ವೆಂಟಿಲೇಟರ್​ ಕೊರತೆ ನೀಗಿಸಲು ನೂತನ ವಿಧಾನ ಆವಿಷ್ಕರಿಸಿದ ಸಂಶೋಧಕರು

ವ್ಯಾಪಕವಾಗಿ ಹರಡುತ್ತಿರುವ ಕೊರೊನಾ ವೈರಸ್​ನಿಂದಾಗಿ ಎಲ್ಲೆಡೆ ವೆಂಟಿಲೇಟರ್​ಗಳ ಸಮಸ್ಯೆ ತಲೆದೂರಿದ್ದು, ಈ ಸಮಸ್ಯೆಯನ್ನು ನಿವಾರಿಸುವ ನಿಟ್ಟಿನಲ್ಲಿ ಭಾರತೀಯ ಮೂಲದ ಸಂಶೋಧಕರನ್ನೊಳಗೊಂಡ ಅಮೆರಿಕದ ಸಂಶೋಧಕರು ನೂತನ ಮಾರ್ಗವೊಂದನ್ನ ಕಂಡು ಹಿಡಿದಿದ್ದಾರೆ.

ಬೋಸ್ಟನ್ (ಯುಎಸ್ಎ): ಕೊರೊನಾ ವೈರಸ್​​ನಿಂದಾಗಿ ವಿಶ್ವದೆಲ್ಲೆಡೆ ಆತಂಕ ಉಂಟಾಗಿದ್ದು, ಕೊರೊನಾ ಸೋಂಕಿತರಿಗೆ ಉಸಿರಾಟದ ಸಮಸ್ಯೆ ಉಂಟಾದಾಗ ವೆಂಟಿಲೇಟರ್​ ಮೊರೆ ಹೋಗುವುದು ಅತ್ಯಂತ ಅವಶ್ಯವಾಗಿದೆ. ಆದರೆ, ಕೊರೊನಾ ಸೋಂಕಿತರು ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಹಿನ್ನೆಲೆ, ವೆಂಟಿಲೇಟರ್​ಗಳನ್ನು ಒದಗಿಸುವುದು ಕಷ್ಟಕರವಾಗಿದೆ.

ಈ ನಿಟ್ಟಿನಲ್ಲಿ ಭಾರತೀಯ ಮೂಲದವರನ್ನ ಒಳಗೊಂಡಂತೆ ಸಂಶೋಧಕರ ತಂಡವೊಂದು ಅಮೆರಿಕದಲ್ಲಿ ರೋಗಿಗಳ ನಡುವೆ ವೆಂಟಿಲೇಟರ್‌ಗಳನ್ನು ಹಂಚಿಕೊಳ್ಳುವ ಹೊಸ ವಿಧಾನವನ್ನು ಕಂಡು ಹಿಡಿದಿದ್ದಾರೆ. ಇದನ್ನು ತೀವ್ರ ಉಸಿರಾಟದ ತೊಂದರೆಯಲ್ಲಿರುವ ಕೊರೊನಾ ರೋಗಿಗಳಿಗೆ ಚಿಕಿತ್ಸೆ ನೀಡಲು ಕೊನೆಯ ಅಸ್ತ್ರವಾಗಿ ಬಳಸಬಹುದು ಎಂದು ಹೇಳಿದ್ದಾರೆ.

ಅಮೆರಿಕದ ಮೆಸಾಚೂಸೆಟ್ಸ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಎಂಐಟಿ) ಯಲ್ಲಿನ ಶ್ರಿಯಾ ಶ್ರೀನಿವಾಸನ್ ಸೇರಿದಂತೆ ಹಲವು ಸಂಶೋಧಕರು, ಕೊರೊನಾ ರೋಗಿಗಳು ತೀವ್ರವಾದ ಉಸಿರಾಟದ ತೊಂದರೆಯನ್ನು ಅನುಭವಿಸುತ್ತಿರುವುದರಿಂದ, ವೆಂಟಿಲೇಟರ್‌ಗಳನ್ನು ಹಂಚಿಕೊಳ್ಳುವ ವಿಚಾರದ ಬಗ್ಗೆ ಹೆಚ್ಚಿನ ಚರ್ಚೆ ನಡೆಸಿ ಈ ಬಗ್ಗೆ ಅಧ್ಯಯನ ನಡೆಸಿದ್ದಾರೆ.

ಅತ್ಯಂತ ಅವಶ್ಯಕ ವೇಳೆಯಲ್ಲಿ ಎರಡು ಅಥವಾ ಹೆಚ್ಚಿನ ರೋಗಿಗಳನ್ನು ಒಂದೇ ವೆಂಟಿಲೇಟರ್​ ಯಂತ್ರಕ್ಕೆ ಸಂಪರ್ಕಿಸಿ ಹಾಗೂ ಏರ್​ ಪೈಪ್​​(ಉಸಿರಾಟದ ಕೊಳವೆ)ಗಳನ್ನು ಅನೇಕ ವಿಭಾಗಗಳಾಗಿ ವಿಭಜಿಸುವುದರಿಂದ ರೋಗಿಗೆ ಉಸಿರಾಟದ ಸಮಸ್ಯೆಯನ್ನು ನಿವಾರಿಸಬಹುದು ಹಾಗೂ ಸ್ವಲ್ಪ ಮಟ್ಟಿನಲ್ಲಿ ವೆಂಟಿಲೇಟರ್​ಗಳ ಸಮಸ್ಯೆ ನಿವಾರಿಸಬಹುದಾಗಿದೆ ಎಂದು ಶ್ರೀನಿವಾಸನ್ ಹೇಳಿದ್ದಾರೆ.

ಅದಲ್ಲದೇ, ಈ ಸಂಶೊಧಕರ ತಂಡ ಈ ಬಗ್ಗೆ ಪ್ರಯೋಗಾಲಯಗಳಲ್ಲಿ ಪರಣಾಮಕಾರಿಯಾಗಿ ಪ್ರದರ್ಶಿಸಿದ್ದು, ರೋಗಿಯ ಜೀವಕ್ಕೆ ಅಪಾಯವಿರುವಾಗ, ತುರ್ತು ಸಮಯದಲ್ಲಿ ಮಾತ್ರ ಇದನ್ನು ಕೊನೆಯ ಅಸ್ತ್ರವಾಗಿ ಬಳಸಬೇಕೆ ಹೊರತು ಎಲ್ಲ ಸಮಯದಲ್ಲಿ ಇದು ಉಪಯುಕ್ತವಲ್ಲ ಎಂದು ಎಚ್ಚರಿಕೆ ನೀಡಿದ್ದಾರೆ.

ಈ ನೂತನ ಆವಿಷ್ಕರಣೆಯನ್ನು ಹಲವಾರು ವೈದ್ಯ ಸಂಘಗಳು ವಿರೋಧಿಸಿ, ನಿರುತ್ಸಾಹ ತೋರಿದ್ದು, ಇದರಿಂದ ಆಗುವ ಉಪಯೋಗಕ್ಕಿಂತ ಅಪಾಯವೇ ಹೆಚ್ಚು ಎಂದು ಪ್ರತಿಪಾದಿಸಿದ್ದಾರೆ.