ಭಾರತದ ಕೊರೊನಾ ಸಮರಕ್ಕೆ ಗೂಗಲ್ ಸಾಥ್: 135 ಕೋಟಿ ರೂ. ನೆರವು ಘೋಷಿಸಿದ ಪಿಚೈ

ಭಾರತದಲ್ಲಿ ವೈದ್ಯಕೀಯ ಸರಬರಾಜು ಮತ್ತು ತುರ್ತು ಪರಿಸ್ಥಿತಿಯ ಬೆಂಬಲಕ್ಕಾಗಿ 135 ಕೋಟಿ ರೂ. ಆರ್ಥಿಕ ನೆರವನ್ನು ಗೂಗಲ್ ಸಿಇಒ ಸುಂದರ್​ ಪಿಚೈ ಘೋಷಿಸಿದ್ದಾರೆ.

ಕ್ಯಾಲಿಫೋರ್ನಿಯಾ: ಭಾರತದಲ್ಲಿ ಕೊರೊನಾ ಎರಡನೇ ಅಲೆ ಉಲ್ಬಣದಿಂದಾಗಿ ಪ್ರತಿನಿತ್ಯ ಮೂರು ಲಕ್ಷಗಳ ಕೇಸ್​ಗಳು ಹಾಗೂ ಎರಡು ಸಾವಿರಕ್ಕೂ ಅಧಿಕ ಸಾವು ವರದಿಯಾಗುತ್ತಿವೆ. ಅಗತ್ಯ ಸೌಲಭ್ಯಗಳಿಲ್ಲದೆ ವೈದ್ಯಕೀಯ ವಲಯ ಸಂಕಷ್ಟದಲ್ಲಿ ಸಿಲುಕಿದೆ. ದೇಶದ ವೈರಸ್​ ವಿರುದ್ಧದ ಹೋರಾಟದಲ್ಲಿ ಇದೀಗ ಗೂಗಲ್ ಕೈಜೋಡಿಸಿದ್ದು, 135 ಕೋಟಿ ರೂ. ನೆರವು ಘೋಷಿಸಿದೆ.

ಈ ಬಗ್ಗೆ ಟ್ವೀಟ್​ ಮಾಡಿರುವ ಗೂಗಲ್ ಸಿಇಒ ಸುಂದರ್​ ಪಿಚೈ, ಭಾರತದಲ್ಲಿ ಉಲ್ಬಣಗೊಳ್ಳುತ್ತಿರುವ ಕೋವಿಡ್ ಬಿಕ್ಕಟ್ಟನ್ನು ನೋಡಿ ನಾನು ಕುಸಿದಿದ್ದು, ದೇಶದಲ್ಲಿ ವೈದ್ಯಕೀಯ ಸರಬರಾಜು ಮತ್ತು ತುರ್ತು ಪರಿಸ್ಥಿತಿಯ ಬೆಂಬಲಕ್ಕಾಗಿ 135 ಕೋಟಿ ರೂ. ಯೂನಿಸೆಫ್ (UNICEF)​​ ಹಾಗೂ 'ಗಿವ್​ ಇಂಡಿಯಾ' (GiveIndia) ಅಭಿಯಾನದಡಿ 135 ಕೋಟಿ ರೂ. ನೀಡುವುದಾಗಿ ಹೇಳಿದ್ದಾರೆ.

ಇದನ್ನೂ ಓದಿ: ದೇಶದಲ್ಲಿ ಪ್ರತಿ ನಿಮಿಷಕ್ಕೆ 243 ಸೋಂಕಿತರು ಪತ್ತೆ; ಒಂದೇ ದಿನ 2,812 ಮಂದಿ ಸಾವು

ಗೂಗಲ್​ ಹಾಗೂ ಅದರ ಅಂಗಸಂಸ್ಥೆಗಳ ಮೂಲಕ ಈ ನೆರವು ನೀಡಲಾಗುತ್ತಿದೆ. ಬಿಕ್ಕಟ್ಟಿನ ಸಂದರ್ಭದಲ್ಲಿ ದೇಶವನ್ನು ಬೆಂಬಲಿಸಲು ಕಂಪನಿಯು ಭಾರತದ ಸ್ಥಳೀಯ ಸರ್ಕಾರಗಳೊಂದಿಗೆ ಕೆಲಸ ಮಾಡಲಿದೆ ಎಂದು ಗೂಗಲ್ ಇಂಡಿಯಾದ ಮುಖ್ಯಸ್ಥ ಸಂಜಯ್ ಗುಪ್ತಾ ತಿಳಿಸಿದ್ದಾರೆ.

ಕಳೆದ ವರ್ಷ ಕೂಡ ಸುಂದರ್​ ಪಿಚೈ ಅವರು ಜಾಗತಿಕ ಕೋವಿಡ್​-19 ನಿರ್ಮೂಲನೆಗಾಗಿ 5,990 ಕೋಟಿ ರೂ. ದೇಣಿಗೆ ನೀಡಿದ್ದರು. ಅಲ್ಲದೇ ಭಾರತದ ದಿನಗೂಲಿ ಕಾರ್ಮಿಕರ ಕುಟುಂಬಗಳಿಗೆ ನೆರವಾಗಲು 5 ಕೋಟಿ ರೂ. ಕೊಟ್ಟಿದ್ದರು.