ಹೈದರಾಬಾದ್: ಗ್ಲಾಮರ್ ಮತ್ತು ಅಗಾಧ ಪ್ರತಿಭೆಯಿಂದಲೇ ಬಾಲಿವುಡ್ನ ಮಹಿಳಾ ಸೂಪರ್ಸ್ಟಾರ್ ಎಂದೇ ಖ್ಯಾತಿಗಳಿಸಿದ್ದ ದಿವಂಗತ ನಟಿ ಶ್ರೀದೇವಿ ಅವರ ಬಗ್ಗೆ ಪತಿ ಹಾಗೂ ನಿರ್ಮಾಪಕ ಬೋನಿ ಕಪೂರ್ ಕೆಲವೊಂದು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.
ಇತ್ತೀಚೆಗೆ ನಡೆದ ಸಂದರ್ಶನವೊಂದರಲ್ಲಿ ಶ್ರೀದೇವಿ ಸಾವಿನ ಬಗ್ಗೆ ಮಾತನಾಡಿದ್ದಾರೆ. ಸ್ಲಿಮ್ ಆಗಿ ಕಾಣಲು ಶ್ರೀದೇವಿ ಕಟ್ಟುನಿಟ್ಟಿನ ಆಹಾರ ಕ್ರಮವನ್ನು ಅನುಸರಿಸುತ್ತಿದ್ದರು. ಒಂದೊಮ್ಮೆ ಉಪ್ಪಿನಾಂಶ ಇಲ್ಲದ ಆಹಾರ ಸೇವನೆ ಮಾಡುವಂತೆ ವೈದ್ಯರು ಸೂಚಿಸಿದ್ದರು. ಅದರಂತೆ ತೆರೆಯ ಮೇಲೆ ಸುಂದರವಾಗಿ ಕಾಣಲು ಶ್ರೀದೇವಿ ಉಪ್ಪಿನಾಂಶ ಇಲ್ಲದ ಆಹಾರ ಸೇವಿಸುತ್ತಿದ್ದರು. ಇದರ ಬಗ್ಗೆ ಮದುವೆ ನಂತರವಷ್ಟೇ ನನಗೆ ತಿಳಿದು ಬಂದಿದೆ.
ನಿಯಮಿತ ಪ್ರಮಾಣದಲ್ಲೂ ಆಕೆ ಉಪ್ಪು ಸೇವನೆ ಮಾಡದೇ ತಲೆ ಸುತ್ತಿ ಬಿದ್ದಿರುವ ಅನೇಕ ಸಂದರ್ಭಗಳಿವೆ. ಕಡಿಮೆ ರಕ್ತದೊತ್ತಡ ಸಮಸ್ಯೆಯಿಂದ ಆಕೆ ಬಳಲುತ್ತಿದ್ದಳು. ಈ ಬಗ್ಗೆ ಎಚ್ಚರಿಕೆ ವಹಿಸುವಂತೆ ವೈದ್ಯರು ಅನೇಕ ಬಾರಿ ಆಕೆಗೆ ತಿಳಿಸಿದ್ದರೂ ಅದನ್ನು ಗಂಭೀರವಾಗಿ ತೆಗೆದುಕೊಂಡಿರಲಿಲ್ಲ. ಶ್ರೀದೇವಿ ಸಾವು ಅಸಹಜವಲ್ಲ ಅದು ಆಕಸ್ಮಿಕ. ಆಕೆ ಸಾವಿನ ಬಳಿಕ ನನ್ನ ವಿರುದ್ಧ ಒಂದಿಷ್ಟು ವದಂತಿ ಹಬ್ಬಲಾರಂಭಿಸಿದವು. ಈ ಹಿನ್ನೆಲೆ ಪೊಲೀಸರು 24 ಗಂಟೆಗಳ ಕಾಲ ನನ್ನ ವಿಚಾರಣೆ ನಡೆಸಿದ್ದರು. ಲೈ ಡಿಟೆಕ್ಟರ್ ಪರೀಕ್ಷೆ ಕೂಡ ಮಾಡಿದ್ದರು. ಎಲ್ಲ ಪರೀಕ್ಷೆಗಳ ಬಳಿಕ ಶ್ರೀದೇವಿ ಸಾವು ಆಕಸ್ಮಿಕ ಎಂಬುದು ಪೊಲೀಸರು ಪತ್ತೆ ಹಚ್ಚಿದ್ದರು ಎಂದು ಬೋನಿ ಕಪೂರ್ ಹೇಳಿದ್ದಾರೆ.