ನಾವು ಸಂಕಷ್ಟದಲ್ಲಿದ್ದಾಗ ಸಹಾಯ ಮಾಡಿದೆ, ಇದೀಗ ಭಾರತಕ್ಕೆ ನೆರವು ನೀಡುವುದು ನಮ್ಮ ಕರ್ತವ್ಯ: ಕಮಲಾ ಹ್ಯಾರಿಸ್​

ಭಾರತಕ್ಕೆ ನಾವು ಎಲ್ಲ ರೀತಿಯ ಸಹಾಯ ಮಾಡಲು ಮುಂದಾಗಿದ್ದು, ನಮ್ಮ ಕಷ್ಟಕಾಲದಲ್ಲಿ ಅದು ನಮಗೆ ನೇರವಾಗಿದೆ ಎಂದು ಅಮೆರಿಕ ಉಪಾಧ್ಯಕ್ಷೆ ಹ್ಯಾರಿಸ್ ತಿಳಿಸಿದ್ದಾರೆ.

ವಾಷಿಂಗ್ಟನ್​: ಈ ಹಿಂದೆ ಅಮೆರಿಕ ಕೋವಿಡ್​​ ಸಂಕಷ್ಟಕ್ಕೊಳಗಾಗಿದ್ದ ವೇಳೆ ಭಾರತ ನಮಗೆ ಅಗತ್ಯ ನೆರವು ರವಾನೆ ಮಾಡಿತ್ತು. ಇದೀಗ ತೊಂದರೆಗೊಳಗಾಗಿರುವ ಭಾರತಕ್ಕೆ ಅಗತ್ಯ ಸಹಾಯ ಮಾಡುವುದು ನಮ್ಮ ಕರ್ತವ್ಯವಾಗಿದ್ದು, ಸಹಾಯ ಮಾಡಲು ನಾವು ನಿರ್ಧರಿಸಿದ್ದೇವೆ ಎಂದು ಅಮೆರಿಕ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್​ ತಿಳಿಸಿದ್ದಾರೆ.

ಭಾರತದ ಸ್ನೇಹಿತರಾಗಿ, ಏಷ್ಯನ್​ ಕ್ವಾಡ್​​ ಸದಸ್ಯರಾಗಿ ಮತ್ತು ಜಾಗತಿಕ ಸಮುದಾಯದ ಭಾಗವಾಗಿ ನಾವು ಈ ಕೆಲಸ ಮಾಡುತ್ತಿದ್ದೇವೆ ಎಂದಿದ್ದಾರೆ. ಭಾರತಕ್ಕೆ ಸಂಪೂರ್ಣ ಬೆಂಬಲ ಘೋಷಿಸುವ ಉದ್ದೇಶದಿಂದ ಕೋವಿಡ್ ಲಸಿಕೆಗಳ ಮೇಲಿನ ಪೇಟೆಂಟ್​ ಅಮಾನತುಗೊಳಿಸಲಾಗಿದ್ದು, ಭಾರತ ಮತ್ತು ಇತರ ರಾಷ್ಟ್ರಗಳು ತಮ್ಮ ಜನರಿಗೆ ಚುಚ್ಚುಮದ್ದು ನೀಡಲು ಸಹಾಯ ಮಾಡಲು ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದರು.

ಭಾರತಕ್ಕೆ ಈಗಾಗಲೇ ಪುನರ್​​ಭರ್ತಿ ಮಾಡಬಹುದಾದ ಆಮ್ಲಜನಕ ಸಿಲಿಂಡರ್​ ರವಾನೆ ಮಾಡಿದ್ದೇವೆ. N95 ಮಾಸ್ಕ್​ ಹಾಗೂ ರೆಮ್ಡೆಸಿವಿರ್​ ಔಷಧಿ ಕಳುಹಿಸಿದ್ದೇವೆ ಎಂದರು.

ಏಪ್ರಿಲ್​ 26ರಂದು ಅಧ್ಯಕ್ಷ ಜೋ ಬೈಡನ್​​ ಪ್ರಧಾನಿ ನರೇಂದ್ರ ಮೋದಿ ಜತೆ ಮಾತನಾಡಿದ್ದು, ಎಲ್ಲ ರೀತಿಯ ಬೆಂಬಲ ನೀಡುವುದಾಗಿ ಘೋಷಣೆ ಮಾಡಿದ್ದಾರೆ. ಏಪ್ರಿಲ್​ 30ರವೇಳಗೆ ಯುನೈಟೆಡ್​ ಸ್ಟೇಟ್ಸ್​ ಮಿಲಿಟರಿ ಎಲ್ಲ ರೀತಿಯ ನೆರವು ನೀಡಲು ನಿರ್ಧರಿಸಿ, ಆ ಕ್ರಮ ಕೈಗೊಂಡಿದೆ. ಭಾರತದಲ್ಲಿ ಕೋವಿಡ್ ಸೋಂಕು ಹಾಗೂ ಸಾವು ಉಲ್ಭಣಗೊಂಡಿದ್ದು, ನಿಜಕ್ಕೂ ಇದು ಹೃದಯ ವಿದ್ರಾವಕ. ನಮ್ಮ ಪ್ರೀತಿ ಪಾತ್ರರನ್ನ ಕಳೆದುಕೊಂಡಾಗ ನೋವಾಗುತ್ತದೆ. ಅವರಿಗೆ ನನ್ನ ಸಂತಾಪಗಳು ಎಂದಿದ್ದಾರೆ.