'ಓ...' ಎನ್ನುವುದು ಬರೀ ಶಬ್ದವಲ್ಲ, ಅದೊಂದು ನಂಬಿಕೆ; ಅಪಹಾಸ್ಯ ಮಾಡದಂತೆ ರಿಷಬ್ ಶೆಟ್ಟಿ ಮನವಿ

ಕಾಂತಾರ ಚಿತ್ರದ ನಾಯಕ ನಟ ಹಾಗೂ ನಿರ್ದೇಶಕ ರಿಷಬ್ ಶೆಟ್ಟಿ ಪ್ರೇಕ್ಷಕರಲ್ಲಿ ಒಂದು ವಿನಂತಿ ಮಾಡಿದ್ದಾರೆ.

‘ಕಾಂತಾರ’ ಚಿತ್ರದಲ್ಲಿ ತೋರಿಸಿದಂತೆ ಅನುಕರಿಸುವ ಪ್ರೇಕ್ಷಕರಿಗೆ ನಟ ರಿಷಬ್ ಶೆಟ್ಟಿ ವಿಶೇಷ ಮನವಿಯೊಂದನ್ನು ಮಾಡಿಕೊಂಡಿದ್ದಾರೆ. ನಟನ ಮೈಮೇಲೆ ಬರುವ ದೈವದ ಸನ್ನಿವೇಶವನ್ನು ಚಿತ್ರದಲ್ಲಿ ತೋರಿಸಲಾಗಿದೆ. ಸಿನಿಮಾ ನೋಡಿದ ಪ್ರೇಕ್ಷಕರು ಅದರಂತೆ ಆಡುತ್ತಿದ್ದಾರೆ ಎಂಬ ಕೆಲವು ವರ್ತಮಾನಗಳಿಗೆ ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

‘ಕಾಂತಾರ’ ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದು ವ್ಯಾಪಕ ಜನಪ್ರಿಯತೆ ಗಳಿಸಿಕೊಳ್ಳುತ್ತಿದೆ. ಆರಂಭದಲ್ಲಿ ಕನ್ನಡದಲ್ಲಿ ಮಾತ್ರ ತೆರೆಕಂಡಿದ್ದು ಬಳಿಕ ಹಿಂದಿ, ತೆಲುಗು, ತಮಿಳು ಮತ್ತು ಮಲಯಾಳಂನಲ್ಲಿ ಬಿಡುಗಡೆಗೊಂಡಿದೆ. ಚಿಕ್ಕ ಬಜೆಟ್​​ನಲ್ಲಿ ನಿರ್ಮಾಣವಾದ ಚಿತ್ರ ಕಲೆಕ್ಷನ್​ ವಿಚಾರದಲ್ಲಿ ಹಲವು ದಾಖಲೆಗಳನ್ನೇ ಬರೆದಿದೆ.

ಕಾಂತಾರ ಚಿತ್ರದ ಪೋಸ್ಟರ್​

ಸದ್ಯ ಚಿತ್ರದ ಪ್ರಚಾರದಲ್ಲಿ ತೊಡಗಿರುವ ರಿಷಬ್ ಶೆಟ್ಟಿ, ಸಿನಿಮಾ ನೋಡಿದ ಪ್ರೇಕ್ಷಕರು ಮೈಮೇಲೆ ದೇವರು ಬಂದಂತೆ ಮಾಡುತ್ತಿರುವ ಬಗ್ಗೆಯೂ ಪ್ರತಿಕ್ರಿಯೆ ನೀಡಿದ್ದಾರೆ. ತುಳುನಾಡು ಮತ್ತು ಕರ್ನಾಟಕದ ಸಂಪ್ರದಾಯಗಳನ್ನು ಆಧರಿಸಿದ ಚಿತ್ರದಲ್ಲಿ ಭೂತಾರಾಧನೆಯನ್ನು ತೋರಿಸಲಾಗಿದೆ. ಅಲ್ಲಿ ಬಳಸಲಾದ ಸನ್ನಿವೇಶ ಮತ್ತು ಶಬ್ದಗಳನ್ನು ಅನುಕರಿಸಬೇಡಿ ಎಂದು ತಿಳಿಸಿದ್ದಾರೆ.

ಕೋಲ ಆಡುವವರು 'ಓ...' ಎಂದು ಸದ್ದು ಮಾಡುವುದನ್ನು ಚಿತ್ರದಲ್ಲಿ ಕಟ್ಟಿಕೊಡಲಾಗಿದೆ. ಸಿನಿಮಾ ನೋಡಿದ ಅದೆಷ್ಟೋ ಜನ 'ಓ...' ಎಂದು ಕೂಗುವ ಮೂಲಕ ಅಪಹಾಸ್ಯ ಮಾಡಲು ಆರಂಭಿಸಿದ್ದಾರೆ. ಕೆಲವು ಪ್ರೇಕ್ಷಕರಂತೂ ಕುಳಿತ ಜಾಗದಲ್ಲೇ ಥಿಯೇಟರ್ ನಡುಗುವಂತೆ ಅನುಕರಣೆ ಮಾಡುತ್ತಿದ್ದಾರೆ.

ಇನ್ನೂ ಕೆಲವರು ಚಿತ್ರ ನೋಡಿದ ಬಳಿಕ ಮೈಮೇಲೆ ದೇವರು ಬಂದಂತೆ ಆಡುತ್ತಿದ್ದಾರೆ. ಇದು ಸಿನಿಮಾ ಮೇಲಿನ ಪ್ರೀತಿಯೋ ಅಥವಾ ಖುಷಿಯೋ ಏನೋ ಗೊತ್ತಿಲ್ಲ. ಈ ರೀತಿಯ ವರ್ತಮಾನಗಳನ್ನು ಗಮನಿಸಿದ ರಿಷಬ್ ಶೆಟ್ಟಿ ಯಾರೂ ಆ ರೀತಿ ಮಾಡದಂತೆ ಕೇಳಿಕೊಂಡಿದ್ದಾರೆ.

'ಓ...' ಎನ್ನುವುದು ಬರೀ ಶಬ್ದವಲ್ಲ. ಕೋಲ ಆಡುವವರಿಗೆ ಅದೊಂದು ಸೆಂಟಿಮೆಂಟ್. ಕಾಂತಾರವನ್ನು ವೀಕ್ಷಿಸಿದ ಎಲ್ಲ ಪ್ರೇಕ್ಷಕರಿಗೆ ನನ್ನದೊಂದು ವಿನಂತಿ. ಚಿತ್ರದಲ್ಲಿ ಬಳಸಲಾದ ಶಬ್ದಗಳನ್ನು ಯಾರೂ ಅನುಕರಿಸಬೇಡಿ. ಇದೊಂದು ಆಚರಣೆ. ಒಂದು ಸಮುದಾಯದ ನಂಬಿಕೆ. ಅಲ್ಲದೆ, ತುಂಬಾ ಸೂಕ್ಷ್ಮ ವಿಷಯವೂ ಹೌದು. ಇದರಿಂದ ಯಾವುದೋ ಒಂದು ಸಮುದಾಯಕ್ಕೆ ಹಾನಿಯಾಗಬಹುದು ಎಂದು ಹೇಳಿದ್ದಾರೆ.

ಇದನ್ನೂ ಓದಿ:'ವಾವ್ ರಿಷಬ್ ಶೆಟ್ಟಿ, ಹ್ಯಾಟ್ಸ್ ಆಫ್​! ಸಿನಿಮಾ ಅಂದ್ರೆ ಕಾಂತಾರ': ಕಂಗನಾ ಗುಣಗಾನ