ನವದೆಹಲಿ:ಭಾರತದ ಸರ್ಗಮ್ ಕೌಶಲ್ ಮಿಸೆಸ್ ವರ್ಲ್ಡ್ 2022ರ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದಾರೆ. ಈ ಮೂಲಕ 21 ವರ್ಷಗಳ ಬಳಿಕ ಮಿಸೆಸ್ ವರ್ಲ್ಡ್ ಕಿರೀಟ ಭಾರತದ ಪಾಲಾಗಿದೆ. 2001ರಲ್ಲಿ ಅದಿತಿ ಗೋವಿತ್ರಿಕರ್ ಅವರು ಮಿಸೆಸ್ ವರ್ಲ್ಡ್ ಆಗಿ ಆಯ್ಕೆಯಾಗಿದ್ದರು.
ಅಮೆರಿಕದ ವೆಸ್ಟ್‌ಗೇಟ್ ಲಾಸ್ ವೇಗಾಸ್ ರೆಸಾರ್ಟ್ನಲ್ಲಿ ಶನಿವಾರ ಸಂಜೆ ನಡೆದ ಸಮಾರಂಭದಲ್ಲಿ 2021ನೇ ಸಾಲಿನ ಮಿಸೆಸ್ ವರ್ಲ್ಡ್ ಶೈಲಿನ್ ಫೋರ್ಡ್ ಅವರು ಜಮ್ಮು ಮತ್ತು ಕಾಶ್ಮೀರ ಮೂಲದ ಸರ್ಗಮ್ ಕೌಶಲ್ ಅವರಿಗೆ ಕಿರೀಟ ತೊಡಿಸಿದರು. ಪಾಲಿನೇಷಿಯಾದ ಬೆಡಗಿ ಮೊದಲ ರನ್ನರ್ ಅಪ್ ಮತ್ತು ಕೆನಡಾದ ಸಂದರಿ ಎರಡನೇ ರನ್ನರ್ ಅಪ್ ಆಗಿ ಹೊರಹೊಮ್ಮಿದರು.
ಮಿಸೆಸ್ ವರ್ಲ್ಡ್ 2022ರ ಕೀರಿಟ ಬಗ್ಗೆ ಭಾನುವಾರ ಸರ್ಗಮ್ ಕೌಶಲ್ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಈ ಖುಷಿ ಹಂಚಿಕೊಂಡಿದ್ದಾರೆ. ದೀರ್ಘಕಾಲದ ಕಾಯುವಿಕೆ ಮುಗಿದಿದೆ. 21 ವರ್ಷಗಳ ನಂತರ ಮಿಸೆಸ್ ವರ್ಲ್ಡ್ ಕಿರೀಟ ನಮ್ಮ ಪಾಲಾಗಿದೆ. ನಾನು ತುಂಬಾ ಉತ್ಸುಕಳಾಗಿದ್ದೇನೆ. ಲವ್ ಯು ಇಂಡಿಯಾ, ಲವ್ ಯು ವರ್ಲ್ಡ್ ಎಂದು ವಿಡಿಯೋ ಬಿಡುಗಡೆ ಮಾಡಿದ್ದಾರೆ.
1984ರಲ್ಲಿ ವಿವಾಹಿತ ಮಹಿಳೆಯರಿಗೆ ಮಿಸೆಸ್ ವರ್ಲ್ಡ್ ಸೌಂದರ್ಯ ಸ್ಪರ್ಧೆ ಆರಂಭವಾಗಿದೆ. ಈ ವರ್ಷದ ಸ್ಪರ್ಧೆಯ ಅಂತಿಮ ಸುತ್ತಿನಲ್ಲಿ ಸರ್ಗಮ್ ಕೌಶಲ್ ಗುಲಾಬಿ ಬಣ್ಣದ ಸೆಂಟರ್ ಸ್ಲಿಟ್ ಗ್ಲಿಟರಿ ಗೌನ್ಅನ್ನು ಧರಿಸಿದ್ದರು.
ಇದನ್ನೂ ಓದಿ:3 ಲಕ್ಷ ಮೌಲ್ಯದ ಬಟ್ಟೆ ತೊಟ್ಟು ಕ್ಯಾಮರಾಗೆ ಪೋಸ್ ಕೊಟ್ಟ ಮಲೈಕಾ ಅರೋರಾ