ನಾಲ್ಕು ವರ್ಷಗಳ ಬ್ರೇಕ್ ನಂತರ ಬಂದ ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ಆ್ಯಕ್ಷನ್ ಅವತಾರದ ಪಠಾಣ್ ಚಿತ್ರದ ಕ್ರೇಜ್ ಕಡಿಮೆ ಆಗಿಲ್ಲ. ಅವರ ಸ್ಟಾರ್ಡಮ್ ಹಿಂದಿ ಚಿತ್ರರಂಗದಲ್ಲಿ ಮತ್ತೊಮ್ಮೆ ಸದ್ದು ಮಾಡಿದೆ. ಬಾಲಿವುಡ್ ಬೇಡಿಕೆ ತಾರೆಯರಾದ ಶಾರುಖ್ ಖಾನ್, ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ ಮುಖ್ಯಭೂಮಿಕೆಯ ಮೆಗಾ ಬ್ಲಾಕ್ ಬಸ್ಟರ್ ಚಿತ್ರ 'ಪಠಾಣ್' ದೊಡ್ಡ ಇತಿಹಾಸ ಸೃಷ್ಟಿಸಿದೆ. 'ಪಠಾಣ್' ಚಿತ್ರವೀಗ 1,000 ಕೋಟಿ ಕ್ಲಬ್ ಸೇರಿದೆ. ಬಿಡುಗಡೆಯಾದ ಒಂದು ತಿಂಗಳ ಮೊದಲೇ ಚಿತ್ರ ಈ ಸಾಧನೆ ಮಾಡಿದೆ. 'ಪಠಾಣ್' 1000 ಕೋಟಿ ಕ್ಲಬ್ ಸೇರಿದ ಐದನೇ ಭಾರತೀಯ ಚಿತ್ರವಾಗಿದೆ. ಹಿಂದಿ ಸಿನಿಮಾ 'ದಂಗಲ್' ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ.
ಟಾಪ್ 5 ಸಿನಿಮಾಗಳು:2016ರಲ್ಲಿ ತೆರೆ ಕಂಡ ಮಿಸ್ಟರ್ ಪರ್ಫೆಕ್ಷನಿಸ್ಟ್ ಖ್ಯಾತಿಯ ಅಮೀರ್ ಖಾನ್ ಅಭಿನಯದ 'ದಂಗಲ್' ಭಾರತೀಯ ಚಿತ್ರರಂಗದಲ್ಲಿ ಈವರೆಗೆ ಅತಿ ಹೆಚ್ಚು ಗಳಿಕೆ ಮಾಡಿದ ಚಿತ್ರವಾಗಿದೆ. ಈ ಚಿತ್ರವು ವಿಶ್ವಾದ್ಯಂತ ಅತಿ ಹೆಚ್ಚು ಕಲೆಕ್ಷನ್ (2,023.81 ಕೋಟಿ ರೂ.) ಮಾಡಿದೆ. ಇದಾದ ನಂತರ ಸೌತ್ ಸೂಪರ್ ಸ್ಟಾರ್ ಪ್ರಭಾಸ್ ನಟನೆಯ ಬಾಹುಬಲಿ-2 (1,810.59 ಕೋಟಿ ರೂ.), ಕನ್ನಡದ ರಾಕಿಂಗ್ ಸ್ಟಾರ್ ಕೆಜಿಎಫ್-2 (1,235.20 ಕೋಟಿ ರೂ.), ಜೂ. ಎನ್ಟಿಆರ್, ರಾಮ್ಚರಣ್ ಅಭಿನಯದ 'ಆರ್ಆರ್ಆರ್' (1,169 ಕೋಟಿ ರೂ.) ವಿಶ್ವದಾದ್ಯಂತ ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಮಟ್ಟದ ಕಲೆಕ್ಷನ್ ಮಾಡಿರುವ ಚಿತ್ರವಾಗಿದೆ.
ಇದೀಗ ಶಾರುಖ್ ಖಾನ್ ಅಭಿನಯದ 'ಪಠಾಣ್' ಚಿತ್ರ ಕೂಡ ಈ 1,000 ಕೋಟಿ ಕ್ಲಬ್ ಸೇರಿದೆ. ಮಾಧ್ಯಮ ವರದಿಗಳ ಪ್ರಕಾರ, ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ 1,000 ಕೋಟಿ ಗಡಿ ದಾಟಿದೆ. ಯಶ್ ರಾಜ್ ಫಿಲ್ಮ್ಸ್ ನಿನ್ನೆ ಹಂಚಿಕೊಂಡ ಮಾಹಿತಿಯಂತೆ (ಮೊನ್ನೆವರೆಗಿನ ಕಲೆಕ್ಷನ್) ಚಿತ್ರ 996 ಕೋಟಿ ರೂಪಾಯಿ ಗಳಿಸಿದೆ. ಇಂದಿನ ಅಧಿಕೃತ ಮಾಹಿತಿ ಇನ್ನಷ್ಟೇ ಹಂಚಿಕೊಳ್ಳಬೇಕಿದೆ.