ಭಾರತದ ಬಹುನಿರೀಕ್ಷಿತ, ಪೌರಾಣಿಕ ಕಥೆ ಆಧರಿಸಿದ 'ಶಾಕುಂತಲಂ' ಇಂದು ಅದ್ಧೂರಿಯಾಗಿ ತೆರೆಕಂಡಿದೆ. ಕವಿ ಕಾಳಿದಾಸರ 'ಶಾಕುಂತಲಂ'ನ ಪಾತ್ರಗಳಿಗೆ ದಕ್ಷಿಣದ ಸಮಂತಾ ರುತ್ ಪ್ರಭು, ದೇವ್ ಮೋಹನ್ ಜೀವ ತುಂಬಿದ್ದು ತೆಲುಗು, ಹಿಂದಿ, ತಮಿಳು, ಮಲಯಾಳಂ ಮತ್ತು ಕನ್ನಡ ಭಾಷೆಗಳಲ್ಲಿ ಚಿತ್ರ ತೆರೆಕಂಡಿದೆ. ಸಿನಿಮಾಗೆ ಪ್ರಶಂಸೆ ವ್ಯಕ್ತವಾಗುತ್ತಿದೆ. ಸಾಮಾಜಿಕ ಜಾಲತಾಣದಲ್ಲಿ ವೀಕ್ಷಕರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ. ಸ್ಟಾರ್ ಡೈರೆಕ್ಟರ್ಗಳು ಸಹ ಚಿತ್ರದ ಬಗ್ಗೆ ತಮ್ಮ ವಿಮರ್ಶೆ ಹಂಚಿಕೊಂಡಿದ್ದಾರೆ.
ಸಮಂತಾ ರುತ್ ಪ್ರಭು ಮತ್ತು ವರುಣ್ ಧವನ್ ತೆರೆ ಕಂಚಿಕೊಳ್ಳುತ್ತಿರುವ ಸ್ಪೈ ಥ್ರಿಲ್ಲರ್ ಸಿಟಾಡೆಲ್ (ಹಾಲಿವುಡ್ ಚಿತ್ರದ ಹಿಂದಿ ಆವೃತ್ತಿ) ಸೀರಿಸ್ ಅನ್ನು ರಾಜ್ ಮತ್ತು ಡಿಕೆ (Raj Nidimoru and Krishna D.K.) ಅವರು ನಿರ್ದೇಶಿಸುತ್ತಿದ್ದಾರೆ. ಸದ್ಯ ಅವರು 'ಶಾಕುಂತಲಂ'ನ ಸಮಂತಾ ಅವರ ನಟನೆಯನ್ನು ಶ್ಲಾಘಿಸಿದ್ದಾರೆ.
ನಿರ್ದೇಶಕರಾದ ರಾಜ್ ಮತ್ತು ಡಿಕೆ ಶಾಕುಂತಲಂ ವೀಕ್ಷಿಸಿ, ಸಾಮಾಜಿಕ ಜಾಲತಾಣದಲ್ಲಿ ಸಮಂತಾ ಅವರನ್ನು ಹಾಡಿ ಹೊಗಳಿದರು. ''ಮ್ಯಾಜಿಕಲ್ ಸೀನ್ಗಳು, ಉತ್ತಮ ಕಥೆ ಹೇಳುವಿಕೆ, ಈ ಸುಂದರ ಚಿತ್ರವು ಸಮಂತಾರ ಪ್ರದರ್ಶನವಾಗಿದೆ, ಕಾಳಿದಾಸರ ಮೇರುಕೃತಿಗೆ ಇದಕ್ಕಿಂತ (ಸಿನಿಮಾ, ಸಮಂತಾ ನಟನೆ) ಉತ್ತಮವಾದದ್ದು ಇರಲಾರದು. ಸಮಂತಾ ನೀವು ಮಾತ್ರ ಈ ಬೃಹತ್ ಮಹಾಕಾವ್ಯವನ್ನು ಇಷ್ಟು ಉತ್ತಮವಾಗಿ ಸಾಗಿಸಲು ಸಾಧ್ಯ. ಇಡೀ ತಂಡಕ್ಕೆ ಅಭಿನಂದನೆಗಳು, ನೋಡಲೇಬೇಕಾದ ಚಿತ್ರ'' ಎಂದು ಟ್ವೀಟ್ ಮಾಡಿದ್ದಾರೆ.
''ಸ್ಯಾಮ್ ಕಳೆದ ಕೆಲ ತಿಂಗಳುಗಳು ನಿಮಗೆ ಸುಲಭವಾಗಿರಲಿಲ್ಲ ಎಂಬುದು ಜಗತ್ತಿಗೆ ತಿಳಿದಿದೆ. ಆದರೂ ಇವೆಲ್ಲವನ್ನೂ ಸಾಧಿಸಲು ನೀವು ಇಚ್ಛಾಶಕ್ತಿ, ದೃಢತೆ ಮತ್ತು ಧೈರ್ಯದಿಂದಿದ್ರಿ. ನೀವು 'ಸಂಪೂರ್ಣ ಸೈನಿಕ' (total trooper). ಅಡೆತಡೆಗಳನ್ನು ಮೆಟ್ಟಿ ಜಯಿಸಿದ್ದೀರಿ. ದೇವರು ಆಶೀರ್ವದಿಸಲಿ, ದೃಢವಾಗಿರಿ ಮತ್ತು ಹೋರಾಟವನ್ನು ಮುಂದುವರಿಸಿ" ಎಂದು ಬರೆದಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಸಮಂತಾ ತಮ್ಮ ಇನ್ಸ್ಟಾ ಸ್ಟೋರಿಯಲ್ಲಿ"ಇದು ತುಂಬಾ ಸಿಹಿಯಾಗಿದೆ. ಧನ್ಯವಾದಗಳು ರಾಜ್ ಮತ್ತು ಡಿಕೆ" ಎಂದು ಬರೆದಿದ್ದಾರೆ.