ಟ್ವಿಟರ್​ ಬಳಕೆ ನಿಲ್ಲಿಸುವಂತೆ ಮಾಧ್ಯಮ ಸಂಸ್ಥೆಗಳಿಗೆ ಸೂಚಿಸಿದ ನೈಜೀರಿಯಾ ಸರ್ಕಾರ

ಅಧ್ಯಕ್ಷ ಮುಹಮ್ಮದ್ ಬುಹಾರಿಯ ವಿವಾದಾತ್ಮಕ ಟ್ವೀಟ್ ಅಳಿಸಿ ಹಾಕಿದ ಬಳಿಕ ನೈಜೀರಿಯಾದಲ್ಲಿ ಟ್ವಿಟರ್​​ಗೆ ನಿಷೇಧ ಹೇರಲಾಗಿದೆ. ಹಾಗಾಗಿ, ಮಾಧ್ಯಮ ಸಂಸ್ಥೆಗಳು ಟ್ವಿಟರ್​ ಬಳಸಿದರೆ ದೇಶದ್ರೋಹ ಚಟುವಟಿಕೆಯೆಂದು ಪರಿಗಣಿಸುವುದಾಗಿ ಸರ್ಕಾರ ಹೇಳಿದೆ.

ಲಾಗೋಸ್: ಕೆಲ ದಿನಗಳ ಹಿಂದೆ ಟ್ವಿಟರ್​ ಬ್ಯಾನ್ ಮಾಡಿರುವ ನೈಜೀರಿಯಾ ಸರ್ಕಾರ, ದೇಶದ ಎಲ್ಲಾ ಟಿವಿ, ರೇಡಿಯೋ ಸ್ಟೇಶನ್​ಗಳಿಗೆ ತಕ್ಷಣ ಟ್ವಿಟರ್​ ಬಳಕೆ ನಿಲ್ಲಿಸುವಂತೆ ಸೂಚಿಸಿದೆ.

ನಿಷೇಧ ಹೇರಿದ ಮೇಲೂ ಟ್ವಿಟರ್​ ಬಳಸುತ್ತಿರುವವರನ್ನು 'ದೇಶದ್ರೋಹಿಗಳು' ಎಂದು ಕರೆದಿರುವ ಸರ್ಕಾರ, ಮಾಧ್ಯಮ ಸಂಸ್ಥೆಗಳು ಸುದ್ದಿ ಸಂಗ್ರಹಿಸಲು ಮತ್ತು ಹಂಚಿಕೊಳ್ಳಲು ಟ್ವಿಟರ್​ ಬಳಸುವುದನ್ನು ನಿಲ್ಲಿಸುವಂತೆ ಖಡಕ್ ಆದೇಶ ನೀಡಿದೆ.

ಮಾಧ್ಯಮ ಸಂಸ್ಥೆಗಳು ಟ್ವಿಟರ್ ಡಿ ಇನ್​ಸ್ಟಾಲ್ (De-install Twitter) ಮಾಡಬೇಕು ಮತ್ತು ಮಾಹಿತಿ ಮೂಲವಾಗಿ ಬಳಸುವುದನ್ನು ನಿಲ್ಲಿಸಬೇಕು ಎಂದು ನ್ಯಾಷನಲ್​ ಬ್ರಾಡ್​ ಕಾಸ್ಟಿಂಗ್ ಕಮಿಷನ್ (ಎನ್​ಬಿಸಿ) ನಿರ್ದೇಶಕ ಆರ್ಮ್‌ಸ್ಟ್ರಾಂಗ್ ಇಡಾಚಾಬಾ ಆದೇಶಿಸಿದ್ದಾರೆ.

ನಿಷೇಧಿಸಲ್ಪಟ್ಟ ಟ್ವಿಟರ್​​ಅನ್ನು ಮಾಹಿತಿ ಮೂಲವಾಗಿ ಯಾವುದಾದರೂ ನೈಜೀರಿಯಾ ಸಂಸ್ಥೆಗಳು ಬಳಸುವುದಾದರೆ ಅದು ದೇಶದ್ರೋಹ ಚಟುವಟಿಕೆಯಾಗಿರುತ್ತದೆ ಎಂದು ಅವರು ಆದೇಶದಲ್ಲಿ ಉಲ್ಲೇಖಿಸಿದ್ದಾರೆ.

ನಾಗರಿಕ ಯುದ್ಧಕ್ಕೆ ಸಂಬಂಧಪಟ್ಟ ಅಧ್ಯಕ್ಷ ಮುಹಮ್ಮದ್ ಬುಹಾರಿಯಾ ವಿವಾದಾತ್ಮಕ ಟ್ವೀಟ್​ ಅಳಿಸಿ ಹಾಕಿದ ಬಳಿಕ ನೈಜೀರಿಯಾದಲ್ಲಿ ಟ್ವಿಟರ್​ಗೆ ನಿಷೇಧ ಹೇರಲಾಗಿದೆ.