2023ರ ಬಹುನಿರೀಕ್ಷಿತ ತೆಲುಗು ಸಿನಿಮಾ 'ವೀರ ಸಿಂಹ ರೆಡ್ಡಿ' ಸಂಕ್ರಾಂತಿ ಸಮಯದಲ್ಲಿ ಬಿಡುಗಡೆಯಾಗಿ ಥಿಯೇಟರ್ನಲ್ಲಿ ಸದ್ದು ಮಾಡಿತ್ತು. ನಟಸಿಂಹ ನಂದಮೂರಿ ಬಾಲಕೃಷ್ಣ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ಈ ಚಿತ್ರ ಟಾಲಿವುಡ್ ಪ್ರೇಕ್ಷಕರನ್ನು ಆಕರ್ಷಿಸಿತ್ತು. ಗಲ್ಲಾಪೆಟ್ಟಿಗೆಯಲ್ಲಿ ದೊಡ್ಡ ಮಟ್ಟದ ಕಲೆಕ್ಷನ್ ಮಾಡಿತ್ತು. ಬಾಲಯ್ಯ ಡ್ಯುಯೆಲ್ ರೋಲ್ನಲ್ಲಿ ಮಿಂಚಿದ್ದ ಈ ಚಿತ್ರ ಮೊದಲ ದಿನವೇ ಒಳ್ಳೆ ಟಾಕ್ ಪಡೆದು ಹಣದ ಸುರಿಮಳೆಯನ್ನೇ ಹರಿಸಿತ್ತು.
ದಾಖಲೆ ಬರೆದ 'ವೀರ ಸಿಂಹ ರೆಡ್ಡಿ': ಇತ್ತೀಚೆಗಷ್ಟೇ 'ವೀರ ಸಿಂಹ ರೆಡ್ಡಿ' ಸಿನಿಮಾ ಅಪರೂಪದ ದಾಖಲೆ ಬರೆದಿದೆ. ಸುಮಾರು 200 ದಿನಗಳ ಕಾಲ ಒಂದೇ ಚಿತ್ರಮಂದಿರಲ್ಲಿ ದಿನಕ್ಕೆ ನಾಲ್ಕು ಪ್ರದರ್ಶನದಂತೆ ಸಿನಿಮಾ ಪ್ರದರ್ಶನ ಕಂಡಿದೆ. ಈ ಮೂಲಕ ಇಂಡಸ್ಟ್ರಿಯಲ್ಲಿ ಹೊಸ ದಾಖಲೆ ಬರೆದಿದೆ. ಇದಕ್ಕೆ ಸಾಕ್ಷಿಯಾದದ್ದು ಆಂಧ್ರಪ್ರದೇಶದ ಕರ್ನೂಲ್ ಜಿಲ್ಲೆಯ ಆಲೂರಿನಲ್ಲಿರುವ ಎಸ್‌ಎಲ್‌ಎನ್‌ಎಸ್ ಥಿಯೇಟರ್. ಜನವರಿ 12 ರಂದು ವಿಶ್ವದಾದ್ಯಂತ ಬಿಡುಗಡೆಯಾದ ಈ ಚಿತ್ರವು ಎಸ್‌ಎಲ್‌ಎನ್‌ಎಸ್ ಥಿಯೇಟರ್ನಲ್ಲಿ ಏಪ್ರಿಲ್ 21 ರಂದು 100 ದಿನಗಳ ಗಡಿ ದಾಟಿದೆ. ಕಳೆದ ಶುಕ್ರವಾರ 200 ದಿನಗಳನ್ನು ಪೂರೈಸಿದೆ.
ನಂದಮೂರಿ ಬಾಲಕೃಷ್ಣ ಅವರಿಗೆ ಇಂತಹ ದಾಖಲೆಗಳೇನು ಹೊಸತಲ್ಲ. ಅವರು ನಟಿಸಿದ ಅನೇಕ ಸಿನಿಮಾಗಳು ದಾಖಲೆಯನ್ನು ಬರೆದಿವೆ. ಹಾಗಾಗಿ ಈ ಪಟ್ಟಿಯಲ್ಲಿ ಒಂದಲ್ಲ, ಎರಡಲ್ಲ 'ವೀರ ಸಿಂಹ ರೆಡ್ಡಿ' ಸೇರಿದಂತೆ ಆರು ಚಿತ್ರಗಳಿವೆ. ಅವುಗಳಲ್ಲಿ 'ಮಂಗಮ್ಮ ಗರಿ ಮನವಡು', 'ಲೆಜೆಂಡ್', 'ಸಿಂಹ', 'ನರಸಿಂಹ ನಾಯ್ಡು', 'ಸಮರ ಸಿಂಹ ರೆಡ್ಡಿ' ಚಿತ್ರ ಸುಮಾರು 200 ದಿನಗಳ ಕಾಲ ಬಾಕ್ಸ್ ಆಫೀಸ್ನಲ್ಲಿ ಧೂಳೆಬ್ಬಿಸಿದೆ. ಓರ್ವ ನಟನ ಚಿತ್ರ ಒಂದೇ ಥಿಯೇಟರ್ನಲ್ಲಿ 200 ದಿನ ಪ್ರದರ್ಶನ ಕಾಣುತ್ತಿರುವುದು ಅಪರೂಪದ ದಾಖಲೆಯೇ ಸರಿ. ಈ ಅಪರೂಪದ ಸಾಧನೆ ಮಾಡಿರುವುದು ಬಾಲಯ್ಯ ಅನ್ನೋದು ಮತ್ತೊಂದು ಹೆಮ್ಮೆಯ ವಿಚಾರ.