ಮುಂಬೈ:ಬಾಲಿವುಡ್ನ ಚಾರ್ಮಿಂಗ್ ತಂದೆ - ಮಗ ಆಗಿರುವ ಅಮಿತಾಬ್ ಬಚ್ಚನ್ ಮತ್ತು ಅಭಿಷೇಕ್ ಬಚ್ಚನ್ ಅವರು ಇಂದು ಮುಂಬೈನ ಸಿದ್ದಿ ವಿನಾಯಕ ಮಂದಿರಕ್ಕೆ ಭೇಟಿ ನೀಡಿದರು. ಬಿಗ್ ಬಿ ಅವರ ಬಹುನಿರೀಕ್ಷಿತ ಚಿತ್ರ ಉಂಚೈ ಬಿಡುಗಡೆಗೊಂಡಿದ್ದು, ಸಿನಿಮಾದ ಯಶಸ್ಸಿಗೆ ತಂದೆ ಮಗ ದೇವರ ಮೊರೆ ಹೋದರು. ಅಪ್ಪ- ಮಗ ಇಬ್ಬರೂ ಬಿಳಿ ಕುರ್ತಾ ಪೈಜಾಮದ ಜೊತೆ ನೆಹರೂ ಜಾಕೆಟ್ನಲ್ಲಿ ಕಂಗೊಳಿಸಿದರು.
ಇನ್ನು 'ಉಂಚೈ' ಸಿನಿಮಾವನ್ನು ಸೂರಜ್ ಬರ್ಜತ್ಯ ನಿರ್ದೇಶನ ಮಾಡಿದ್ದು, ಅನುಪಮ್ ಖೇರ್, ಬೊಮ್ಮನ್ ಇರಾನಿ, ಡ್ಯಾನಿ ಡೆನ್ಜಾಂಗ್ಪಾ, ಪರಿಣಿತಿ ಚೋಪ್ರಾ ಮತ್ತು ನೀನಾ ಗುಪ್ತ ಪ್ರಮುಖ ತಾರಾಗಣದಲ್ಲಿದ್ದಾರೆ. 2015ರಲ್ಲಿ ಸಲ್ಮಾನ್ ಖಾನ್ ನಟನೆಯ 'ಪ್ರೇಮ್ ರತನ್ ಧನ್ ಪಾಯೋ' ಚಿತ್ರದ ಬಳಿಕ ಸೂರಜ್ ಬರ್ಜತ್ಯ ಈ ಚಿತ್ರದ ಮೂಲಕ ಕಮ್ ಬ್ಯಾಕ್ ಮಾಡಿದ್ದಾರೆ.
ಉಂಚೈ ಸಿನಿಮಾ ಮೂವರು ಸ್ನೇಹಿತರ ಕುರಿತಾಗಿದೆ. ಅಮಿತಾಬ್ ಬಚ್ಚನ್, ಅನುಪಮ್ ಖೇರ್ ಮತ್ತು ಬೊಮ್ಮನ್ ಇರಾನಿ ಮೂವರು ಸ್ನೇಹಿತರು ಮೌಂಟ್ ಎವರೆಸ್ಟ್ ಶಿಖರ ಏರುವ ಕುರಿತದ ಕಥಾ ಹಂದರವನ್ನು ಈ ಚಿತ್ರ ಹೊಂದಿದೆ. ಸಿನಿಮಾದಲ್ಲಿ ಪರಿಣಿತ ಚೋಪ್ರಾ ಈ ಮೂರು ಸ್ನೇಹಿತರಿಗೆ ಟ್ರಕ್ ಗೈಡ್ ಆಗಿ ಕಾರ್ಯ ನಿರ್ವಹಿಸಲಿದ್ದಾರೆ.
ಜೀವನದ ಇಳಿ ಸಂಜೆಯಲ್ಲಿ ನಾಲ್ವರು ಅಮಿತಾಬ್ ಬಚ್ಚನ್, ಅನುಪಮ್ ಖೇರ್, ಬೊಮ್ಮನ್ ಇರಾನಿ, ಡ್ಯಾನಿ ಡೆನ್ಜಾಂಗ್ಪಾ ನಾಲ್ವರು ಗೆಳೆಯರು ಮೌಂಟ್ ಎವರೆಸ್ಟ್ ಏರುವ ಯೋಜನೆ ರೂಪಿಸಿ ಚರ್ಚೆ ಮಾಡುತ್ತಾರೆ. ಆದರೆ, ವಯೋ ಸಹಜದಿಂದಾಗಿ ಡ್ಯಾನಿ ಡೆನ್ಜಾಂಗ್ಪಾ ಸಾವನ್ನಪ್ಪುತ್ತಾರೆ. ಉಳಿದ ಮೂವರು ಸ್ನೇಹಿತರು ಡ್ಯಾನಿ ಚಿತಾ ಭಸ್ಮದೊಂದಿಗೆ ಮೌಂಟ್ ಎವರೆಸ್ಟ್ ಏರಲು ಮುಂದಾಗುತ್ತಾರೆ. ಇವರಿಗೆ ಪರಿಣಿತಿ ಚೋಪ್ರಾ ಮಾರ್ಗದರ್ಶನ ಮಾಡುತ್ತಾರೆ. ಈ ವೇಳೆ ಅವರ ಪ್ರಯಾಣಕ್ಕೆ ನೀನಾ ಮತ್ತು ಸಾರಿಕಾ ಕೂಡ ಜೊತೆಯಾಗುತ್ತಾರೆ.
ಇದನ್ನೂ ಓದಿ: ಬಣ್ಣದ ಲೋಕದಿಂದ ಬಿಡುವು ಮಾಡಿಕೊಂಡು ತಾಯ್ತನ ಅನುಭವಿಸುತ್ತಿರುವ ಸೆಲೆಬ್ರಿಟಿಗಳು
