್ಯಕ್ತಪಡಿಸಿದ್ದರು.