ಭಾರತದ ಬಹುಬೇಡಿಕೆಯ ನಟಿ ಆಲಿಯಾ ಭಟ್ ಐಷಾರಾಮಿ ಫ್ಯಾಷನ್ ಬ್ರ್ಯಾಂಡ್ ಗುಸ್ಸಿಯ ರಾಯಭಾರಿ ಆಗಿದ್ದಾರೆ. ಈ ವೇಳೆ, ಅವರು ಕೆಲವು ಖ್ಯಾತ ಹಾಲಿವುಡ್ ಸೆಲೆಬ್ರಿಟಿಗಳೊಂದಿಗೆ ಕಾಣಿಸಿಕೊಂಡರು. ಇತ್ತೀಚೆಗೆ ಜಾಗತಿಕವಾಗಿ ಬ್ರ್ಯಾಂಡ್‌ನ ಮುಖವೆಂದು ಘೋಷಿಸಲ್ಪಟ್ಟಿರುವ ಆಲಿಯಾ, ಗುಸ್ಸಿ ವಿಡಿಯೋವನ್ನು ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ಸೆಲೆಬ್ರಿಟಿಗಳು ಹೊಸ ಅಭಿಯಾನದ ಭಾಗವಾಗಿ ಲಿಂಗ ಸಮಾನತೆಯನ್ನು ಉತ್ತೇಜಿಸಿದರು.
ಸಾಮಾಜಿಕ ಮಾಧ್ಯಮದಲ್ಲಿ ವಿಡಿಯೋ ಹಂಚಿಕೊಂಡಿರುವ ಆಲಿಯಾ, "ಗುಸ್ಸಿ ಚೈಮ್ನ 10ನೇ ವಾರ್ಷಿಕೋತ್ಸವದ ಪ್ರಚಾರಕ್ಕಾಗಿ ಉತ್ಸುಕನಾಗಿದ್ದೇನೆ." ಎಂದು ಕ್ಯಾಪ್ಶನ್ ಬರೆದಿದ್ದಾರೆ. ಜೂಲಿಯಾ ಗಾರ್ನರ್ ತನ್ನನ್ನು ತಾನು ಪರಿಚಯಿಸಿಕೊಳ್ಳುವುದರೊಂದಿಗೆ ವಿಡಿಯೋ ಪ್ರಾರಂಭವಾಗುತ್ತದೆ. ನಂತರದಲ್ಲಿ ಹಾಲೆ ಬೈಲಿ, ಜಾನ್ ಲೆಜೆಂಡ್ ಮತ್ತು ಸಲ್ಮಾ ಹಯೆಕ್ ಪಿನಾಲ್ಟ್, "ನಾನು ಲಿಂಗ ಸಮಾನತೆಗಾಗಿ ಧ್ವನಿ ಎತ್ತುತ್ತೇನೆ" ಎಂದು ಹೇಳುತ್ತಾರೆ.
ಬಳಿಕ ಡೈಸಿ ಎಡ್ಗರ್ ಜೋನ್ಸ್, ಆಲಿಯಾ ಭಟ್, ಸೆರೆನಾ ವಿಲಿಯಮ್ಸ್, ಜೂಲಿಯಾ ರಾಬರ್ಟ್ಸ್ ಮತ್ತು ಇದ್ರಿಸ್ ಎಲ್ಬಾ ಅವರು 'ಶಿಕ್ಷಣ, ಶಕ್ತಿ ಮತ್ತು ಘನತೆ'ಗಾಗಿ ತಮ್ಮ ಬೆಂಬಲವನ್ನು ಘೋಷಿಸಿದರು. ಕೊನೆಯಲ್ಲಿ, ಇದ್ರಿಸ್ ಅವರು "ನಾವೆಲ್ಲರೂ ಒಂದೇ" ಎಂದು ಹೇಳುತ್ತಾರೆ. ಅಲ್ಲಿಗೆ 24 ಸೆಕೆಂಡ್ಗಳ ವಿಡಿಯೋ ಕೊನೆಗೊಳ್ಳುತ್ತದೆ.
ಇತ್ತೀಚೆಗೆ ಬಾಲಿವುಡ್ ನಟಿ - ನಿರ್ಮಾಪಕಿ ಆಗಿರುವ ಆಲಿಯಾ ಭಟ್ ಪ್ರತಿಷ್ಟಿತ ಬ್ರಾಂಡ್ ಗುಸ್ಸಿ ಕ್ರೂಸ್ ಶೋಗಾಗಿ ದಕ್ಷಿಣ ಕೊರಿಯಾದ ಸಿಯೋಲ್‌ಗೆ ಪ್ರಯಾಣಿಸಿದ್ದರು. ಗಂಗೂಬಾಯಿ ಕಥಿಯಾವಾಡಿ ನಟಿ ಪೋಲ್ಕ-ಡಾಟ್ ಕಟೌಟ್‌ಗಳೊಂದಿಗೆ ಮಿನಿ ಕಪ್ಪು ಉಡುಗೆಯನ್ನು ಧರಿಸಿದ್ದರು. ಜೊತೆಗೆ ಗುಸ್ಸಿ ಬ್ಯಾಂಬೋ 1947 ಬ್ಯಾಗ್ ಮತ್ತು ಕಪ್ಪು ಶೂ ಜೊತೆ ತಮ್ಮ ಲುಕ್ಗೆ ಸಂಪೂರ್ಣತೆ ತಂದುಕೊಂಡಿದ್ದರು.