ಪಠಾಣ್ ಎಂಬ ಆ್ಯಕ್ಷನ್ ಸಿನಿಮಾ ಸೂಪರ್‌ಹಿಟ್ ಆದ ನಂತರ ಬಾಲಿವುಡ್ ಸೂಪರ್‌ಸ್ಟಾರ್ ಶಾರುಖ್ ಖಾನ್ ನಟಿಸುತ್ತಿರುವ ಮತ್ತೊಂದು ಚಿತ್ರವೇ 'ಜವಾನ್'. ದಕ್ಷಿಣ ಚಿತ್ರರಂಗದ ಯುವ ನಿರ್ದೇಶಕ ಅಟ್ಲೀ ನಿರ್ದೇಶನದಲ್ಲಿ ಸಿದ್ಧಗೊಳ್ಳುತ್ತಿರುವ ಜವಾನ್ ಬಿಡುಗಡೆಗೆ ಸಜ್ಜಾಗಿದ್ದು, ಎಸ್ಆರ್ಕೆ ಬಿಗ್ ಸ್ಕ್ರೀನ್ಗೆ ಮರಳಲು ಸಿದ್ಧರಾಗಿದ್ದಾರೆ. ಜುಲೈ 10ರಂದು ಜವಾನ್ ಪ್ರಿವ್ಯೂ ಅನಾವರಣಗೊಂಡ ನಂತರ ಇಂಡಿಯನ್ ಸೂಪರ್‌ ಸ್ಟಾರ್ ಎಸ್ಆರ್ಕೆ ಸಾಮಾಜಿಕ ಮಾಧ್ಯಮದಲ್ಲಿ ಟ್ರೆಂಡಿಂಗ್ ಆಗಿದ್ದಾರೆ.
ಜವಾನ್ ವಿಡಿಯೋಗೆ ಅಭಿಮಾನಿಗಳು, ನೆಟಿಜನ್‌ಗಳು ಸೇರಿದಂತೆ ಚಿತ್ರರಂಗದವರೂ ಪ್ರತಿಕ್ರಿಯಿಸಿದ್ದಾರೆ. ಸೂಪರ್‌ಸ್ಟಾರ್ ಸಲ್ಮಾನ್ ಖಾನ್ ಸಹ ಈ ವಿಚಾರದಲ್ಲಿ ಹಿಂದೆ ಬಿದ್ದಿಲ್ಲ. ಸಲ್ಮಾನ್ ಖಾನ್ ಮಂಗಳವಾರ ಸಾಮಾಜಿಕ ಜಾಲತಾಣದಲ್ಲಿ ಜವಾನ್ ವಿಡಿಯೋ ಹಂಚಿಕೊಂಡು ಕಿಂಗ್ ಖಾನ್ ಸೇರಿದಂತೆ ಚಿತ್ರತಂಡವನ್ನು ಹೊಗಳಿದ್ದಾರೆ. ಇತ್ತ, ಶಾರುಖ್ ಸಹ ಸಲ್ಮಾನ್ ಅವರ ಪೋಸ್ಟ್ಗೆ ಪ್ರತಿಕ್ರಿಯಿಸಿ, ಸಲ್ಮಾನ್ ಅವರಿಗೇನೇ ಮೊದಲು ಪ್ರಿವ್ಯೂ ತೋರಿಸಿರುವುದಾಗಿ ಹೇಳಿದ್ದಾರೆ.
ಸಲ್ಮಾನ್ ಖಾನ್ ಟ್ವೀಟ್:ಸಲ್ಮಾನ್ ಖಾನ್ ವಿಡಿಯೋ ಪೋಸ್ಟ್ ಮಾಡುವ ಮೂಲಕ ಕಿಂಗ್ ಖಾನ್ ಜವಾನ್ ಆಗಿ ಕಾಣಿಸಿಕೊಂಡಿರವುದಕ್ಕೆ ಸಂತಸ ವ್ಯಕ್ತಪಡಿಸಿದ್ದರು. ಇದೇ ವೇಳೆ, ಜವಾನ್ ಸಿನಿಮಾವನ್ನು ಮೊದಲ ದಿನದಂದು ವೀಕ್ಷಿಸುವುದಾಗಿಯೂ ತಿಳಿಸಿದ್ದರು. "ಪಠಾಣ್ ಜವಾನ್ ಆಗಿಬಿಟ್ರು, ಇದೊಂದು ಅತ್ಯುತ್ತಮ ಟ್ರೇಲರ್, ನನಗೆ ಬಹಳ ಇಷ್ಟವಾಯಿತು. ನಾವು ಚಿತ್ರಮಂದಿರಗಳಲ್ಲೇ ನೋಡಬೇಕಾದ ಚಲನಚಿತ್ರವಿದು. ನಾನು ಸಿನಿಮಾವನ್ನು ತೆರೆಕಂಡ ಮೊದಲ ದಿನವೇ ನೋಡುತ್ತೇನೆ" ಎಂದು ಸಲ್ಮಾನ್ ಖಾನ್ ಟ್ವೀಟ್ ಮಾಡಿದ್ದರು.