ವಿಶ್ವದ ಸುಪ್ರಸಿದ್ಧ ಮತ್ತು ಶ್ರೀಮಂತ ನಟರಲ್ಲಿ ಒಬ್ಬರಾದ ಶಾರುಖ್ ಖಾನ್ ಅವರಿಂದು 58ನೇ ಜನ್ಮದಿನ ಆಚರಿಸಿಕೊಳ್ಳುತ್ತಿದ್ದಾರೆ. ಈ ಹಿನ್ನೆಲೆ ಅವರ ಮುಂದಿನ ಬಹುನಿರೀಕ್ಷಿತ ಚಿತ್ರ 'ಡಂಕಿ'ಯ ಟೀಸರ್ ಅನಾವರಣಗೊಂಡಿದೆ. ಟೀಸರ್ ರಿಲೀಸ್ ಆದ 1 ಗಂಟೆಯೊಳಗೆ ಯೂಟ್ಯೂಬ್‌ನಲ್ಲಿ 1 ಮಿಲಿಯನ್ಗೂ ಹೆಚ್ಚು ವೀಕ್ಷಣೆಗಳನ್ನು ಪಡೆದಿದೆ. ಸೋಷಿಯಲ್ ಮೀಡಿಯಾದಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳು ನಟನ ನಟನೆಗೆ ಫುಲ್ ಮಾರ್ಕ್ಸ್ ಕೊಟ್ಟಿದ್ದಾರೆ.
ಡಂಕಿ ಟೀಸರ್ ಅನಾವರಣ: ಡಂಕಿ ಟೀಸರ್ (ಮೊದಲ ಟೀಸರ್) ಲಂಡನ್ ತಲುಪಲು ಅನ್ವೇಷಣೆಯಲ್ಲಿ ತೊಡಗುವ ಸ್ನೇಹಿತರ ಭಾವನಾತ್ಮಕ ಪ್ರಯಾಣದ ಒಂದು ನೋಟವನ್ನು ಒದಗಿಸಿದೆ. ಮರುಭೂಮಿಯ ದೃಶ್ಯದೊಂದಿಗೆ ಟೀಸರ್ ಪ್ರಾರಂಭವಾಗಿದ್ದು, ಅಲ್ಲಿ ವ್ಯಕ್ತಿಯೊಬ್ಬ ಜನರನ್ನು ತನ್ನ ಬಂದೂಕಿಗೆ ಗುರಿಯಾಗಿಸಿದ್ದಾನೆ. ಬುಲೆಟ್ ಸಿಡಿದಿದ್ದು, ಯಾರ ಪ್ರಾಣ ಹೋಯಿತು ಎಂಬುದು ಇನ್ನೂ ನಿಗೂಢ. ಸೋನು ನಿಗಮ್ ಅವರ ಮಧುರ ಧ್ವನಿ ಟೀಸರ್ನ ಶ್ರೀಮಂತಿಕೆ ಹೆಚ್ಚಿಸಿದೆ. ಶಾರುಖ್ ಖಾನ್ ಅವರನ್ನು ಹಾರ್ಡಿ ಎಂದು ಪರಿಚಯಿಸಲಾಗಿದೆ. ತಾಪ್ಸಿ ಪನ್ನು ಅವರು ಮನು ಪಾತ್ರದಲ್ಲಿ ನಟಿಸಿದ್ದಾರೆ. ತಾರಾಗಣದಲ್ಲಿ ವಿಕ್ಕಿ ಕೌಶಲ್, ಬೊಮನ್ ಇರಾನಿ, ವಿಕ್ರಮ್ ಕೊಚ್ಚರ್ ಮತ್ತು ಅನಿಲ್ ಗ್ರೋವರ್ ಕೂಡ ಇದ್ದಾರೆ.
ಅಭಿಮಾನಿಗಳಿಂದ ಮೆಚ್ಚುಗೆಯ ಸುರಿಮಳೆ: ಶಾರುಖ್ ಖಾನ್ ಬರ್ತ್ಡೇ ಹಿನ್ನೆಲೆ ಅಭಿಮಾನಿಗಳಿಗಿದು ವಿಶೇಷ ದಿನ. ಅಪಾರ ಸಂಖ್ಯೆಯ ಅಭಿಮಾನಿಗಳು ಟೀಸರ್‌ಗೆ ತಮ್ಮ ಪ್ರೀತಿಯ ಪ್ರತಿಕ್ರಿಯೆ ವ್ಯಕ್ತಪಡಿಸಿಸುತ್ತಿದ್ದಾರೆ. ಸಾಮಾಜಿಕ ಜಾಲತಾಣ ಬಳಕೆದಾರರೊಬ್ಬರ ಪ್ರತಿಕ್ರಿಯಿಸಿ, "ವರ್ಷದ ಸೂಪರ್ ಹಿಟ್ ಸಿನಿಮಾ ಮತ್ತು ಪ್ರಸಿದ್ಧ ನಟ - ನಿರ್ದೇಶಕ ಜೋಡಿಯ ಟೀಸರ್ ಇಲ್ಲಿದೆ. ಅಭಿಮಾನಿಗಳಿಗೆ ಅದ್ಭುತ ಟ್ರೀಟ್. ಹ್ಯಾಪಿ ಬರ್ತ್ಡೇ ಎಸ್ಆರ್ಕೆ'' ಎಂದು ಪ್ರತಿಕ್ರಿಯಿಸಿದ್ದಾರೆ.
ಮತ್ತೋರ್ವ ಸಾಮಾಜಿಕ ಜಾಲತಾಣ ಬಳಕೆದಾರರು ಪ್ರತಿಕ್ರಿಯಿಸಿ, ''ಡಂಕಿಯ ಮೊದಲ ಟೀಸರ್ ಬಹಳ ಉಲ್ಲಾಸಕರವಾಗಿದೆ. ಬ್ರಹ್ಮಾಂಡದ ಕನಸಾದ ಎಸ್ಆರ್ಕೆ ಮತ್ತು ರಾಜ್ಕುಮಾರ್ ಹಿರಾನಿ ಕಾಂಬಿನೇಶನ್ ನನಸಾಗಿದೆ. ಸಾಮಾಜಿಕ ಸಂದೇಶವಿದೆ, ಹಾಸ್ಯವಿದೆ, ಕಥೆಯೂ ಉತ್ತಮವಾಗಿದೆ, ಕಾಸ್ಟಿಂಗ್ ಸಹ ಅತ್ಯುತ್ತಮ, ಕೊನೆಯ ಡಾಕ್ಟರ್ವಾಲಾ ಸೀನ್ ಒಂತೂ ಸೂಪರ್" ಎಂದು ತಿಳಿಸಿದ್ದಾರೆ.