ಇದೇ ಮೊದಲ ಬಾರಿಗೆ ಬಾಲಿವುಡ್ ಬಹುಬೇಡಿಕೆ ತಾರೆಯರಾದ ಹೃತಿಕ್ ರೋಷನ್ ಮತ್ತು ದೀಪಿಕಾ ಪಡುಕೋಣೆ ಸ್ಕ್ರೀನ್ ಶೇರ್ ಮಾಡಿರುವ 'ಫೈಟರ್' ಸಿನಿಮಾ ಮುಂದಿನ ಗಣರಾಜ್ಯೋತ್ಸವ ಸಂದರ್ಭ ತೆರೆಕಾಣಲು ಸಜ್ಜಾಗಿದೆ. ಕೆಲ ದಿನಗಳ ಹಿಂದಷ್ಟೇ ಚಿತ್ರ ನಿರ್ಮಾಪಕರು 'ಶೇರ್ ಖುಲ್ ಗಯೇ' ಎಂಬ ಸಿನಿಮಾದ ಮೊದಲ ಹಾಡನ್ನು ಬಿಡುಗಡೆ ಮಾಡಿದ್ದರು. ಈ ಪಾರ್ಟಿ ಸಾಂಗ್ಗೆ ಫ್ಯಾನ್ಸ್ ಹುಚ್ಚೆದ್ದು ಕುಣಿದಿದ್ದಾರೆ. ಇದೀಗ ಈ ಹಾಡಿನ ಚಿತ್ರೀಕರಣದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ಸದ್ದು ಮಾಡುತ್ತಿದೆ.
'ಫೈಟರ್' ಸಿನಿಮಾದ ನೃತ್ಯ ಸಂಯೋಜಕ ಬಾಸ್ಕೊ ಮಾರ್ಟಿಸ್ ಅವರು ಹೃತಿಕ್ ರೋಷನ್ ಮತ್ತು ತಂಡದೊಂದಿಗೆ ಸೆರೆಹಿಡಿದ ಕೆಲ ಕ್ಷಣಗಳನ್ನು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದಾರೆ. ಇದು ಪಾರ್ಟಿ ಸಾಂಗ್ನ ಶೂಟಿಂಗ್ ಸಂದರ್ಭದ್ದಾಗಿದೆ. 'ಹೃತಿಕ್ ರೋಷನ್ ಮತ್ತು ನನ್ನ ತಂಡದ ಸದಸ್ಯರಾದ ಸಿದ್ಧಾರ್ಥ್ ಆನಂದ್, ಸಚಿತ್ ಪೌಲೋಸ್, ರಜತ್ ಪೊಡ್ಡಾರ್ ಅವರೊಂದಿಗೆ 'ಶೇರ್ ಖುಲ್ ಗಯೇ'ನ ಕ್ಷಣವನ್ನು ಸೆರೆಹಿಡಿಯಲಾಗಿದೆ' ಎಂದು ಕ್ಯಾಪ್ಶನ್ ಕೊಟ್ಟಿದ್ದಾರೆ. ಚಿತ್ರೀಕರಣದ ವಿಡಿಯೋದಲ್ಲಿ ಹೃತಿಕ್ ರೋಷನ್ ಅವರು ಸಾಂಗ್ ಬೀಟ್‌ಗೆ ಅದ್ಭುತವಾಗಿ ಮೈ ಕುಣಿಸುತ್ತಿರೋದನ್ನು ಕಾಣಬಹುದು. ನೃತ್ಯ ಸಂಯೋಜಕರು ಸ್ಟಾರ್ ನಟ ಹೃತಿಕ್ ರೋಷನ್ ಜೊತೆಗೆ ಇಡೀ ತಂಡವನ್ನು ಹಾಡಿ ಹೊಗಳಿದ್ದಾರೆ.
ಚಿತ್ರದ ಪ್ರಮುಖ ಕಲಾವಿದರಾದ ಹೃತಿಕ್ ರೋಷನ್ ಮತ್ತು ದೀಪಿಕಾ ಪಡುಕೋಣೆ ನೃತ್ಯ ಸಂಯೋಜಕ ಬಾಸ್ಕೊ ಮಾರ್ಟಿಸ್ ಅವರೊಂದಿಗೆ 'ಶೇರ್ ಖುಲ್ ಗಯೇ' ಸೆಟ್‌ನಲ್ಲಿ ಕ್ಲಿಕ್ಕಿಸಿಕೊಂಡಿರುವ ಫೋಟೋ ಕೂಡ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದೆ. ನೃತ್ಯ ನಿರ್ದೇಶಕರು 'ಟೀಮ್ ಫೈಟರ್' ಎಂದು ಬರೆದಿರುವ ಚಿಕ್ಕ ಬೋರ್ಡ್ ಒಂದನ್ನು ತಮ್ಮ ಕೈಯಲ್ಲಿ ಹಿಡಿದಿರೋದನ್ನು ಈ ಫೋಟೋದಲ್ಲಿ ಕಾಣಬಹುದು. ಮೂವರೂ ನಗುತ್ತಾ ಕ್ಯಾಮರಾಗೆ ಪೋಸ್ ಕೊಟ್ಟಿದ್ದಾರೆ.