ಚಾಕುವಿನಿಂದ ಇರಿದು ಮೂವರನ್ನು ಕೊಂದ ದುಷ್ಕರ್ಮಿ: ಫ್ರಾನ್ಸ್​ನಲ್ಲಿ ಶುರುವಾಯ್ತಾ ಉಗ್ರರ ಹಾವಳಿ?

ಮುಸ್ಲಿಂ ರಾಷ್ಟ್ರಗಳೊಂದಿಗೆ ದ್ವೇಷಮಯ ವಾತಾವರಣ ನಿರ್ಮಾಣವಾಗಿರುವ ಬೆನ್ನಲ್ಲೇ ಫ್ರಾನ್ಸ್​ನಲ್ಲಿ ವ್ಯಕ್ತಿವೋರ್ವ ಚಾಕುವಿನಿಂದ ಹಲ್ಲೆ ನಡೆಸಿದ ಪರಿಣಾಮ ಮೂವರು ಸಾವನ್ನಪ್ಪಿದ್ದಾರೆ.

ಪ್ಯಾರೀಸ್ (ಫ್ರಾನ್ಸ್):ವ್ಯಕ್ತಿವೋರ್ವ ಚಾಕುವಿನಿಂದ ಹಲ್ಲೆ ನಡೆಸಿ, ಮೂವರನ್ನು ಕೊಂದು, ಹಲವರನ್ನು ಗಾಯಗೊಳಿಸಿರುವ ಘಟನೆ ಫ್ರಾನ್ಸ್​ನ ಮೆಡಿಟರೇನಿಯನ್ ನಗರದಲ್ಲಿರುವ ಚರ್ಚ್​​ ಬಳಿ ನಡೆದಿದೆ. ದಾಳಿ ನಡೆಸಿರುವುದಕ್ಕೆ ನಿಖರ ಕಾರಣ ಇನ್ನೂ ತಿಳಿದು ಬಂದಿಲ್ಲ.

ದಾಳಿ ನಡೆಸಿದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ್ದು, ಆತನಿಗೂ ಗಾಯಗಳಾಗಿವೆ. ಸದ್ಯಕ್ಕೆ ಸಮೀಪದ ಆಸ್ಪತ್ರೆಯಲ್ಲಿ ಆತನಿಗೆ ಹಾಗೂ ಹಲ್ಲೆಗೊಳಗಾದವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಈ ದಾಳಿಯಿಂದಾಗಿ ಫ್ರಾನ್ಸ್​​ನಲ್ಲಿ ಭಯೋತ್ಪಾದಕರ ಭೀತಿ ಹೆಚ್ಚಾಗಿದ್ದು, ಪೊಲೀಸರು ನಗರದಲ್ಲಿ ಹೈ ಅಲರ್ಟ್​ ಘೋಷಿಸಿದ್ದಾರೆ.

ಇಂದು ಫ್ರಾನ್ಸ್​​ನ ಲೋಕಸಭೆಯಲ್ಲಿ ಕೊರೊನಾ ವೈರಸ್​ ಮಾರ್ಗಸೂಚಿಗಳ ಬಗ್ಗೆ ಚರ್ಚೆ ನಡೆಸಲಾಗುತ್ತಿತ್ತು. ಈ ವೇಳೆ, ಹಲ್ಲೆಯಲ್ಲಿ ಮೃತಪಟ್ಟವರಿಗೂ ಕೆಲ ನಿಮಿಷಗಳ ಕಾಲ ಮೌನಾಚರಣೆ ಮಾಡುವ ಮೂಲಕ ಸಂತಾಪ ಸೂಚಿಸಲಾಯಿತು. ಮೇಯರ್ ಈ ಬಗ್ಗೆ ಟ್ವಿಟರ್​ನಲ್ಲಿ ಸ್ಪಷ್ಟನೆ ನೀಡಿದ್ದಾರೆ.

ಪ್ರವಾದಿ ಮಹಮದ್​ರ ಬಗ್ಗೆ ವ್ಯಂಗ್ಯ ಚಿತ್ರ ಪ್ರದರ್ಶಿಸಿ, ಪಾಠ ಮಾಡಿದ ಶಿಕ್ಷಕನ ಶಿರಚ್ಛೇದನದ ನಂತರ ಇಸ್ಲಾಂ ರಾಷ್ಟ್ರಗಳು ಹಾಗೂ ಫ್ರಾನ್ಸ್​ ನಡುವೆ ದ್ವೇಷಮಯ ವಾತಾವರಣ ನಿರ್ಮಾಣವಾಗಿದ್ದೇ ಈ ಘಟನೆಗೆ ಕಾರಣ ಎಂದು ಹೇಳಲಾಗುತ್ತಿದೆ.