ಟ್ರಕ್‌ ಚಾಲಕರ ಭಾರಿ ಪ್ರತಿಭಟನೆ: 50 ವರ್ಷದಲ್ಲೇ ಮೊದಲ ಬಾರಿಗೆ ತುರ್ತು ಅಧಿಕಾರ ಬಳಸಿದ ಕೆನಡಾ ಪ್ರಧಾನಿ

ರಾಷ್ಟ್ರೀಯ ತುರ್ತು ಸಂದರ್ಭಗಳಲ್ಲಿ ಸುರಕ್ಷತೆ ಮತ್ತು ಭದ್ರತೆಯನ್ನು ಖಚಿತಪಡಿಸಿಕೊಳ್ಳಲು ತಾತ್ಕಾಲಿಕ ಕ್ರಮಗಳನ್ನು ಜಾರಿಗೆ ತರಲು ಈ ವಿಶೇಷ ಅಧಿಕಾರ ನೀಡಲಾಗುತ್ತದೆ. ಈ ಕುರಿತು ಈಗಾಗಲೇ ವಿಶೇಷ ಸಭೆ ನಡೆಸಿರುವ ಕೆನಡಾ ಪ್ರಧಾನಿ, ಕೆಲವು ಕ್ರಮಗಳನ್ನು ತಿಳಿಸಿದ್ದಾರೆ.

ಒಟ್ಟಾವಾ(ಕೆನಡಾ): ಕೋವಿಡ್ ಲಸಿಕೆ ಮತ್ತು ಮಾರ್ಗಸೂಚಿಗಳ ವಿರುದ್ಧ ಕೆನಡಾದಲ್ಲಿ ಟ್ರಕ್ ಚಾಲಕರು ನಡೆಸುತ್ತಿರುವ ಬೃಹತ್​​​ ಪ್ರತಿಭಟನೆ ದಿನದಿಂದ ದಿನಕ್ಕೆ ತೀವ್ರವಾಗುತ್ತಿದೆ. ಈ ಪ್ರತಿಭಟನೆಯನ್ನು ಹತ್ತಿಕ್ಕಲು ತುರ್ತು ಅಧಿಕಾರಗಳನ್ನು ಬಳಸುವುದಾಗಿ ಕೆನಡಾ ಅಧ್ಯಕ್ಷ ಜಸ್ಟಿನ್ ಟ್ರೂಡೋ ಘೋಷಿಸಿದ್ದಾರೆ.

ಈ ಮೂಲಕ 50 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ತುರ್ತು ಅಧಿಕಾರವನ್ನು ಕೆನಡಾದಲ್ಲಿ ಬಳಸಲಾಗುತ್ತಿದೆ. 'ತುರ್ತು ಅಧಿಕಾರ'ದಲ್ಲಿ ಸೇನೆಯನ್ನು ಬಳಸುವ ವಿಚಾರವನ್ನು ಟ್ರೂಡೋ ತಳ್ಳಿಹಾಕಿದ್ದು, ಈ ಅಧಿಕಾರಕ್ಕೆ ಸೀಮಿತ ಸಮಯವಿದೆ. ದೇಶವ್ಯಾಪಿ ಸ್ಥಳಗಳಲ್ಲಿ ತುರ್ತು ಅಧಿಕಾರ ಬಳಸದೇ, ಕೆಲವೇ ಕೆಲವು ಸ್ಥಳಗಳಲ್ಲಿ ಬಳಸಲಾಗುತ್ತದೆ. ಇದರ ಜೊತೆಗೆ ಸಮಯೋಚಿತ ರೀತಿಯಲ್ಲಿಗಿ ತುರ್ತು ಅಧಿಕಾರವನ್ನು ಬಳಸಲಾಗುತ್ತದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಟ್ರಕ್​ ಚಾಲಕರಿಗೆ ಲಸಿಕೆ ಅಥವಾ ಕ್ವಾರಂಟೈನ್ ಆದೇಶವನ್ನು ವಿರೋಧಿಸಿ ಕೆನಡಾದ ಟ್ರಕ್ಕರ್‌ಗಳು ಜನವರಿ 28ರಂದು ಪ್ರಾರಂಭಿಸಿದ 'ಫ್ರೀಡಂ ಕಾನ್ವಾಯ್' ಪ್ರತಿಭಟನೆ ನಡೆಯುತ್ತಿರುವ ಸ್ಥಳಗಳಲ್ಲಿ ಮಾತ್ರವೇ ಈ ತುರ್ತು ಅಧಿಕಾರ ಬಳಕೆಯಾಗಲಿದೆ ಎಂಬುದು ಟ್ರೂಡೋ ಅವರ ಹೇಳಿಕೆಯಿಂದ ಸ್ಪಷ್ಟವಾಗಿದೆ.

ಕೆನಡಾದಲ್ಲಿ ತುರ್ತು ಅಧಿಕಾರಗಳು ಹೀಗಿರುತ್ತವೆ ಗೊತ್ತೇ?

• ಈ ತುರ್ತು ಅಧಿಕಾರ ಕೆನಡಾ ಸರ್ಕಾರಕ್ಕೆ ತಾತ್ಕಾಲಿಕ ಮತ್ತು ವಿಶೇಷ ಅಧಿಕಾರಗಳನ್ನು ನೀಡುತ್ತದೆ
• ಸಾರ್ವಜನಿಕ ಸಭೆ ಮತ್ತು ಪ್ರಯಾಣದ ಮೇಲೆ ವಿಶೇಷ ನಿರ್ಬಂಧಗಳನ್ನು ವಿಧಿಸುವ ಅಧಿಕಾರ
• ಸ್ಥಳೀಯ ಮತ್ತು ಪ್ರಾಂತೀಯ ಪೊಲೀಸರಿಗೆ ಸರ್ಕಾರ ಹೆಚ್ಚಿನ ಸಹಕಾರ ನೀಡುವ ಅಧಿಕಾರ
• ದೇಶದಲ್ಲಿ ಅಗತ್ಯ ಸೇವೆಗಳು ಯಾವುವು ಎಂಬುದನ್ನು ನಿರ್ಧರಿಸಲು ವಿಶೇಷ ಅಧಿಕಾರ
• ಕಾಯ್ದೆಯ ಉಲ್ಲಂಘನೆಗಳ ಮೇಲೆ ದಂಡವನ್ನು ವಿಧಿಸಲು, ದಂಡ ಹೆಚ್ಚಿಸಲು ಅಧಿಕಾರ
• ಯಾರಿಗಾದರೂ ಹಾನಿಯಾದರೆ, ಅವರಿಗೆ ಪರಿಹಾರ ಒದಗಿಸಲು ಯೋಜನೆ ರೂಪಿಸುವ ಅಧಿಕಾರ

ರಾಷ್ಟ್ರೀಯ ತುರ್ತು ಸಂದರ್ಭಗಳಲ್ಲಿ ಸುರಕ್ಷತೆ ಮತ್ತು ಭದ್ರತೆಯನ್ನು ಖಚಿತಪಡಿಸಿಕೊಳ್ಳಲು ತಾತ್ಕಾಲಿಕ ಕ್ರಮಗಳನ್ನು ಜಾರಿಗೆ ತರಲು ಈ ವಿಶೇಷ ಅಧಿಕಾರ ನೀಡಲಾಗುತ್ತದೆ. ಈ ಕುರಿತು ಈಗಾಗಲೇ ವಿಶೇಷ ಸಭೆ ನಡೆಸಿರುವ ಕೆನಡಾ ಪ್ರಧಾನಿ, ಕೆಲವು ಕ್ರಮಗಳನ್ನು ತಿಳಿಸಿದ್ದಾರೆ.

ತುರ್ತು ಅಧಿಕಾರ ಬಳಸಿ, ಯಾವೆಲ್ಲಾ ಕ್ರಮಗಳನ್ನು ಕೈಗೊಳ್ಳಲಾಗುತ್ತದೆ?

• ನ್ಯಾಯಾಲಯದ ಆದೇಶವಿಲ್ಲದೇ 'ಶಂಕಿತರ' ಖಾತೆಗಳನ್ನು ಬ್ಯಾಂಕ್​ಗಳು ಸ್ಥಗಿತಗೊಳಿಸಬಹುದು
• ಪ್ರತಿಭಟನೆಯಲ್ಲಿ ಬಳಸುವ ವಾಹನಗಳ ವಿಮೆಯನ್ನು ಸಹ ಅಮಾನತುಗೊಳಿಸಬಹುದು
• ಕೆನಡಾದ ಅಕ್ರಮ ಹಣವರ್ಗಾವಣಾ ನಿಯಂತ್ರಣ ಸಂಸ್ಥೆಯಾದ FINTRAC ಸಂಸ್ಥೆಗೆ ಹೆಚ್ಚಿನ ಅಧಿಕಾರ
• ಕ್ರೌಡ್‌ಫಂಡಿಂಗ್ ಪ್ಲಾಟ್‌ಫಾರ್ಮ್‌ಗಳು ಕಡ್ಡಾಯವಾಗಿ FINTRAC ಸಂಸ್ಥೆಯೊಂದಿಗೆ ನೋಂದಾಯಿಸಿಕೊಳ್ಳಬೇಕು.
• ಅನುಮಾನಾಸ್ಪದ ಚಟುವಟಿಕೆಗಳು ಕಂಡು ಬಂದರೆ FINTRAC ಕೂಡಲೇ ವರದಿ ಮಾಡಬೇಕು

ತುರ್ತು ಅಧಿಕಾರ ಜಾರಿ ಹೇಗೆ?

ಕೆನಡಾದ ಸಂಸತ್ತು ಸರ್ಕಾರವು ತುರ್ತು ಅಧಿಕಾರವನ್ನು ಜಾರಿಗೊಳಿಸಲು ಮಂಡನೆ ಮಾಡಿದ ಕಾಯ್ದೆಗೆ ಏಳು ದಿನಗಳಲ್ಲಿ ಅನುಮೋದನೆ ನೀಡಬೇಕು. ಆ ಕಾಯ್ದೆಯನ್ನು ಅನುಮೋದನೆ ಮಾಡಿದ ನಂತರವಷ್ಟೇ ಸರ್ಕಾರ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ. ಸಂಸತ್ತಿಗೆ ಕಾಯ್ದೆಯನ್ನು ಅನುಮೋದಿಸುವ ಅಧಿಕಾರ ಇರುವಂತೆ ರದ್ದುಗೊಳಿಸುವ ಅಧಿಕಾರವೂ ಇದೆ.

ಪ್ರಸ್ತುತ ಜಸ್ಟಿನ್ ಟ್ರೂಡೋ ಅವರ ಪಕ್ಷವಾದ ಲಿಬರಲ್ ಪಾರ್ಟಿ ಆಫ್​ ಕೆನಡಾಗೆ ಹೆಚ್ಚಿನ ಬೆಂಬಲವಿಲ್ಲ. ಈ ಕಾಯ್ದೆ ಜಾರಿಗೊಳಿಸಲು ವಿಪಕ್ಷಗಳ ಸಹಕಾರ ಕೂಡಾ ಅಗತ್ಯವಾಗಿದೆ. ಈ ಕುರಿತು ನ್ಯೂ ಡೆಮಾಕ್ರಟ್ ಪಕ್ಷದ ನಾಯಕ ಜಗ್ಮೀತ್ ಸಿಂಗ್ ಪ್ರತಿಭಟನೆಯನ್ನು ಕೊನೆಗೊಳಿಸುವ ವಿಚಾರದಲ್ಲಿ ನಾವು ಕಾಯ್ದೆಯನ್ನು ಬೆಂಬಲಿಸುತ್ತೇವೆ ಎಂದಿದ್ದಾರೆ.