ಇಂಡಿಯನ್ ಸೂಪರ್ ಸ್ಟಾರ್ ಶಾರುಖ್ ಖಾನ್ ಮತ್ತೊಮ್ಮೆ ದಾಖಲೆ ಸೃಷ್ಟಿಸಲು ಸಜ್ಜಾಗಿದ್ದಾರೆ. ಪಠಾಣ್ ಬಳಿಕ ಬರುತ್ತಿರುವ ಆ್ಯಕ್ಷನ್ ಪ್ಯಾಕ್ಡ್ ಸಿನಿಮಾ ಜವಾನ್. ಬಿಡುಗಡೆ ಹೊಸ್ತಿಲ್ಲಿರುವ ಜವಾನ್ ಸಿನಿಮಾದ ಪ್ರೀ ರಿಲೀಸ್ ಈವೆಂಟ್ ಇಂದು ತಮಿಳುನಾಡಿನಲ್ಲಿ ನಡೆದಿದೆ. ಚೆನ್ನೈನ ಶ್ರೀ ಸಾಯಿರಾಮ್ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ನಡೆದ ಅದ್ಧೂರಿ ಕಾರ್ಯಕ್ರಮದಲ್ಲಿ ಅಟ್ಲೀ, ಶಾರುಖ್ ಖಾನ್, ಪ್ರಿಯಾಮಣಿ, ವಿಜಯ್ ಸೇತುಪತಿ, ಗಾಯಕ ಅನಿರುಧ್ ರವಿಚಂದರ್ ಸೇರಿದಂತೆ ಗಣ್ಯಾತಿಗಣ್ಯರು ಭಾಗವಹಿಸಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ಇವರ ವಿಡಿಯೋ, ಫೋಟೋಗಳು ಸದ್ದು ಮಾಡುತ್ತಿವೆ.
ಮೊದಲು ಚೆನ್ನೈನ ಶ್ರೀ ಸಾಯಿರಾಮ್ ಇಂಜಿನಿಯರಿಂಗ್ ಕಾಲೇಜಿನ ವೇದಿಕೆಯ ಫೋಟೋ, ವಿಡಿಯೋಗಳು ವೈರಲ್ ಆದವು. ಬಳಿಕ ಶಾರುಖ್ ಖಾನ್ ಎಂಟ್ರಿ ವಿಡಿಯೋಗಳು ಸದ್ದು ಮಾಡಿದವು. ಇದೀಗ ಪ್ರಿಯಾಮಣಿ, ವಿಜಯ್ ಸೇತುಪತಿ, ಗಾಯಕ ಅನಿರುಧ್ ರವಿಚಂದರ್ ಸೇರಿದಂತೆ ಹಲವರ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ಜಾಗ ಗಿಟ್ಟಿಸಿಕೊಂಡಿವೆ.
57ರ ಹರೆಯದ ಶಾರುಖ್ ಖಾನ್ ಸಖತ್ ಸ್ಟೈಲಿಶ್ ಆಗಿ ಕಾರ್ಯಕ್ರಮಕ್ಕೆ ಎಂಟ್ರಿ ಕೊಟ್ಟರು. ನಟನ ಎನರ್ಜಿ ಯುವಕರಿಗೆ ಸ್ಫೂರ್ತಿ ತುಂಬುವಂತಿತ್ತು. ಜವಾನ್ನಲ್ಲಿ ಖಳನಾಯಕನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿರುವ ವಿಜಯ್ ಸೇತುಪತಿ ಸಹ ಕಾರ್ಯಕ್ರಮಕ್ಕೆ ಆಗಮಿಸಿದರು. ಶಾರುಖ್ ಖಾನ್ ವೇದಿಕೆ ಬಳಿ ಬರುತ್ತಿದ್ದಂತೆ ದಕ್ಷಿಣ ಚಿತ್ರರಂಗದ ಪ್ರತಿಭಾನ್ವಿತ ನಟ ವಿಜಯ್ ಸೇತುಪತಿ ಮತ್ತು ಸಂಗೀತ ಸಂಯೋಜಕ - ಗಾಯಕ ಅನಿರುಧ್ ರವಿಚಂದರ್ ಅವರನ್ನು ಬಿಗಿದಪ್ಪಿ ಮಾತನಾಡಿಸಿದರು. ಬಳಿಕ ಚಿತ್ರತಂಡದವರನ್ನು ಮಾತನಾಡಿಸುತ್ತ ಮುನ್ನಡೆದರು.