'ಅರ್ಹಾ ಭವಿಷ್ಯದ ಸೂಪರ್ ​ಸ್ಟಾರ್': ಅಲ್ಲು ಅರ್ಜುನ್ ಪುತ್ರಿ ಬಗ್ಗೆ ಸಮಂತಾ ಗುಣಗಾನ

ಅಲ್ಲು ಅರ್ಜುನ್ ಮಗಳು ಅಲ್ಲು ಅರ್ಹಾ ಬಗ್ಗೆ ನಟಿ ಸಮಂತಾ ರುತ್ ಪ್ರಭು ಗುಣಗಾನ ಮಾಡಿದ್ದಾರೆ.

ಟಾಲಿವುಡ್​ ಬೆಡಗಿ ಸಮಂತಾ ರುತ್ ಪ್ರಭು ಅವರ ಮುಂಬರುವ ಚಿತ್ರ 'ಶಾಕುಂತಲಂ'. ಈ ಸಿನಿಮಾದಲ್ಲಿ ಸೌತ್​ ಸೂಪರ್​ ಸ್ಟಾರ್ ಅಲ್ಲು ಅರ್ಜುನ್ ಅವರ ಮಗಳು ಅಲ್ಲು ಅರ್ಹಾ ಸಹ ಅಭಿನಯಿಸಿದ್ದಾರೆ. ಇದು ಅಲ್ಲು ಅರ್ಹಾಳ ಚೊಚ್ಚಲ ಚಿತ್ರ.

ಶಾಕುಂತಲಂ ಪ್ರಚಾರದಲ್ಲಿ ಸಮಂತಾ ರುತ್ ಪ್ರಭು

ಸ್ಟಾರ್‌ಕಿಡ್‌ನ ಚೊಚ್ಚಲ ಪ್ರವೇಶದ ಬಗ್ಗೆ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿದೆ. ಅಲ್ಲು ಅರ್ಜುನ್ ಮತ್ತು ಅಲ್ಲು ಸ್ನೇಹಾ ರೆಡ್ಡಿ ಅವರ ಪುತ್ರಿ, 6 ವರ್ಷದ ಅಲ್ಲು ಅರ್ಹಾ ಜೊತೆಗೆ ಕೆಲಸ ಮಾಡಿದ ಬಗ್ಗೆ ಕೆಲವು ಆಸಕ್ತಿದಾಯಕ ಅವಲೋಕನಗಳನ್ನು ಹಂಚಿಕೊಂಡಿದ್ದಾರೆ 'ಶಾಕುಂತಲೆ' ಸಮಂತಾ ರುತ್ ಪ್ರಭು.

ಸಮಂತಾ ರುತ್ ಪ್ರಭು ಸದ್ಯ ಶಾಕುಂತಲಂ ಸಿನಿಮಾ ಪ್ರಚಾರದಲ್ಲಿ ನಿರತರಾಗಿದ್ದಾರೆ. ಸಂದರ್ಶನವೊಂದರಲ್ಲಿ ಅರ್ಹಾ ಬಗ್ಗೆ ಮಾತನಾಡಿದ್ದಾರೆ. ಅಲ್ಲು ಅರ್ಹಾ ನಿಜಕ್ಕೂ ಅದ್ಭುತ. ಭವಿಷ್ಯದ ಸೂಪರ್​ ಸ್ಟಾರ್. ಆತ್ಮವಿಶ್ವಾಸ ಹೆಚ್ಚಿದ್ದು, ಕಿಂಚಿತ್ತೂ ಭಯ ಆ ಮಗುವಲ್ಲಿರಲಿಲ್ಲ. ಚೊಚ್ಚಲ ಚಿತ್ರದ ಸೆಟ್‌ಗಳಲ್ಲಿ ಸುಮಾರು 200 ಸಿಬ್ಬಂದಿಯೊಂದಿಗೆ ಸಡಗರದಿಂದ, ಆರಾಮವಾಗಿ ಓಡಾಡಿಕೊಂಡಿದ್ದಳು ಎಂದು ಗುಣಗಾನ ಮಾಡಿದ್ದಾರೆ.

ಅಲ್ಲು ಅರ್ಹಾ ಮೇಲೆ ಮತ್ತಷ್ಟು ಮೆಚ್ಚುಗೆಯ ಮಳೆ ಸುರಿಸಿದ ಸಮಂತಾ, ಅರ್ಹಾ "ಹುಟ್ಟುವಾಗಲೇ ಸೂಪರ್​ ಸ್ಟಾರ್ ಆಗಿ ಹುಟ್ಟಿದ್ದಾಳೆ''. ಭವಿಷ್ಯದಲ್ಲಿ ಚಲನಚಿತ್ರರಂಗಕ್ಕೆ ಎಂಟ್ರಿ ಕೊಡಲು ನಿರ್ಧರಿಸಿದರೆ ಈ ಉದ್ಯಮದಲ್ಲಿ ಸಾಧನೆಗೈಯಲು ನಿರ್ಧರಿಸಿದರೆ ತಂದೆಯ ಹೆಸರು ಅಗತ್ಯ ಬೀಳುವುದಿಲ್ಲ ಎಂದು ತಮ್ಮ ವಿಶ್ವಾಸ ವ್ಯಕ್ತಪಡಿಸಿದರು. ಚಿತ್ರೀಕರಣದ ಎರಡನೇ ದಿನ ಅರ್ಹಾ ಯಾವುದೇ ತೊಂದರೆ, ದೂರುಗಳಿಲ್ಲದೇ 12 ಗಂಟೆ ಶಿಫ್ಟ್​ನಲ್ಲಿದ್ದಳು. ತನ್ನ ಅಭಿನಯದಿಂದ ಎಲ್ಲರನ್ನೂ ಮೆಚ್ಚಿಸಿದೆ ಆ ಮಗು ಎಂದು ಸಮಂತಾ ಹೇಳಿದರು.

ಇದನ್ನೂ ಓದಿ:ಸೀರೆಯಲ್ಲಿ ಸಮಂತಾ: 'ಶಾಕುಂತಲೆ'ಯ ಅಂದಕ್ಕೆ ಸರಿಸಾಟಿ ಯಾರು?

ನಟನೆ ಒಂದು ವಿಚಾರ ಆದರೆ, ಸಮಂತಾ ಅವರ ಮನಮುಟ್ಟಿದ್ದು ಆರ್ಹಾಳ ಭಾಷಾ ಜ್ಞಾನ. ಇಂಗ್ಲಿಷ್​​ನ ಒಂದು ಪದವನ್ನೂ ಮಾತನಾಡುವುದಿಲ್ಲ, ತೆಲುಗನ್ನು ನಿರರ್ಗಳವಾಗಿ ಮಾತನಾಡುತ್ತಾಳೆಂದು ಸಮಂತಾ ಹೇಳಿದ್ದಾರೆ. "ಹೈದರಾಬಾದ್‌ನ ಹೆಚ್ಚಿನ ವಯಸ್ಕರು ತೆಲುಗು ಭಾಷೆಯನ್ನು ಮಾತನಾಡುವುದಕ್ಕಿಂತ ಆರ್ಹಾ ಚೆನ್ನಾಗಿ ತೆಲುಗು ಮಾತನಾಡುತ್ತಾಳೆ" ಎಂದು ಸಮಂತಾ ಹೇಳಿದರು.

ಸಮಂತಾ ಮತ್ತು ಅಲ್ಲು ಅರ್ಜುನ್ 2015ರಲ್ಲಿ ತೆರೆಕಂಡ ಸನ್​ ಆಫ್ ಸತ್ಯಮೂರ್ತಿ ಚಿತ್ರದಲ್ಲಿ ತೆರೆ ಹಂಚಿಕೊಂಡಿದ್ದರು. ಬಳಿಕ 2021ರ ಕೊನೆಯಲ್ಲಿ ಬಿಡುಗಡೆ ಆದ ಪುಷ್ಟ ಚಿತ್ರದಲ್ಲಿ ಮತ್ತೆ ಒಂದಾದರು. ಊ ಅಂಟಾವಾ ಹಾಡಿಗೆ ಸಮಂತಾ ಸೊಂಟ ಬಳುಕಿಸಿದ್ದು, ಹಾಡು ಸೂಪರ್​ ಹಿಟ್ ಆಗಿದೆ.

ಇದನ್ನೂ ಓದಿ:ಪರಿಣಿತಿ ಚೋಪ್ರಾ-ರಾಘವ್​ ಚಡ್ಡಾ ಮದುವೆ ವಿಚಾರ: ಶುಭ ಕೋರಿದ ಸಂಸದ

ದೇವ ಮೋಹನ್​ ಜೊತೆಗೆ ಸಮಂತಾ ನಟಿಸಿರುವ ಬಹು ನಿರೀಕ್ಷಿತ ಚಿತ್ರ 'ಶಾಕುಂತಲಂ' ಏಪ್ರಿಲ್​ 14ರಂದು ತೆರೆಕಾಣಲು ಸಜ್ಜಾಗಿದೆ. ಸದ್ಯ ಈ ಸಿನಿಮಾ ಪ್ರಚಾರ ಕಾರ್ಯದಲ್ಲಿ ಚಿತ್ರತಂಡ ಬ್ಯುಸಿಯಾಗಿದೆ. ನಟಿ ಸಮಂತಾ ರುತ್​ ಪ್ರಭು ಸಹ ಇನ್​ಸ್ಟಾಗ್ರಾಮ್​ನಲ್ಲಿ ಹೊಸ ಫೋಟೋಗಳನ್ನು ಹಂಚಿಕೊಳ್ಳುವ ಮೂಲಕ ವಿಭಿನ್ನ ಪ್ರಚಾರ ಮಾಡುತ್ತಿದ್ದಾರೆ. ಅನಾರೋಗ್ಯ ಹಿನ್ನೆಲೆ ಅವರು ಕೆಲ ಸಮಯದವರೆಗೆ ಮಾಧ್ಯಮಗಳಿಂದ ದೂರ ಉಳಿದಿದ್ದರು. ಇದೀಗ 'ಶಾಕುಂತಲಂ' ಸಲುವಾಗಿ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ಸಕ್ರಿಯರಾಗಿದ್ದಾರೆ.