ವಾಷಿಂಗ್ಟನ್:ಮುಂಬರುವ ಅಮೆರಿಕ ಅಧ್ಯಕ್ಷೀಯ ಚುನಾವಣೆಗೆ ಡೆಮಾಕ್ರಟಿಕ್ ಪಕ್ಷದಿಂದ ಜೋ ಬಿಡೆನ್ ಔಪಚಾರಿಕವಾಗಿ ನಾಮ ನಿರ್ದೇಶನಗೊಂಡಿದ್ದಾರೆ.
ಕೊರೊನಾ ಹೊಡೆತ, ಆರ್ಥಿಕ ಕುಸಿತ ಮತ್ತು ನಾಗರಿಕ ಅಶಾಂತಿಯ ವಿರುದ್ಧ ಎದ್ದು ನಿಲ್ಲಬೇಕಾದ ಸವಾಲನ್ನು ಎದುರಿಸುತ್ತಿರುವ ಅಮೆರಿಕದಲ್ಲಿ, ಅಧ್ಯಕ್ಷ ಹಾಗೂ ರಿಪಬ್ಲಿಕನ್ ಪಕ್ಷದ ನಾಯಕ ಡೊನಾಲ್ಡ್ ಟ್ರಂಪ್ಗೆ ಜೋ ಬಿಡೆನ್ ಸವಾಲು ಹಾಕಲು ಸಿದ್ಧರಾಗಿದ್ದಾರೆ.
ಡೆಮಾಕ್ರಟಿಕ್ ಪಕ್ಷವು ಕಣಕ್ಕಿಸಿಳಿದ ಅತ್ಯಂತ ಪ್ರತಿಭಾವಂತ ಅಭ್ಯರ್ಥಿಗಳ ಪೈಕಿ ತಾವು ಆಯ್ಕೆ ಆಗಿ ಅಧ್ಯಕ್ಷೀಯ ಚುನವಣೆಗೆ ಸ್ಪರ್ಧಿಸುತ್ತಿರುವುದು ಒಂದು ಗೌರವದ ವಿಷಯವಾಗಿದೆ. ನಾವು ಈ ಸಾರ್ವತ್ರಿಕ ಚುನಾವಣೆಗೆ ಒಟ್ಟಾಗಿ ಹೋಗುತ್ತಿದ್ದೇವೆ ಎಂದು ಹೇಳಲು ನನಗೆ ಹೆಮ್ಮೆ ಇದೆ ಎಂದು ಬಿಡೆನ್ ಶುಕ್ರವಾರ ಘೋಷಿಸಿದ್ದಾರೆ.
ಅಮೆರಿಕದ ಮಾಜಿ ಉಪಾಧ್ಯಕ್ಷರಾಗಿರುವ ಬಿಡೆನ್, ಡೆಮಾಕ್ರಟಿಕ್ ಪಕ್ಷದ ಪ್ರಬಲ ನಾಯಕ. ನಾಮ ನಿರ್ದೇಶನಗೊಳ್ಳಲು ಬೇಕಾದ 1,991 ಪ್ರತಿನಿಧಿಗಳನ್ನು ಬಿಡೆನ್ ಈಗಾಲೇ ಒಟ್ಟುಗೂಡಿಸಿದ್ದಾರೆ. ಇನ್ನೂ ಎಂಟು ರಾಜ್ಯಗಳು ಮತ್ತು ಮೂರು ಯುಎಸ್ ಪ್ರಾಂತ್ಯಗಳಲ್ಲಿ ಚುನಾವಣೆ ಫಲಿತಾಂಶ ಬರಬೇಕಿದೆ.
ಈ ಬಗ್ಗೆ ಟ್ವೀಟ್ ಮೂಲಕ ತಿಳಿಸಿರುವ ಬಿಡೆನ್, ನಾಮ ನಿರ್ದೇಶನಗೊಳ್ಳಲು ಬೇಕಿದ್ದ 1,991 ಪ್ರತಿನಿಧಿಗಳನ್ನು ನಾವು ಈಗಾಗಲೇ ಪಡೆದಿದ್ದೇವೆ. ನಿಮ್ಮ ಮತಗಳನ್ನು ಪಡೆಯಲು ನಾನು ಪ್ರತಿದಿನ ಹೋರಾಡುತ್ತೇನೆ. ಆ ಮೂಲಕ ಈ ದೇಶಕ್ಕಾಗಿ ಈ ಯುದ್ಧವನ್ನು ನಾವು ಜಂಟಿಯಾಗಿ ಗೆಲ್ಲಬಹುದು ಎಂದು ತಿಳಿಸಿದ್ದಾರೆ.
