Weekend with Ramesh: ಡಿಕೆಶಿ ಬದುಕಿನ ಅನಾವರಣದೊಂದಿಗೆ ಮುಕ್ತಾಯಗೊಂಡ ಸಾಧಕರ ಶೋ 'ವೀಕೆಂಡ್​ ವಿತ್​ ರಮೇಶ್​'

'ವೀಕೆಂಡ್​ ವಿತ್​ ರಮೇಶ್​ ಶೋ'ನ 100ನೆಯ ಅತಿಥಿಯಾಗಿ ರಾಜ್ಯದ ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್​ ಆಗಮಿಸಿದ್ದರು.

ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಜನಪ್ರಿಯ ರಿಯಾಲಿಟಿ ಶೋ 'ವೀಕೆಂಡ್​ ವಿತ್​ ರಮೇಶ್'​ ಸೀಸನ್​ 5 ಮುಕ್ತಾಯಗೊಂಡಿದೆ. ಕಾರ್ಯಕ್ರಮದ ಗ್ರ್ಯಾಂಡ್​ ಫಿನಾಲೆಯ ಅತಿಥಿಯಾಗಿ ರಾಜ್ಯದ ಉಪಮುಖ್ಯಮಂತ್ರಿ ಡಿಕೆ ಶಿವಕುಮಾರ್​ ಆಗಮಿಸಿದ್ದರು. ಆಕರ್ಷಕವಾಗಿರುವ ಕೆಂಪು ಸೀಟ್​ನಲ್ಲಿ ಕುಳಿತು ಬಾಲ್ಯ, ಶಿಕ್ಷಣ, ಉದ್ಯೋಗ, ಕುಟುಂಬ, ಸ್ನೇಹಿತರು ಹೀಗೆ ಹಲವು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ರಾಜಕೀಯ ಕ್ಷೇತ್ರದಲ್ಲಿ ಸಾಕಷ್ಟು ಸಾಧನಗೈದಿರುವ ಡಿಕೆಶಿ ತಮ್ಮ ಜೀವನದ ಕಥೆಯನ್ನು ಎಲ್ಲರ ಮುಂದೆ ತೆರೆದಿಟ್ಟಿದ್ದಾರೆ.

ಶಾಲೆಯಿಂದ ಟಿಸಿ ಕೊಟ್ಟು ಕಳುಹಿಸಿದ್ರು..ಡಿಕೆ ಶಿವಕುಮಾರ್​ ತಮ್ಮ ಬಾಲ್ಯ ಮತ್ತು ಶಾಲೆಯ ನೆನಪುಗಳನ್ನು ಸಾಧಕರ ಸೀಟ್​ನಲ್ಲಿ ಮೆಲುಕು ಹಾಕಿದ್ದಾರೆ. "ಕನಕಪುರದಲ್ಲಿ ಹುಟ್ಟಿದ್ದ ನಾನು ವಿದ್ಯಾಭ್ಯಾಸ ಪಡೆದದ್ದು ಬೆಂಗಳೂರಿನಲ್ಲಿ. ನ್ಯಾಷನಲ್ ಪಬ್ಲಿಕ್​ ಸ್ಕೂಲ್​, ಕಾರ್ಮೆಲ್​ ಹೈಸ್ಕೂಲ್​ ಮತ್ತು ವಿದ್ಯಾವರ್ಧಕ ಶಾಲೆಗಳಲ್ಲಿ ವ್ಯಾಸಂಗ ಮಾಡಿದ್ದೆ. ನ್ಯಾಷನಲ್​ ಪಬ್ಲಿಕ್​ ಸ್ಕೂಲ್​ನಲ್ಲಿ ನನಗೆ ಟಿಸಿ ಕೊಟ್ಟು ಕಳುಹಿಸಿದ್ದರು. ಅಲ್ಲಿನ ಸ್ಟ್ಯಾಂಡರ್ಡ್​ ನನಗೆ ಸರಿ ಬರಲಿಲ್ಲ. ನನ್ನನ್ನು ಅಲ್ಲಿಂದ ಕಳುಹಿಸಿಬಿಟ್ಟರಲ್ಲ ಅಂತ ಅವರ ಮೇಲೆ ನನಗೂ ದ್ವೇಷ ಬೆಳೆದಿತ್ತು. ಆದರೆ ಅದೇ ಸ್ಕೂಲ್​ನಲ್ಲಿ ನನ್ನ ಓದಿಸ್ಬೇಕು ಅಂತ ತಂದೆ ತಾಯಿಗೆ ಆಸೆ ಇತ್ತು."

"ನಂತರ ಕಾರ್ಮೆಲ್​ ಹೈಸ್ಕೂಲ್​ಗೆ ನನ್ನನ್ನು ಸೇರಿಸಿದ್ದರು. ಅಲ್ಲಿ ನಾನು ಎಲೆಕ್ಷನ್​ಗೆ ನಿಂತಿದ್ದೆ. ಹೆಚ್ಚು ಮತಗಳಿಂದ ನಾನು ಗೆದ್ದಿದ್ದೆ. ಆದರೆ ಅಲ್ಲಿ ನನ್ನ ಹೆಸರನ್ನು ಅನೌನ್ಸ್​ ಮಾಡದೇ ನನ್ನ ಪ್ರತಿಸ್ಪರ್ಧಿಯಾಗಿ ನಿಂತಿದ್ದ ಹುಡುಗಿಯ ಹೆಸರನ್ನು ಶಾಲಾ ಮುಖ್ಯಮಂತ್ರಿಯಾಗಿ ಘೋಷಿಸಿದ್ದರು. ನನಗೆ ಸ್ಪೋರ್ಟ್ಸ್​ ಸೆಕ್ರೆಟರಿಯ ಪಟ್ಟವನ್ನು ಕಟ್ಟಿದ್ದರು. 6ನೇ ಕ್ಲಾಸ್​ನಿಂದಲೇ ನಾನು ಭಾಷಣ ಮಾಡುತ್ತಿದ್ದೆ. ಐಸ್​ಕ್ಯಾಂಡಿ ಮಾರುವವನು ಕೆಂಚ ಅಂತ ಇದ್ದ. ಅವನ ಬಳಿಯಲ್ಲೇ ನಾನು ಭಾಷಣ ಬರೆಸಿಕೊಳ್ಳುತ್ತಿದ್ದೆ. ಆಗಲೇ ನನ್ನ ಭಾಷಣ ಕೇಳಿ ವಿದ್ಯಾರ್ಥಿಗಳು ನನಗೆ ವೋಟ್​ ಹಾಕಿದ್ದರು." ಎಂದರು.

ಬಾಲ್ಯದಿಂದಲೇ ರಾಜಕೀಯದ ಚಟ:"ನಮ್ಮ ತಂದೆ ತಾಯಿ ಬಹಳಷ್ಟು ಪ್ರೀತಿಯಿಂದ ನಮ್ಮನ್ನು ಸಾಕಿದ್ದಾರೆ. ನಮಗಾಗಿ ತುಂಬಾ ತ್ಯಾಗ ಮಾಡಿದ್ದಾರೆ. ಬಹಳ ಪ್ರೀತಿಯಿಂದ ಸಾಕಿದ್ದಾರೆ. ಒಳ್ಳೆಯ ಶಿಕ್ಷಣವನ್ನು ಕೊಡಿಸಬೇಕೆಂದು ಪ್ರಯತ್ನ ಪಟ್ಟಿದ್ದಾರೆ. ನಮ್ಮೂರಿಗೆ ನಾವು ಶ್ರೀಮಂತರೇ, ಆಸ್ತಿವಂತರೇ. ಆದರೆ ನನ್ನ ತಂದೆ- ತಾಯಿ ಮಾತ್ರ ನಮ್ಮ ಶಿಕ್ಷಣಕ್ಕೆ ಬಹಳ ಪ್ರಯತ್ನ ಪಟ್ಟಿದ್ದಾರೆ. ಆದರೆ ನಾನು ಓದಲಿಲ್ಲ. ಆರನೇ ಕ್ಲಾಸಿಗೆ ನನಗೆ ರಾಜಕೀಯದ ಚಟ ಶುರುವಾಯಿತು. ಒಬ್ಬ ರಾಜಕಾರಣಿ ಆಗಲೇಬೇಕು ಅಂತ ನಾನು ಅಂದೇ ತೀರ್ಮಾನ ಮಾಡಿದ್ದೆ" ಎಂದ ಡಿಕೆಶಿ ಭಾವುಕರಾದರು.

ಶ್ಲೋಕ ಉಚ್ಛರಿಸಿದ ಡಿಕೆಶಿ:"ನಾಭಿಷೇಕೋ ನ ಸಂಸ್ಕಾರಃ ಸಿಂಹಸ್ಯ ಕ್ರಿಯತೇ ವನೇ. ವಿಕ್ರಮಾರ್ಜಿತ ಸತ್ವಸ್ಯ ಸ್ವಯಮೇವ ಮೃಗೇಂದ್ರತಾ" ಎಂದು ಡಿಕೆಶಿ ಸಾಧಕರ ಸೀಟ್​ನಲ್ಲಿ ಕುಳಿತು ಶ್ಲೋಕ ಹೇಳಿದ್ದಾರೆ. ಜೊತೆಗೆ ಇದರ ಅರ್ಥವನ್ನೂ ವಿವರಿಸಿದ್ದಾರೆ. "ಕಾಡಿನಲ್ಲಿ ಅನೇಕ ಪ್ರಾಣಿಗಳಿವೆ. ಸಿಂಹಕ್ಕೆ ಯಾರೂ ಮೃಗರಾಜ ಎಂದು ಹೆಸರಿಟ್ಟಿಲ್ಲ. ಅದಕ್ಕೆ ಯಾರೂ ಪಟ್ಟಾಭಿಷೇಕ ಮಾಡಿಲ್ಲ. ತನ್ನ ಶಕ್ತಿ ಮತ್ತು ಸಾಮರ್ಥ್ಯದಿಂದಲೇ ಅದು ಮೃಗರಾಜ ಎನಿಸಿಕೊಂಡಿದೆ" ಎಂದು ಅವರು ಹೇಳಿದ ಸಂಸ್ಕೃತ ಶ್ಲೋಕವನ್ನು ವಿವರಿಸಿದ್ದಾರೆ.

ಒಟ್ಟಾರೆಯಲ್ಲಿ ಕೆಂಪು ಕುರ್ಚಿಯಲ್ಲಿ ಕೂತ ಡಿಕೆಶಿ ತಮ್ಮ ಜೀವನದ ಕಹಿ ಮತ್ತು ಸಿಹಿ ನೆನಪುಗಳನ್ನು ರಿಕಾಲ್​ ಮಾಡಿದ್ದಾರೆ. ತಮ್ಮ ಹೆಂಡತಿ, ಮಕ್ಕಳು, ತಾಯಿ ತಂದೆಯ ಬಗ್ಗೆ ಮಾತನಾಡಿದ್ದಾರೆ. ಅವರು ಕೂಡ ವೇದಿಕೆಗೆ ಬಂದು ಡಿಕೆಶಿಯವರ ಬಗ್ಗೆ ಕುತೂಹಲಕಾರಿ ಸಂಗತಿಗಳನ್ನು ಬಿಚ್ಚಿಟ್ಟಿದ್ದಾರೆ. ಸಿಎಂ ಸಿದ್ದರಾಮಯ್ಯ ಮತ್ತು ಮಾಜಿ ಸಿಎಂ ಕೃಷ್ಣ ಸೇರಿದಂತೆ ಹಲವಾರು ದಿಗ್ಗಜರು ಡಿಕೆಶಿಯ ಗುಣಗಾನ ಮಾಡಿದ್ದಾರೆ. ಡಿಕೆಶಿ ಬದುಕಿನ ಅನಾವರಣದೊಂದಿಗೆ ವೀಕೆಂಡ್​ ವಿತ್​ ರಮೇಶ್​ ಸೀಸನ್​ 5 ಕೂಡ ಮುಕ್ತಾಯಗೊಂಡಿದೆ.

ಇದನ್ನೂ ಓದಿ:Vasishta Simha: 'ಲವ್​ ಲಿ' ಟೈಟಲ್​ ಸಾಂಗ್​ ರಿಲೀಸ್​​.. ವಸಿಷ್ಠ ಸಿಂಹಗೆ ರವಿಚಂದ್ರನ್​, ಉಪೇಂದ್ರ ಸಾಥ್​