ಡ್ರಗ್​​​​​ಗ್ಯಾಂಗ್​ನಿಂದ ಪೊಲೀಸ್​​ ಬೆಂಗಾವಲು ಪಡೆ ಮೇಲೆ ಗುಂಡಿನ ದಾಳಿ: 13 ಪೊಲೀಸರ ಹತ್ಯೆ

ಕಾರ್ಟೆಲ್ ಬಂದೂಕುಧಾರಿಗಳು 2019ರಲ್ಲಿ 14 ರಾಜ್ಯ ಪೊಲೀಸ್ ಅಧಿಕಾರಿಗಳನ್ನು ಮೆಕ್ಸಿಕೊದಲ್ಲಿ ಹೊಂಚು ಹಾಕಿ ಕೊಂದಿರುವ ಘಟನೆ ನಡೆದಿತ್ತು. ಅದಾದ ಬಳಿಕ ಈಗ ಇಂತಹುದೇ ಮತ್ತೊಂದು ಹತ್ಯಾಕಾಂಡ ಮೆಕ್ಸಿಕೋದಲ್ಲಿ ಇಂದು ನಡೆದಿದೆ.

ಮೆಕ್ಸಿಕೋ ಸಿಟಿ: ಡ್ರಗ್ ಗ್ಯಾಂಗ್​​ವೊಂದರ ಬಂದೂಕುಧಾರಿಗಳು ಸೆಂಟ್ರಲ್​ ಮೆಕ್ಸಿಕೊದ ಪೊಲೀಸ್ ಬೆಂಗಾವಲು ಪಡೆ ಮೇಲೆ ಹೊಂಚು ಹಾಕಿ ಗುಂಡಿನ ಮಳೆಗೆರೆದಿದೆ. ಈ ದಾಳಿಯಲ್ಲಿ 8 ಪೊಲೀಸ್ ಅಧಿಕಾರಿಗಳು ಮತ್ತು ಐವರು ಪ್ರಾಸಿಕ್ಯೂಷನ್ ತನಿಖಾಧಿಕಾರಿಗಳು ಸೇರಿ ಒಟ್ಟು 13 ಮಂದಿ ಮೃತಪಟ್ಟಿದ್ದಾರೆ.

ಮೆಕ್ಸಿಕೊದಲ್ಲಿ ನಡೆದ ಈ ಹತ್ಯಾಕಾಂಡ 2019 ರ ನಂತರ ನಡೆದ ಅತಿದೊಡ್ಡ ದುಷ್ಕೃತ್ಯ ಇದಾಗಿದೆ. 2019 ಅಕ್ಟೋಬರ್​ನಲ್ಲಿ ಕಾರ್ಟೆಲ್ ಬಂದೂಕುಧಾರಿಗಳು 14 ಪೊಲೀಸ್ ಅಧಿಕಾರಿಗಳನ್ನು ಹೊಂಚು ಹಾಕಿ ಕೊಂದು ಹಾಕಿದ್ದರು. ಮೆಕ್ಸಿಕೊ ನಗರದ ನೈರುತ್ಯ ದಿಕ್ಕಿನಲ್ಲಿರುವ ಗ್ರಾಮೀಣ ಭಾಗದಲ್ಲಿ ಪೊಲೀಸರನ್ನು ಕೊಂದು ಹಾಕಿದ ಡ್ರಗ್ಸ್​ ಗ್ಯಾಂಗ್​ಗಾಗಿ ಪೊಲೀಸರು ತೀವ್ರ ಹುಡುಕಾಟ ನಡೆಸಿದ್ದಾರೆ.

ಇಂತಹ ಅತಿದೊಡ್ಡ ಹತ್ಯಾಕಾಂಡದ ಹಿನ್ನೆಲೆಯಲ್ಲಿ ಅಲ್ಲಿನ ಸರ್ಕಾರ ದುಷ್ಕರ್ಮಿಗಳ ಬಂಧನಕ್ಕಾಗಿ ಬಲೆ ಬೀಸಿದೆ. ಸೈನಿಕರು, ನೌಕಾಪಡೆ ಮತ್ತು ರಾಷ್ಟ್ರೀಯ ಗಾರ್ಡ್ ಪಡೆಗಳು ದುಷ್ಕರ್ಮಿಗಳ ಹೆಡೆಮುರಿ ಕಟ್ಟಲು ಸನ್ನದ್ಧರಾಗಿದ್ದಾರೆ ಎಂದು ಅಲ್ಲಿನ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.