2023ನೇ ಸಾಲಿನ ಕೊನೆಯಲ್ಲಿ ಸಾಲು ಸಾಲು ಬಹುನಿರೀಕ್ಷಿತ ಸಿನಿಮಾಗಳು ತೆರೆಗಪ್ಪಳಿಸಲಿವೆ. ಈಗಾಗಲೇ ಹಲವು ಸಿನಿಮಾಗಳು ತೆರೆಕಂಡು ಪ್ರೇಕ್ಷಕರಿಗೆ ಮನರಂಜನೆಯ ರಸದೌತಣ ಉಣಬಡಿಸಿವೆ. ಇನ್ನುಳಿದ ಮೂರು ತಿಂಗಳಲ್ಲಿ ಬಿಡುಗಡೆಯಾಗಲಿರುವ ಸಿನಿಮಾಗಳ ಪೈಕಿ 'ಟೈಗರ್ 3' ಕೂಡ ಒಂದು.
ಟೈಗರ್ 3:ಬಾಲಿವುಡ್ ನಟರಾದ ಸಲ್ಮಾನ್ ಖಾನ್ ಮತ್ತು ಕತ್ರಿನಾ ಕೈಫ್ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ ಸಿನಿಮಾವೇ ಟೈಗರ್ 3. ಈಗಾಗಲೇ ಅಭಿಮಾನಿಗಳ ಕುತೂಹಲ ಹೆಚ್ಚಿಸಿರುವ ಈ ಸಿನಿಮಾ ಮುಂದಿನ ತಿಂಗಳು ಬಿಡುಗಡೆಗೆ ಸಜ್ಜಾಗಿದೆ. ಆಕರ್ಷಕ ಪೋಸ್ಟರ್, ಟೈಗರ್ ಕಾ ಮೆಸೇಜ್ ಹೆಸರಿನ ವಿಡಿಯೋ ಅನಾವರಣಗೊಳಿಸುವ ಮೂಲಕ ಚಿತ್ರ ನಿರ್ಮಾಪಕರು ಪ್ರೇಕ್ಷಕರ ನಿರೀಕ್ಷೆ ಹೆಚ್ಚಿಸುವಲ್ಲಿ ಯಶಸ್ವಿ ಆಗಿದ್ದಾರೆ. ಇದೀಗ ಅಧಿಕೃತ ಟ್ರೇಲರ್ ರಿಲೀಸ್ ಡೇಟ್ ಅನ್ನು ಯಶ್ ರಾಜ್ ಫಿಲ್ಮ್ಸ್ (YRF) ಪ್ರಕಟಿಸಿದೆ.
ಟ್ರೇಲರ್ ಬಿಡುಗಡೆ ಯಾವಾಗ?: ಈ ಹಿಂದಿನ ವರದಿಗಳು, ಟೈಗರ್ 3 ಟ್ರೇಲರ್ ಅಕ್ಟೋಬರ್ ತಿಂಗಳ ಮಧ್ಯದಲ್ಲಿ ಬಿಡುಗಡೆಯಾಗಲಿದೆ ಎಂದು ತಿಳಿಸಿದ್ದವು. ಇದೀಗ ಆ್ಯಕ್ಷನ್ ಪ್ಯಾಕ್ಡ್ ಥ್ರಿಲ್ಲರ್ ಮೂವಿ ನಿರ್ಮಾಣ ಮಾಡಿರುವ ಯಶ್ ರಾಜ್ ಫಿಲ್ಮ್ ಟ್ರೇಲರ್ ರಿಲೀಸ್ ಡೇಟ್ ಅನ್ನು ಅಧಿಕೃತವಾಗಿ ಘೋಷಿಸಿದೆ. ಟ್ರೇಲರ್ ಅಕ್ಟೋಬರ್ 16 ರಂದು (ಸೋಮವಾರ) ಬಿಡುಗಡೆಯಾಗಲಿದೆ.
ದೀಪಾವಳಿಗೆ ಸಿನಿಮಾ ತೆರೆಗೆ: ಯಶ್ ರಾಜ್ ಫಿಲ್ಮ್ಸ್ ಎಕ್ಸ್(X) ವೇದಿಕೆಯಲ್ಲಿ ಸಿನಿಮಾ ಬಿಡುಗಡೆ ದಿನಾಂಕವನ್ನು ಘೋಷಿಸಿದೆ. ''ಅಕ್ಟೋಬರ್ 16 ರಂದು ಅತ್ಯಂತ ಜೋರಾಗಿ ಘರ್ಜಿಸಲು ಟೈಗರ್ 3 ಟ್ರೇಲರ್ ಬರುತ್ತಿದೆ. ಈ ದೀಪಾವಳಿಗೆ ಚಿತ್ರಮಂದಿರಗಳಲ್ಲಿ ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಸಿನಿಮಾ ಬಿಡುಗಡೆ ಆಗುತ್ತಿದೆ" ಎಂದು ಪೋಸ್ಟ್‌ ಮಾಡಿದೆ.
ಇದನ್ನೂ ಓದಿ:ಮುಂಬೈ ಸಿದ್ಧಿ ವಿನಾಯಕ ದೇಗುಲಕ್ಕೆ ಆರ್ಆರ್ಆರ್ ಸ್ಟಾರ್ ರಾಮ್ಚರಣ್ ಭೇಟಿಯ ಕ್ಷಣಗಳು - Photos
ಚಲನಚಿತ್ರ ನಿರ್ಮಾಣ ಸಂಸ್ಥೆಯ ಈ ಘೋಷಣೆ ಅಭಿಮಾನಿಗಳ ಉತ್ಸಾಹ ಹೆಚ್ಚಿಸಿದೆ. ಟ್ರೇಲರ್ ಬಿಡುಗಡೆಗಾಗಿ ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದರು. ಅಂತಿಮವಾಗಿ, ಮುಹೂರ್ನ ಫಿಕ್ಸ್ ಆಗಿದೆ. ಅಭಿಮಾನಿಗಳೀಗ ತಮ್ಮ ಉತ್ಸಾಹವನ್ನು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಕ್ತಪಡಿಸುತ್ತಿದ್ದಾರೆ. "ದಿ ಬಿಗ್ ಡ್ಯಾಡಿ ಆಫ್ ಸ್ಪೈ ಯೂನಿವರ್ಸ್" ಎಂದು ಅಭಿಮಾನಿಯೋರ್ವರು ಕಾಮೆಂಟ್ ಮಾಡಿದ್ದಾರೆ. ಮತ್ತೋರ್ವರು ಪ್ರತಿಕ್ರಿಯಿಸಿ, "ಭಾಯ್ ಈಸ್ ಬ್ಯಾಕ್, ಟೈಗರ್3" ಎಂದು ಬರೆದಿದ್ದಾರೆ. ಸಾಮಾಜಿಕ ಜಾಲತಾಣ ಬಳಕೆದಾರರೋರ್ವರು ಪ್ರತಿಕ್ರಿಯಿಸಿ, "ಟೈಗರ್ ಈಸ್ ಬ್ಯಾಕ್ ವಿತ್ ಬ್ಲಾಕ್‌ಬಸ್ಟರ್ ಮೂವಿ" ಎಂದಿದ್ದಾರೆ. ಸೋಷಿಯಲ್ ಮೀಡಿಯಾಗಳಲ್ಲಿ ಅಭಿಮಾನಿಗಳು ತಮ್ಮ ಪ್ರತಿಕ್ರಿಯೆ ನೀಡೋದನ್ನು ಮುಂದುವರಿಸಿದ್ದು, ಕಾಮೆಂಟ್‌ಗಳು ಅಭಿಮಾನಿಗಳ ಸಿನಿಮಾ ಮೇಲಿನ ನಿರೀಕ್ಷೆ ಮತ್ತು ಉತ್ಸಾಹವನ್ನು ಪ್ರತಿಬಿಂಬಿಸಿದೆ.
ಇದನ್ನೂ ಓದಿ:'ರಾಮಾಯಣ'ದಲ್ಲಿ ಯಶ್, ಸಾಯಿ ಪಲ್ಲವಿ, ರಣ್ಬೀರ್ ಕಪೂರ್: 2024ರ ಫೆಬ್ರವರಿಯಲ್ಲಿ ಸೆಟ್ಟೇರಲಿದೆ ಸಿನಿಮಾ
ಟೈಗರ್ 3ಗೆ ಮನೀಶ್ ಶರ್ಮಾ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಯಶ್ ರಾಜ್ ಫಿಲ್ಮ್ಸ್ ಬ್ಯಾನರ್ ಅಡಿಯಲ್ಲಿ ಆದಿತ್ಯ ಚೋಪ್ರಾ ನಿರ್ಮಾಣ ಮಾಡಿದ್ದಾರೆ. ಸಲ್ಮಾನ್ ಖಾನ್ ಮತ್ತು ಕತ್ರಿನಾ ಕೈಫ್ ಮುಖ್ಯಭೂಮಿಕೆಯ ಆ್ಯಕ್ಷನ್ ಥ್ರಿಲ್ಲರ್ ಸಿನಿಮಾ ಯಶ್ ರಾಜ್ ಫಿಲ್ಮ್ಸ್ನ ಸ್ಪೈ ಯೂನಿವರ್ಸ್‌ನ ಪ್ರಮುಖ ಪ್ರಾಜೆಕ್ಟ್. ದೀಪಾವಳಿ ಸಂದರ್ಭ, ನವೆಂಬರ್ 10 ರಂದು ಚಿತ್ರಮಂದಿರಗಳಲ್ಲಿ ಟೈಗರ್ 3 ಬಿಡುಗಡೆ ಆಗಲಿದೆ. 2012ರಲ್ಲಿ ಕಬೀರ್ ಖಾನ್ ನಿರ್ದೇಶಿಸಿದ ಏಕ್ ಥಾ ಟೈಗರ್ ಮೂಲಕ ಪ್ರಾರಂಭವಾಗಿ, 2017ರಲ್ಲಿ ಬಂದ ಅಲಿ ಅಬ್ಬಾಸ್ ಜಾಫರ್ ನಿರ್ದೇಶನದ ಟೈಗರ್ ಜಿಂದಾ ಹೈ ಮೂಲಕ ಪ್ರಯಾಣಿಸಿ ಇದೀಗ ಟೈಗರ್ 3ಗೆ ಬಂದು ನಿಂತಿದೆ ಯಶ್ ರಾಜ್ ಫಿಲ್ಮ್ಸ್ ಸ್ಪೈ ಯೂನಿವರ್ಸ್ ಪ್ರಯಾಣ.
