'ರಾಕಿಂಗ್ ಸ್ಟಾರ್ ಯಶ್' ವಿಶೇಷ ಪರಿಚಯ ಬೇಕೆನಿಸದು. ಕೆಜಿಎಫ್ ಎಂಬ ಒಂದೇ ಒಂದು ಹೆಸರು ಸಾಕಲ್ಲವೇ. ಮಾಡಿದ್ದು 18 ಸಿನಿಮಾ. ಆದರೆ ಸಂಪಾದಿಸಿದ ಜನಪ್ರಿಯತೆ ಅಳೆಯಲಾಗದಷ್ಟು. 'ಸ್ವಯಂ ನಿರ್ಮಿತ ನಟ' ಖ್ಯಾತಿಯ ಯಶ್ ಅವರ ಅಮೋಘ ಅಭಿನಯ ಅಪಾರ ಸಂಖ್ಯೆಯ ಸಿನಿಪ್ರಿಯರ ಮನ ಗೆದ್ದಿದೆ. ಜನಪ್ರಿಯತೆ ಜೊತೆಗೆ, ಅಭಿಮಾನಿಗಳ ಸಂಖ್ಯೆಯೂ ಹೆಚ್ಚಿದೆ.
'Yash19' ಪ್ರಾಜೆಕ್ಟ್ ಘೋಷಣೆ: ಹೀಗೆ ಸದಾ ಸುದ್ದಿಯಲ್ಲಿರುವ ನಟನ ಮುಂದಿನ ಸಿನಿಮಾ ಮೇಲೆ ಶಿಖರದಷ್ಟು ನಿರೀಕ್ಷೆಗಳಿವೆ. ಬ್ಲಾಕ್ಬಸ್ಟರ್ ಕೆಜಿಎಫ್ 2 ಸಿನಿಮಾ ಬಂದು ಒಂದೂವರೆ ವರ್ಷ ಕಳೆದರೂ ನಟನ ಮುಂದಿನ ಸಿನಿಮಾ ಬಗ್ಗೆ ಯಾವುದೇ ಸುಳಿವಿರಲಿಲ್ಲ. ಮೂರ್ನಾಲ್ಕು ದಿನಗಳ ಹಿಂದಷ್ಟೇ ತಮ್ಮ ಮುಂದಿನ ಸಿನಿಮಾ ಘೋಷಿಸುವುದಾಗಿ ಸ್ವತಃ ಕೆಜಿಎಫ್ ಸ್ಟಾರ್ ಯಶ್ ಘೋಷಿಸಿದ್ದರು. ಕೊಟ್ಟ ಮಾತಿನಂತೆ ಇಂದು ಬಹುನಿರೀಕ್ಷಿತ 'Yash19' ಪ್ರಾಜೆಕ್ಟ್ ಘೋಷಣೆ ಆಗಿದೆ.
TOXIC........ ನಟ ಯಶ್ ಕನ್ನಡ ಚಿತ್ರರಂಗದ ಖ್ಯಾತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಕೆವಿಎನ್ ಜೊತೆ ಕೈ ಜೋಡಿಸಿದ್ದು, ಇಂದು ಸಿನಿಮಾ ಘೋಷಣೆ ಆಗಿದೆ. 'TOXIC' ನಟನ ಮುಂದಿನ ಸಿನಿಮಾದ ಶೀರ್ಷಿಕೆ.
ಇದನ್ನೂ ಓದಿ:ವಿದೇಶದಲ್ಲಿ ತೆರೆಕಂಡು ದಾಖಲೆ ಬರೆದ ಕೊಂಕಣಿ ಸಿನಿಮಾ 'ಅಸ್ಮಿತಾಯ್'
ಕೆಜಿಎಫ್ ಸ್ಟಾರ್ ಯಶ್ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಚಿತ್ರದ ನಿರ್ಮಾಪಕರು ಶೀರ್ಷಿಕೆಯನ್ನು ಅನಾವರಣಗೊಳಿಸಿದ್ದಾರೆ. ಈ ಮೊದಲೇ ಅಂದಾಜಿಸಿದಂತೆ ಗೀತು ಮೋಹನ್‌ದಾಸ್ ಯಶ್ ನಟನೆಯ 19ನೇ ಸಿನಿಮಾಗೆ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ. ಈವರೆಗೆ ಯಶ್ 19 ಎಂದು ಹೆಸರಿಸಲಾಗುತ್ತಿದ್ದ ಕೆಜಿಎಫ್ ಸ್ಟಾರ್ನ ಸಿನಿಮಾದ ಅಧಿಕೃತ ಶೀರ್ಷಿಕೆ ಟಾಕ್ಸಿಕ್. ಕೆವಿಎನ್ ಪ್ರೊಡಕ್ಷನ್ ಅಡಿ ವೆಂಕಟ್ ಕೆ ನಾರಾಯಣ ಅವರು ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.
ಯಶ್ ಪೋಸ್ಟ್: ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ಗಳಲ್ಲಿ ಟೈಟಲ್ ಅನೌನ್ಸ್ಮೆಂಟ್ ವಿಡಿಯೋ ಅನಾವರಣಗೊಂಡಿದೆ. ಸ್ವತಃ ಯಶ್ ಅವರೇ ತಮ್ಮ ಸಾಮಾಜಿಕ ಮಾಧ್ಯಮಗಳಲ್ಲಿ ಅನೌನ್ಸ್ಮೆಂಟ್ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಜೊತೆಗೆ "'ನೀವು ಹುಡುಕುತ್ತಿರುವುದು ನಿಮ್ಮನ್ನು ಹುಡುಕುತ್ತಿದೆ' - ರೂಮಿ. ಎ ಫೇರಿ ಟೇಲ್ ಫಾರ್ ಗ್ರೋನ್ ಅಪ್ಸ್ , ಟಾಕ್ಸಿಕ್" ಎಂದು ಬರೆದುಕೊಂಡಿದ್ದಾರೆ. ಸದ್ಯ ಅನೌನ್ಸ್ಮೆಂಟ್ ವಿಡಿಯೋ ನೋಡುತ್ತಿದ್ರೆ ಇದೊಂದು ಈ ಹಿಂದಿನ ಕೆಜಿಎಫ್ ಸರಣಿಗಳಂತೆ ಮಾಸ್ ಆ್ಯಕ್ಷನ್ ಸಿನಿಮಾ ಎಂಬುದು ಬಹುತೇಕ ಪಕ್ಕಾ ಆಗಿದೆ.
ಇದನ್ನೂ ಓದಿ:ಕೆಜಿಎಫ್ ಸ್ಟಾರ್ ಸಿನಿಮಾ ಮೇಲೆ ಬೆಟ್ಟದಷ್ಟು ನಿರೀಕ್ಷೆ; 'ಯಶ್ 19' ಅನೌನ್ಸ್ಮೆಂಟ್ಗೆ ಕಾತರ
ಉಳಿದಂತೆ ಕೆಜಿಎಫ್ 3 ಬಗ್ಗೆ ಸೋಷಿಯಲ್ ಮೀಡಿಯಾಗಳಲ್ಲಿ ಸಾಕಷ್ಟು ಚರ್ಚೆ ಆಗುತ್ತಿದೆ. 2025ರಲ್ಲಿ ಸಿನಿಮಾ ತೆರೆಕಾಣಲಿದ್ದು, ಶೀಘ್ರದಲ್ಲೇ ಶೂಟಿಂಗ್ ಆರಂಭವಾಗಲಿದೆ ಎಂದು ಹೇಳಲಾಗುತ್ತಿದೆ. ಇನ್ನೂ ನಿತೇಶ್ ತಿವಾರಿ ಅವರ ಬಾಲಿವುಡ್ ರಾಮಾಯಣ ಸಿನಿಮಾದಲ್ಲೂ ಯಶ್ ಹೆಸರು ಕೇಳಿಬರುತ್ತಿದೆ. ಎಲ್ಲದಕ್ಕೂ ಅಧಿಕೃತ ಘೋಷಣೆ ನಿರೀಕ್ಷಿಸಲಾಗಿದೆ.
