ಅಮೆರಿಕಾದಲ್ಲಿ ಮತ್ತೊಬ್ಬ ಕಪ್ಪು ವರ್ಣೀಯನ ಹತ್ಯೆ..! ಅಟ್ಲಾಂಟ ಪೊಲೀಸ್​​ ಮುಖ್ಯಸ್ಥ ರಾಜೀನಾಮೆ

ಅಟ್ಲಾಂಟದ ವೆಂಡಿ ರೆಸ್ಟೋರೆಂಟ್​ ಬಳಿ ಪೊಲೀಸರು 27 ವರ್ಷದ ಕಪ್ಪು ವರ್ಣೀಯನನ್ನು ಗುಂಡಿಟ್ಟು ಕೊಂದಿದ್ದು, ಅಮೆರಿಕಾದಲ್ಲಿ ಮತ್ತೆ ಪ್ರತಿಭಟನೆ ಭುಗಿಲೆದ್ದಿದೆ. ಈ ಹಿನ್ನೆಲೆಯಲ್ಲಿ ಅಟ್ಲಾಂಟ ಪೊಲೀಸ್​ ಮುಖ್ಯಸ್ಥ ರಾಜೀನಾಮೆ ನೀಡಿದ್ದಾರೆ.

ಅಟ್ಲಾಂಟ: ಅಮೆರಿಕಾದ ಮಿನಿಯಾಪೊಲೀಸ್​ನಲ್ಲಿ ನಡೆದಿದ್ದ ಕಪ್ಪು ವರ್ಣೀಯನ ಹತ್ಯೆ ವಿರೋಧಿಸಿ ಜಗತ್ತಿನ ಹಲವಡೆ ಪ್ರತಿಭಟನೆಗಳು ನಡೆಯುತ್ತಿವೆ. ಈ ಘಟನೆ ಮಾಸುವ ಮುನ್ನವೇ ಯುಎಸ್​ನ ಜಾರ್ಜಿಯಾ ರಾಜ್ಯದ ರಾಜಧಾನಿ ಅಟ್ಲಾಂಟದಲ್ಲಿ ಇನ್ನೊಬ್ಬ ಕಪ್ಪು ವರ್ಣೀಯನನ್ನು ಗುಂಡಿಟ್ಟು ಕೊಲ್ಲಲಾಗಿದೆ.

ಶನಿವಾರ ತಡರಾತ್ರಿ ವೆಂಡಿ ರೆಸ್ಟೋರೆಂಟ್​ ಬಳಿ ಅಟ್ಲಾಂಟ ಪೊಲೀಸರು 27 ವರ್ಷದ ರೇಶರ್ಡ್​ ಬ್ರೂಕ್​ ಎಂಬ ಯುವಕನ್ನು ಗುಂಡಿಕ್ಕಿ ಕೊಂದಿದ್ದಾರೆ. ಈ ಹತ್ಯೆ ವಿರೋಧಿಸಿ ಮತ್ತೆ ಪ್ರತಿಭಟನೆ ಭುಗಿಲೆದ್ದಿದ್ದು, ರೆಸ್ಟೋರೆಂಟ್​ಗೆ ಬೆಂಕಿ ಹೆಚ್ಚಿ ಪ್ರತಿಭಟನಾಕಾರರು ಆಕ್ರೋಶ ಹೊರಹಾಕಿದ್ದಾರೆ. ಪರಿಸ್ಥಿತಿ ಬಿಗಡಾಯಿಸುತ್ತಿದ್ದಂತೆ ಅಟ್ಲಾಂಟ ಪೊಲೀಸ್​​ ಮುಖ್ಯಸ್ಥ ಎರಿಕಾ ಶೀಲ್ಡ್ಸ್​​ ರಾಜೀನಾಮೆ ನೀಡಿದ್ದಾರೆ.

ಹತ್ಯೆಗೆ ಪುರಾವೆಯಾಗಿ ದೊರೆತಿರುವ ವಿಡಿಯೋವನ್ನು ಪರಿಶೀಲಿಸುತ್ತಿದ್ದು, ಘಟನೆ ಸಂಬಂಧ ತನಿಖೆ ನಡೆಸುವಂತೆ ಅಟ್ಲಾಂಟ ಪೊಲೀಸ್​ ಇಲಾಖೆಗೆ ಸೂಚಿಸಲಾಗಿದೆ ಎಂದು ಜಾರ್ಜಿಯಾ ತನಿಖಾ ದಳ (ಜಿಐಬಿ) ತಿಳಿಸಿದೆ.

ಘಟನೆ ವಿವರ:

ವೆಂಡಿ ರೆಸ್ಟೋರೆಂಟ್ ಸಮೀಪ ಬ್ರೂಕ್ ಕಾರಿನೊಳಗಡೆ ಮಲಗಿದ್ದು, ಇದರಿಂದ ಇತರೆ ವಾಹನ ಸವಾರರಿಗೆ ಅಡ್ಡಿಯಾಗಿದೆ ಎಂದು ಪೊಲೀಸರಿಗೆ ದೂರು ಬಂದಿದೆ. ಸ್ಥಳಕ್ಕೆ ಬಂದ ಪೊಲೀಸರು ಆತ ಮದ್ಯಪಾನ ಮಾಡಿರಬಹುದೆಂದು ಪರೀಕ್ಷೆಗೆ ಒಳಪಡಲು ಸೂಚಿಸಿದ್ದರು. ಇದಕ್ಕೆ ಬ್ರೂಕ್​ ವಿರೋಧ ವ್ಯಕ್ತಪಡಿಸಿ ಅಲ್ಲಿಂದ ಪರಾರಿಯಾಗಲು ಯತ್ನಿಸಿದ್ದಾನೆ. ಈ ವೇಳೆ ಆತನ ಮೇಲೆ ಗುಂಡು ಹಾರಿಸಲಾಗಿದೆ ಎಂದು ಜಿಐಬಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.