ಅಮಿತಾಭ್ ಬಚ್ಚನ್ ಹಾಗೂ ಜಯಾ ಬಚ್ಚನ್ ದಂಪತಿಯ ಮೊಮ್ಮಗ ಅಗಸ್ತ್ಯ ನಂದಾ ಇಂದು ಜನ್ಮದಿನದ ಸಂಭ್ರಮದಲ್ಲಿದ್ದಾರೆ. 23ನೇ ಹುಟ್ಟುಹಬ್ಬದ ಸಂಭ್ರಮದಲ್ಲಿರುವ ಉದಯೋನ್ಮುಖ ನಟನಿಗೆ ಕುಟುಂಬಸ್ಥರು, ಸ್ನೇಹಿತರು ಸೇರಿದಂತೆ ಚಿತ್ರರಂಗದಿಂದ ಶುಭಾಶಯಗಳ ಸುರಿಮಳೆಯೇ ಹರಿದುಬಂದಿದೆ.
ಅಗಸ್ತ್ಯ ನಂದಾ ಜನ್ಮದಿನ:ಆರ್ಚೀಸ್ ಸ್ಟಾರ್ನ ಫೋಟೋ ವಿಡಿಯೋಗಳು ಸಾಮಾಜಿಕ ಮಾಧ್ಯಮದಲ್ಲಿ ಸದ್ದು ಮಾಡುತ್ತಿವೆ. ಬರ್ತ್ಡೇ ಸೆಲೆಬ್ರೇಶನ್ ವಿಡಿಯೋ ಕೂಡ ವೈರಲ್ ಆಗಿದೆ. ಕೇಕ್ ಕಟ್ ಮಾಡುವ ಸಂದರ್ಭ 'ದಿ ಆರ್ಚೀಸ್'ನ ಸಹ-ನಟಿ ಸುಹಾನಾ ಖಾನ್ ಸಹ ಉಪಸ್ಥಿತರಿದ್ದರು. ಶಾರುಖ್ ಖಾನ್ ಪುತ್ರಿ ಬಚ್ಚನ್ ಮೊಮ್ಮಗ ಅಗಸ್ತ್ಯ ನಂದಾ ಜೊತೆ ಡೇಟಿಂಗ್ ನಡೆಸುತ್ತಿದ್ದಾರೆ ಎಂಬ ವದಂತಿ ಕೆಲ ದಿನಗಳಿಂದ ಇರೋದು ತಿಳಿದೇ ಇದೆ.
ಅಗಸ್ತ್ಯ ಜೊತೆ'ದಿ ಆರ್ಚೀಸ್' ತಂಡ: ಅಗಸ್ತ್ಯ ನಂದಾ ಬರ್ತ್ಡೇ ಸೆಲೆಬ್ರೇಶನ್ನಲ್ಲಿ ಬಿಡುಗಡೆಗೆ ಸಜ್ಜಾಗಿರುವ 'ದಿ ಆರ್ಚೀಸ್' ಸಿನಿಮಾದ ಸಹ-ನಟರಾದ ಸುಹಾನಾ ಖಾನ್ ಮತ್ತು ಮಿಹಿರ್ ಅಹುಜಾ ಕಾಣಿಸಿಕೊಂಡಿದ್ದಾರೆ. ಮಿಹಿರ್ ಅಹುಜಾ ಅವರು ಫೋಟೋ, ವಿಡಿಯೋಗಳನ್ನು ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ವಿಡಿಯೋಗಳಲ್ಲಿ, ಅಗಸ್ತ್ಯ ನಂದಾ ಕೇಕ್ ಕತ್ತರಿಸುತ್ತಿದ್ದಾರೆ. ಸುಹಾನಾ ಪಕ್ಕದಲ್ಲಿ ನಿಂತಿದ್ದಾರೆ. ಗೆಳಯನ ಜನ್ಮದಿನದ ಸಂಭ್ರಮ ಸುಹಾನಾ ಮೊಗದಲ್ಲಿ ಎದ್ದು ಕಾಣುತ್ತಿದೆ. ಅಗಸ್ತ್ಯ ನಂದಾ ಜೊತೆಯೇ ಇದ್ದ ಶಾರುಖ್ ಪುತ್ರಿ ಚಪ್ಪಾಳೆ ತಟ್ಟಿ ಸಂಭ್ರಮಿಸಿದ್ದಾರೆ. ಉಳಿದವರು ಹೆಚ್ಚು ಕಾಣಿಸಿಕೊಂಡಿಲ್ಲ. ಆದ್ರೆ ಗೆಳೆಯರ ಸೆಲೆಬ್ರೇಶನ್ ಸೌಂಡ್ ಸ್ಪಷ್ಟವಾಗಿ ಕೇಳಿಸಿದೆ. ಅಗಸ್ತ್ಯ ಮತ್ತು ಸುಹಾನಾ ಮ್ಯಾಚಿಂಗ್ ಕಪ್ಪುಡುಗೆಯಲ್ಲಿ ಕಂಗೊಳಿಸಿದ್ದಾರೆ.