ಆಫ್ಘನ್​​​​ ಮಣ್ಣನ್ನು ಭಯೋತ್ಪಾದನೆಗೆ ಬಳಸದಂತೆ ಬದ್ಧತೆ ತೋರಿಸಿ: ತಾಲಿಬಾನ್​ಗೆ ಭಾರತ ಸಲಹೆ

ಆಫ್ಘನ್​ ಮಣ್ಣನ್ನು ಭಯೋತ್ಪಾದನೆಗೆ ಬಳಸದಂತೆ ತಾಲಿಬಾನ್​, ಬದ್ಧತೆ ತೋರಿಸಬೇಕೆಂದು ಸಚಿವ ಎಸ್ ಜೈಶಂಕರ್ ಹೇಳಿದ್ದಾರೆ.

ನ್ಯೂಯಾರ್ಕ್ (ಅಮೆರಿಕ):ತಾಲಿಬಾನ್​, ಆಫ್ಘನ್​ ಮಣ್ಣನ್ನು ಭಯೋತ್ಪಾದನೆಗೆ ಬಳಸದಂತೆ ಬದ್ಧತೆ ತೋರಿಸಬೇಕಿದ್ದು, ಅಂತಹ ವಾತಾವರಣ ಸಹ ಸೃಷ್ಟಿಯಾಗಬೇಕು ಎಂದು ಭಾರತ ಪ್ರತಿಪಾದಿಸಿದೆ.

ಜಿ -20 ವಿದೇಶಾಂಗ ಮಂತ್ರಿಗಳ ಸಭೆಯನ್ನುದ್ದೇಶಿಸಿ ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್ ಜೈಶಂಕರ್ ಮಾತನಾಡಿದರು. ಆಫ್ಘನ್​​ ​ಅನ್ನು ಯಾವುದೇ ದೇಶಗಳ ವಿರುದ್ಧವಾಗಿ ಬಳಸುವುದಿಲ್ಲ ಎಂದು ತಾಲಿಬಾನ್ ಹೇಳಿದೆ. ತಾಲಿಬಾನ್​ ಈ ಹೇಳಿಕೆಯನ್ನು ಕಾರ್ಯಗತಗೊಳಿಸಬೇಕು. ಆಫ್ಘನ್​ ಸಮಾಜದ ಎಲ್ಲಾ ವರ್ಗಗಳ ಪ್ರತಿನಿಧಿಯನ್ನು ಒಳಗೊಂಡ ವಿಶಾಲ ಅಂತರ್ಗತ ಪ್ರಕ್ರಿಯೆಯನ್ನು ಜಗತ್ತು ನಿರೀಕ್ಷಿಸುತ್ತದೆ ಎಂದು ಜೈ ಶಂಕರ್ ಹೇಳಿದ್ದಾರೆ.

ಜಾಗತಿಕ ಭಾವನೆ ಪ್ರತಿಬಿಂಬಿಸುವ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ರೆಸಲ್ಯೂಷನ್ 2593​ ನಮ್ಮ ವಿಧಾನಕ್ಕೆ ಮಾರ್ಗದರ್ಶನ ನೀಡುವುದನ್ನು ಮುಂದುವರಿಸಬೇಕು. ಭಾರತವು ಆಫ್ಘನ್​ನೊಂದಿಗಿನ ಐತಿಹಾಸಿಕ ಸ್ನೇಹದಿಂದಲೇ ವ್ಯವಹಾರ ಮುಂದುವರಿಸುತ್ತದೆ ಎಂದು ಜೈ ಶಂಕರ್ ಟ್ವೀಟ್ ಮಾಡಿದ್ದಾರೆ.

ಆಗಸ್ಟ್ 15 ರಂದು ಅಫ್ಘಾನಿಸ್ತಾನವನ್ನು ತಾಲಿಬಾನ್ ವಶಪಡಿಸಿಕೊಂಡಿದ್ದರಿಂದ ಅಲ್ಲಿನ ಚುನಾಯಿತ ಸರ್ಕಾರ ಪತನಗೊಂಡಿತು. ಇತ್ತೀಚೆಗಷ್ಟೇ ಅಲ್ಲಿ ತಾಲಿಬಾನ್​ ನೇತೃತ್ವದ ಸರ್ಕಾರ ರಚನೆಯಾಯಿತು.