ಸೋಷಿಯಲ್ ಮೀಡಿಯಾದಲ್ಲೀಗ 'ಡಾನ್'ನದ್ದೇ ಹವಾ. ನಿನ್ನೆಯಷ್ಟೇ ನಿರ್ದೇಶಕ ಫರ್ಹಾನ್ ಅಖ್ತರ್ ಡಾನ್ 3 ಸಿನಿಮಾ ಘೋಷಿಸಿ ಸಿನಿರಸಿಕರಿಗೆ ಸಿಹಿ ಹಂಚಿದ್ದರು. ಇಂದು ನಾಯಕ ನಟನ ಸ್ಪೆಷಲ್ ವಿಡಿಯೋ ಶೇರ್ ಮಾಡಿ ಪ್ರೇಕ್ಷಕರಿಗೆ ಭರ್ಜರಿ ಪಾರ್ಟಿ ಕೊಟ್ಟಿದ್ದಾರೆ.
ಮುಂದಿನ ಡಾನ್ ರಣ್ವೀರ್ ಸಿಂಗ್:ಅಂದುಕೊಂಡಂತೆ ಮುಂದಿನ ಡಾನ್ ಆಗಿ ಬಹುಬೇಡಿಕೆ ನಟಿ ದೀಪಿಕಾ ಪಡಕೋಣೆ ಅವರ ಪತಿ, ಸೂಪರ್ ಸ್ಟಾರ್ ರಣ್ವೀರ್ ಸಿಂಗ್ ದರ್ಶನ ಕೊಡಲಿದ್ದಾರೆ. ಇಂದು ಚಿತ್ರತಂಡ ಶೇರ್ ಮಾಡಿರುವ ನಾಯಕ ನಟನ ಇಂಟ್ರೂಡಕ್ಷನ್ ವಿಡಿಯೋ ಅದ್ಭುತವಾಗಿದೆ. ಈ ಮೊದಲು ಡಾನ್ 3 ಸಿನಿಮಾದಲ್ಲಿ ರಣ್ವೀರ್ ಕಾಣಿಸಿಕೊಳ್ಳುತ್ತಾರೆ ಎಂದು ಹೇಳಲಾಗಿತ್ತು. ಇನ್ನು, ಮೊದಲೆರಡು ಭಾಗಗಳಲ್ಲಿದ್ದ ಕಿಂಗ್ ಖಾನ್ ಶಾರುಖ್ ಮುಂದಿನ ಭಾಗದಲ್ಲಿಲ್ಲ ಎಂದು ಅಭಿಮಾನಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ.
ರಣ್ವೀರ್ ಸಿಂಗ್ ಫಸ್ಟ್ ಲುಕ್ ವಿಡಿಯೋ:ಫರ್ಹಾನ್ ಅಖ್ತರ್ ಅವರ ಆ್ಯಕ್ಷನ್ ಡ್ರಾಮಾ ಡಾನ್ 3ಗಾಗಿ ಪ್ರೇಕ್ಷಕರು ಬಹಳ ಸಮಯದಿಂದ ಕಾದು ಕುಳಿತಿದ್ದರು. ನಿನ್ನೆ ಸಿನಿಮಾ, ಇಂದು ನಾಯಕ ನಟನ ಘೋಷಣೆ ಆಗಿದೆ. ಫರ್ಹಾನ್ ಅಖ್ತರ್ ಮತ್ತು ಅವರ ಆಪ್ತ ಸ್ನೇಹಿತ ರಿತೇಶ್ ಸಿಧ್ವಾನಿ ಜೊತೆಗೂಡಿ ಸ್ಥಾಪಿಸಿರುವ ಸಿನಿಮಾ ಪ್ರೊಡಕ್ಷನ್ ಬ್ಯಾನರ್ ಎಕ್ಸೆಲ್ ಎಂಟರ್ಟೈನ್ಮೆಂಟ್ ಸಿನಿಮಾ ಮತ್ತು ನಾಯಕನನ್ನು ಘೋಷಿಸಿದೆ. ಇಂದು ರಣ್ವೀರ್ ಸಿಂಗ್ ಅವರ ಕುತೂಹಲಕಾರಿ ಫಸ್ಟ್ ಲುಕ್ ವಿಡಿಯೋವನ್ನು ಹಂಚಿಕೊಂಡಿದೆ.