ಹೈದರಾಬಾದ್:ಬಾಲಿವುಡ್ ನಟರಾದ ಸಾರಾ ಅಲಿ ಖಾನ್ ಮತ್ತು ವಿಕ್ಕಿ ಕೌಶಲ್ ಇತ್ತೀಚೆಗೆ ತಮ್ಮ 'ಜರಾ ಹಟ್ಕೆ ಜರಾ ಬಚ್ಕೆ' ಚಿತ್ರದ ಪ್ರಚಾರದಲ್ಲಿ ಬ್ಯೂಸಿಯಾಗಿದ್ದಾರೆ. ಚಿತ್ರ ಬಿಡುಗಡೆ ಆಗಿ ಭರ್ಜರಿ ಪ್ರದರ್ಶನವನ್ನೂ ಕಾಣುತ್ತಿದೆ. ಬಾಕ್ಸ್ ಆಫೀಸ್ನಲ್ಲಿ 40 ಕೋಟಿ ರೂ. ಬಾಚಿಕೊಂಡು ಮುನ್ನುಗ್ಗುತ್ತಿದೆ.
ಇನ್ನು ಚಿತ್ರದ ಪ್ರಚಾರವನ್ನು ಚಿತ್ರದ ನಟ- ನಟಿ ಕಪಿಲ್ ಶರ್ಮಾ ಶೋನಲ್ಲಿ ಭರ್ಜರಿಯಾಗೇ ಪ್ರಚಾರ ಮಾಡಿದರು. ಲಕ್ಷ್ಮಣ್ ಉಟೇಕರ್ ಅವರ ಚಿತ್ರದಲ್ಲಿ ವಿವಾಹಿತ ಜೋಡಿ ಅಡುಗೆಮನೆಯಲ್ಲಿ ಪ್ರಣಯ ಮಾಡುತ್ತಿರುವ ದೃಶ್ಯವನ್ನು ಶೋ ನಲ್ಲಿ ಪ್ರದರ್ಶಿಸಿ ಗಮನ ಸೆಳೆದರು. ಈ ಶೋ ನಲ್ಲಿ ಕಪಿಲ್, ದೃಶ್ಯಗಳನ್ನು ತೋರಿಸುತ್ತಾ ನಟ ವಿಕ್ಕಿಯ ಕಡೆಗೆ ತಿರುಗಿ, ಮದುವೆಗೆ ಮೊದಲು ನೀವು ಮತ್ತು ಕತ್ರಿನಾ ಕೈಫ್ ಎಲ್ಲಿ ಭೇಟಿಯಾಗಿದ್ದಿರಿ ಎಂಬ ಪ್ರಶ್ನೆ ಮುಂದಿಟ್ಟರು.
"ನಿಜ ಜೀವನದಲ್ಲಿ ನೀವು ಮತ್ತು ಕತ್ರಿನಾ ಡೇಟಿಂಗ್ ಮಾಡಲು ಪ್ರಾರಂಭಿಸಿದಾಗ ಅದು ಯಾರಿಗೂ ತಿಳಿದಿರಲಿಲ್ಲ, ನೀವು ಮತ್ತು ಕತ್ರಿನಾ ಎಲ್ಲಿ ಭೇಟಿಯಾಗಿದ್ದೀರಿ, ನೀವು ಎಂದಿಗೂ ಸಿಕ್ಕಿಹಾಕಿಕೊಳ್ಳಲಿಲ್ಲವೇ?" ಎಂದು ಪ್ರಶ್ನಿಸಿದರು. ಈ ಪ್ರಶ್ನೆಗೆ ಮುಗಳು ನಗೆ ಬೀರಿದ ವಿಕ್ಕಿ ಮುಸಿಮುಸಿ ನಗುತ್ತಾ, "ಪಾಜಿ, ಇದು ಬಹಳ ದೊಡ್ಡ ರಹಸ್ಯ." ಎಂದು ಹಾಸ್ಯ ಚಟಾಕಿ ಹಾರಿಸಿದರು.
ವಿಕ್ಕಿ ಕೌಶಲ್ ಮತ್ತು ಕತ್ರಿನಾ ಮದುವೆಯಾಗುವ ಮೊದಲು ಕೆಲವು ವರ್ಷಗಳ ಕಾಲ ಪರಸ್ಪರ ಡೇಟಿಂಗ್ ಮಾಡುತ್ತಿದ್ದರು. ದಂಪತಿಗಳು ಡಿಸೆಂಬರ್ 9, 2021 ರಂದು ರಾಜಸ್ಥಾನದಲ್ಲಿ ನಡೆದ ಐಷಾರಾಮಿ ಸಮಾರಂಭದಲ್ಲಿ ಸಪ್ತಪದಿ ತುಳಿದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು.