ಬಿನ್​ ಲಾಡೆನ್​ ಪುತ್ರ ಹಂಝ ಬಿನ್​ ಲಾಡೆನ್​ ಹತ್ಯೆ ಖಚಿತಪಡಿಸಿದ ಟ್ರಂಪ್​

ಅಫ್ಘಾನಿಸ್ತಾನ-ಪಾಕಿಸ್ತಾನ ನಡುವಣ ಗಡಿಯಲ್ಲಿ, ಅಮೆರಿಕಾದ ಭಯೋತ್ಪಾದನೆ ನಿಗ್ರಹ ಕಾರ್ಯಾಚರಣೆಯಲ್ಲಿ ಹಂಝ ಬಿನ್​ ಲ್ಯಾಡೆನ್ ಸಾವನ್ನಪ್ಪಿದ್ದಾನೆ ಎಂದು ಟ್ರಂಪ್​ ಖಚಿತಪಡಿಸಿದ್ದಾರೆ.

ವಾಷಿಂಗ್​ಟನ್​​: ಒಸಾಮಾ ಬಿನ್​ ಲಾಡೆನ್​ ಪುತ್ರ, ಈತನ ನಂತರದ ಅಲ್​-ಖೈದಾ ಉಗ್ರ ಸಂಘಟನೆಯ ಉತ್ತರಾಧಿಕಾರಿ ಹಂಝ ಬಿನ್​ ಲ್ಯಾಡೆನ್​ ಹತ್ಯೆಯನ್ನು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಖಚಿತಪಡಿಸಿದ್ದಾರೆ.

ಅಫ್ಘಾನಿಸ್ತಾನ ಮತ್ತು ಪಾಕಿಸ್ತಾನ ನಡುವಣ ಗಡಿ ಪ್ರದೇಶದಲ್ಲಿ ಅಮೆರಿಕಾ ಭಯೋತ್ಪಾದನಾ ನಿಗ್ರಹದಳ ನಡೆಸಿದ ಕಾರ್ಯಾಚರಣೆಯಲ್ಲಿ ಹಂಝ ಬಿನ್​ ಲ್ಯಾಡೆನ್ ಕೊಲ್ಲಲ್ಪಟ್ಟಿದ್ದಾನೆ ಎಂದು ಟ್ರಂಪ್ ಶ್ವೇತಭವನದಿಂದ ಬಿಡುಗಡೆ ಮಾಡಲಾದ ಸಂಕ್ಷಿಪ್ತ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಅಮೆರಿಕಾ ಮಾಧ್ಯಮಗಳು ಕಳೆದ ಆಗಸ್ಟ್​ ತಿಂಗಳ ಆರಂಭದಲ್ಲೇ ಹಂಝ ಬಿನ್​ ಲ್ಯಾಡೆನ್​ನನ್ನು ಹತ್ಯೆ ಮಾಡಲಾಗಿದೆ ಎಂದು ವರದಿ ಬಿತ್ತರಿಸಿದ್ದವು. ಆದರೆ ಈ ಬಗ್ಗೆ ಟ್ರಂಪ್​ ಹಾಗೂ ಅಮೆರಿಕಾದ ಉನ್ನತ ಅಧಿಕಾರಿಗಳು ಯಾವುದೇ ಹೇಳಿಕೆ ನೀಡಿರಲಿಲ್ಲ.

ಹಂಝ ಬಿನ್​ ಲ್ಯಾಡೆನ್, ಒಸಾಮ ಬಿನ್​ ಲ್ಯಾಡೆನ್​ನ 20 ಮಕ್ಕಳಲ್ಲಿ 15ನೆಯವ. ಅಲ್ಲದೆ ಈತ ಒಸಾಮ ಬಿನ್​ ಲ್ಯಾಡೆನ್​ನ ಮೂರನೇ ಪತ್ನಿಯ ಮಗ. ಅಂದಾಜು ಈತನಿಗೆ 30 ವರ್ಷ ವಯಸ್ಸಾಗಿತ್ತು.