ಪಿಸ್ತೂಲ್ ಹಿಡಿದು​ ಜ್ಯುವೆಲ್ಲರಿಗೆ ನುಗ್ಗಿದ ಖದೀಮರು.. 50 ಲಕ್ಷ ಮೌಲ್ಯದ ಚಿನ್ನಾಭರಣ, ನಗದು ಲೂಟಿ

ಶಸ್ತ್ರಸಜ್ಜಿತ ದರೋಡೆಕೋರರು ರಾಜಸ್ಥಾನದ ಪಾಲಿಯಲ್ಲಿರುವ ಆಭರಣ ಮಳಿಗೆಯಲ್ಲಿ 50 ಲಕ್ಷ ರೂಪಾಯಿ ಮೌಲ್ಯದ ಆಭರಣ ಮತ್ತು 2 ಲಕ್ಷ ರೂಪಾಯಿ ನಗದು ಲೂಟಿ ಮಾಡಿದ್ದಾರೆ.

ಪಾಲಿ (ರಾಜಸ್ಥಾನ): ಶಸ್ತ್ರಸಜ್ಜಿತ ದರೋಡೆಕೋರರು ಆಭರಣ ಅಂಗಡಿಗೆ ನುಗ್ಗಿ 50 ಲಕ್ಷ ರೂಪಾಯಿ ಮೌಲ್ಯದ ಆಭರಣ ಮತ್ತು 2 ಲಕ್ಷ ರೂಪಾಯಿ ಹಣವನ್ನು ದರೋಡೆ ಮಾಡಿದ್ದಾರೆ. ರಾಜಸ್ಥಾನದ ಪಾಲಿಯಲ್ಲಿ ಈ ಘಟನೆ ಜರುಗಿದೆ.

ದುಷ್ಕರ್ಮಿಗಳು ದಾಳಿ ವೇಳೆ ಮೊಬೈಲ್ ಫೋನ್, ಅಂಗಡಿಯ ಸಿಸಿಟಿವಿ ದೃಶ್ಯಾವಳಿಗಳನ್ನು ನಾಶಪಡಿಸಿದ್ದಾರೆ. ಘಟನೆ ಸಂಬಂಧ ಮಾಹಿತಿ ಪಡೆದ ನಂತರ, ಪೊಲೀಸ್​ ಅಧಿಕಾರಿಗಳು ತಂಡದೊಂದಿಗೆ ಸ್ಥಳಕ್ಕೆ ತಲುಪಿ ತನಿಖೆ ಆರಂಭಿಸಿದ್ದಾರೆ. ಕೃತ್ಯ ಎಸಗಿದ ಅಪರಿಚಿತ ವ್ಯಕ್ತಿಗಳ ವಿರುದ್ಧ ಪೊಲೀಸರು ಐಪಿಸಿಯ ವಿವಿಧ ಸೆಕ್ಷನ್‌ಗಳಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಪ್ರಮುಖ ವಿಷಯ ಎಂದರೆ ಶಾಪ್​ನ ಮಾಲೀಕ ಕಿಶನ್ ಲಾಲ್ ಸೋನಿ ಗ್ರಾಹಕರಿಂದ ವಿವಾಹದ ಆಭರಣಗಳನ್ನು ಮಾಡಿಕೊಡಲು ಆರ್ಡರ್​ ಪಡೆದುಕೊಂಡಿದ್ದರು. ಇವೆಲ್ಲವನ್ನೂ ದರೋಡೆ ಮಾಡಲಾಗಿದೆ.

ಶನಿವಾರ ಸಂಜೆ ಅಂಗಡಿ ತೆರೆದ ತಕ್ಷಣ ಮೂವರು ಅಪರಿಚಿತರು ಚಿನ್ನಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಅಂಗಡಿಯವನು ನಿರಾಕರಿಸಿದಾಗ ಪಿಸ್ತೂಲ್ ತೋರಿಸಿ ದರೋಡೆ ಮಾಡಿದ್ದಾರೆ. ಇದಕ್ಕೂ ಮೊದಲು ದುಷ್ಕರ್ಮಿಗಳು ಟೇಪ್​ನಿಂದ ಮಾಲೀಕನ ಬಾಯಿಯನ್ನು ಮುಚ್ಚಿ ಆಭರಣ ಮತ್ತು ಹಣ ಲೂಟಿ ಮಾಡಿದ್ದಾರೆ.