ಭಾರತದ ಸಾಧನೆ ಎ-ಸ್ಯಾಟ್​ಗೆ ದೊಡಣ್ಣನ ಅಪಸ್ವರ: ಬಾಹ್ಯಾಕಾಶ ಹಾಳು ಮಾಡದಂತೆ ನೀತಿಪಾಠ

ಬಾಹ್ಯಾಕಾಶದ ವ್ಯವಸ್ಥೆ ಕಾರಣ ಹೇಳಿ ಭಾರತದ ಆ್ಯಂಟಿ ಸ್ಯಾಟಲೈಟ್​ ಮಿಸೈಲ್​ ಉಡಾವಣೆಯನ್ನ ಅಮೆರಿಕ ಟೀಕಿಸಿದೆ

ಮಿಯಾಮಿ:ಭಾರತ ನಿನ್ನೆ ಆ್ಯಂಟಿ ಸ್ಯಾಟಲೈಟ್​ ಮಿಸೈಲ್​ ಉಡಾವಣೆ ಮಾಡಿದ್ದರ ಕುರಿತು ವಿಶ್ವದ ದೊಡ್ಡಣ್ಣ ಅಮೆರಿಕ ಅಪಸ್ವರ ಎತ್ತಿದೆ. ಇದರಿಂದ ಬಾಹ್ಯಾಕಾಶದಲ್ಲಿ ಅವ್ಯವಸ್ಥೆ ಸೃಷ್ಟಿಯಾಗಲಿದೆ ಎಂದು ಆರೋಪಿಸಿದೆ.

ಅಮೆರಿಕಾದ ರಕ್ಷಣಾ ಕಾರ್ಯದರ್ಶಿ ಪ್ಯಾಟ್ರಿಕ್​​ ಶನಹಾನ್​, ಭಾರತ ತನಗಾಗಿ ಉಡಾವಣೆ ಮಾಡಿದ ಈ ಸ್ಯಾಟಲೈಟ್​ನಿಂದಾದ ಪರಿಣಾಮಗಳ ಬಗ್ಗೆ ನಾವು ಅಧ್ಯಯನ ಮಾಡುತ್ತಿದ್ದೇವೆ. ಬಾಹ್ಯಾಕಾಶದಲ್ಲಿ ಸ್ಯಾಟಲೈಟ್​ನ ಅವಶೇಷಗಳು ಉಳಿಯುವುದರಿಂದ ಅಲ್ಲಿನ ವ್ಯವಸ್ಥೆ ಏರುಪೇರಾಗುತ್ತದೆ ಎಂದು ಹೇಳಿದ್ದಾರೆ.

ನಾವೆಲ್ಲರೂ ಬಾಹ್ಯಾಕಾಶದಲ್ಲಿ ಅವ್ಯವಸ್ಥೆ ಉಂಟಾಗದಂತೆ ನೋಡಿಕೊಳ್ಳಬೇಕು. ಎಲ್ಲರ ಕಾರ್ಯಗಳಿಗೂ ಬಾಹ್ಯಾಕಾಶ ಮುಕ್ತವಾಗಿರಬೇಕು ಎಂದಿದ್ದಾರೆ.

ಸ್ಯಾಟಲೈಟ್​ನ ಅವಶೇಷಗಳು ವಾರದೊಳಗೆ ನಾಶಗೊಂಡು, ಭೂಮಿ ಮೇಲೆ ಬೀಳುತ್ತವೆ. ಈಗಾಗಲೆ ಸ್ಯಾಟಲೈಟ್​ ಪ್ರಯೋಗದಿಂದ 250 ಅವಶೇಷಗಳ ತುಣುಕುಗಳು ಭೂಮಿಗೆ ಬಿದ್ದಿರುವ ಬಗ್ಗೆ ಮಿಲಿಟರಿ ಸ್ಟ್ರಾಟೆಜಿಕ್​ ಕಮ್ಯಾಂಡ್​ ಪತ್ತೆ ಮಾಡಿದೆ ಎಂದು ಪೆಂಟಗಾನ್​ ವಕ್ತಾರ ಲೆಫ್ಟಿನೆಂಟ್​ ಕರ್ನಲ್​ ದಾವೆ ಈಸ್ಟ್​ಬರ್ನ್​ ಹೇಳಿದ್ದಾರೆ. ಬಾಹ್ಯಾಕಾಶವನ್ನು ಹಾಳು ಮಾಡಿದರೆ, ಮತ್ತೆ ಪಡೆಯಲಾಗದು ಎಂದು ಭಾರತದ ಹೆಸರು ಉಲ್ಲೇಖಿಸದೆ ಅವರು ಟೀಕಿಸಿದ್ದಾರೆ.

ಆದರೆ 1959ರಲ್ಲಿಯೇ ಇಂತಹುದೊಂದು ಸ್ಯಾಟಲೈಟ್​ ಉಡಾವಣೆ ಮಾಡಿರುವ ಅಮೆರಿಕ, ಭಾರತದ ಕಾರ್ಯಕ್ಕೆ ಮಾತ್ರ ಟೀಕೆ ವ್ಯಕ್ತಪಡಿಸುತ್ತಿದೆ.