ಉಗ್ರರ ಅಟ್ಟಹಾಸಕ್ಕೆ 35 ಜನ ಬಲಿ: ಸೇನಾ ಕಾರ್ಯಾಚರಣೆಯಲ್ಲಿ 80 ಭಯೋತ್ಪಾದಕರು ಹತ

ಪಶ್ಚಿಮ ಆಫ್ರಿಕಾದ ಪುಟ್ಟ ದೇಶ ಬುರ್ಕಿನ ಫಾಸೊದಲ್ಲಿ ಉಗ್ರರ ದಾಳಿಯಿಂದ 35 ಜನ ಸಾವಿಗೀಡಾಗಿದ್ದು, ಸೇನೆ 80 ಉಗ್ರಗಾಮಿಗಳನ್ನು ಹೊಡೆದುರುಳಿಸಿದೆ.

ಉಗಡೌಗೌ (ಬುರ್ಕಿನ ಫಾಸೊ):ಪಶ್ಚಿಮಆಫ್ರಿಕಾದಉತ್ತರ ಬುರ್ಕಿನ ಫಾಸೊದಲ್ಲಿ ನಡೆದ ಭೀಕರ ಭಯೋತ್ಪಾದಕ ದಾಳಿಯಲ್ಲಿ 35 ಜನ ನಾಗರಿಕರು ಸಾವಿಗೀಡಾಗಿದ್ದು, ಸೇನಾ ಕಾರ್ಯಾಚರಣೆಯಲ್ಲಿ 80 ಜನ ಉಗ್ರಗಾಮಿಗಳು ಹತರಾಗಿದ್ದಾರೆ ಎಂದು ದೇಶದ ಅಧ್ಯಕ್ಷ ರೋಚ್ ಮಾರ್ಕ್ ಕಬೋರ್ ತಿಳಿಸಿದ್ದಾರೆ.

ಸೌಮ್ ಪ್ರಾಂತ್ಯದ ಅರ್ಬಿಂದಾ ಪಟ್ಟಣದಲ್ಲಿ ಈ ಘಟನೆ ಸಂಭವಿಸಿದೆ. 'ಉಗ್ರಗಾಮಿಗಳ ಜೊತೆ ಕಾಳಗಕ್ಕಿಳಿದ ನಮ್ಮ ಸೈನಿಕರು 80 ಮಂದಿಯನ್ನು ಹತ್ಯೆ ಮಾಡಿದ್ದಲ್ಲದೆ, ಪ್ರಮುಖ ಮಿಲಿಟರಿ ಉಪಕರಣಗಳನ್ನು ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ಅನಾಗರಿಕ ದಾಳಿಯಲ್ಲಿ ದೇಶದ 35 ಜನರು ಸಾವಿಗೀಡಾಗಿದ್ದು, ಹೆಚ್ಚಿನವರು ಮಹಿಳೆಯರಾಗಿದ್ದಾರೆ' ಎಂದು ರೋಚ್ ಮಾರ್ಕ್ ಕಬೋರ್ ಟ್ವೀಟ್ ಮಾಡಿದ್ದಾರೆ.

ಈ ದಾಳಿಯ ಹೊಣೆಯನ್ನು ಯಾವುದೇ ಉಗ್ರ ಸಂಘಟನೆ ಹೊತ್ತುಕೊಂಡಿಲ್ಲ. ಸದ್ಯ ಬುರ್ಕಿನ ಫಾಸೊ ಅಧ್ಯಕ್ಷ ರೋಚ್ ಮಾರ್ಕ್ ಕಬೋರ್ ಎರಡು ದಿನಗಳ ರಾಷ್ಟ್ರೀಯ ಶೋಕಾಚರಣೆ ಘೋಷಿಸಿದ್ದಾರೆ.