ಸೌತ್ ಸೂಪರ್ ಸ್ಟಾರ್ ರಾಮ್ ಚರಣ್ ಮನೆಯಲ್ಲೀಗ ಸಂತಸದ ವಾತಾವರಣ. ರಾಮ್ ಚರಣ್ ಮತ್ತು ಉಪಾಸನಾ ದಂಪತಿ ಮದುವೆಯಾದ 11 ವರ್ಷಗಳ ಬಳಿಕ ಪೋಷಕರಾಗಿ ಭಡ್ತಿ ಪಡೆದಿದ್ದಾರೆ. ಜೂನ್ 20ರಂದು ಮೆಗಾಸ್ಟಾರ್ ಚಿರಂಜೀವಿ ಕುಟುಂಬಕ್ಕೆ ಅದೃಷ್ಟ ಲಕ್ಷ್ಮಿ ಎಂಟ್ರಿ ಕೊಟ್ಟಿದ್ದಾಳೆ. ಇಂದು ರಾಮ್ ಚರಣ್ ತಮ್ಮ ಪತ್ನಿ ಉಪಾಸನಾ ಅವರನ್ನು ಹೈದರಾಬಾದ್‌ನ ಅಪೋಲೋ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಿಸಿ ಮನೆಗೆ ಕರೆದೊಯ್ದರು. ಅದಕ್ಕೂ ಮುನ್ನ ಮಾಧ್ಯಮಗಳೊಂದಿಗೆ ಮಾತನಾಡಿ, ಮಗಳಿಗೆ ಆಶೀರ್ವದಿಸಿದ ಸರ್ವರಿಗೂ ಧನ್ಯವಾದ ಸಲ್ಲಿಸಿದರು.
ಮಾಧ್ಯಮದವರೊಂದಿಗೆ ಮಾತನಾಡಿದ ರಾಮ್ ಚರಣ್, ತಮ್ಮಲ್ಲಿ ಅಡಗಿರುವ ಸಂತಸವನ್ನು ವ್ಯಕ್ತಪಡಿಸಿದರು. ಮಾತುಗಳೇ ಹೊರಡುತ್ತಿಲ್ಲ, ಏನನ್ನೂ ಹೇಳಲು ಸಾಧ್ಯವಾಗುತ್ತಿಲ್ಲ. ಈ ಖುಷಿಯನ್ನು ವ್ಯಕ್ತಪಡಿಸಲು ನನ್ನಲ್ಲಿ ಪದಗಳಿಲ್ಲ ಎಂದರು. ಮಗು ಯಾರನ್ನು ಹೋಲುತ್ತದೆ ಎಂಬ ಪ್ರಶ್ನೆಗೆ ಸುಂದರವಾಗಿ ಪ್ರತಿಕ್ರಿಯಿಸಿದ ನಟ, ತಂದೆ ತಾಯಿ ಇಬ್ಬರಂತೆ ಕಾಣುತ್ತದೆ ಎಂದು ತಿಳಿಸಿದರು.
ನನ್ನ ತಂದೆಗೆ ಹೆಚ್ಚು ಸಂತೋಷವಾಗಿದೆ: ಈ ಬಗ್ಗೆ ಮನೆಯಲ್ಲಿ ಯಾರು ಹೆಚ್ಚು ಸಂತೋಷ ಪಡುತ್ತಾರೆ ಎಂದು ಕೇಳಿದಾಗ?, ಮಗಳ ಜನನದಿಂದ ಇಡೀ ಕುಟುಂಬ ಮತ್ತು ಸಂಬಂಧಿಕರು ಸಂತೋಷ ಪಟ್ಟಿದ್ದಾರೆ. ಎಲ್ಲಕ್ಕಿಂತ ಹೆಚ್ಚಾಗಿ ನನ್ನ ತಂದೆ ಹೆಚ್ಚು ಸಂತೋಷಪಟ್ಟಿದ್ದಾರೆ. ನನಗಿಂತ ನನ್ನ ತಂದೆ ತಾಯಿಗೆ ಹೆಚ್ಚು ಖುಷಿಯಾಗಿದೆ. ನನ್ನ ಪೋಷಕರು ಅಜ್ಜ ಅಜ್ಜಿ ಆಗುತ್ತಿರುವ ಖುಷಿಯನ್ನು ಹೇಳಿಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ತಿಳಿಸಿದರು.
ಶೀಘ್ರದಲ್ಲೇ ಪುತ್ರಿಯ ಹೆಸರು ಪ್ರಕಟ: ಶೀಘ್ರದಲ್ಲೇ ತಮ್ಮ ಮಗಳ ಹೆಸರನ್ನು ತಿಳಿಸಲಾಗುವುದು. ಪುತ್ರಿಯ ಹೆಸರು ಆದಷ್ಟು ಬೇಗ ಅಭಿಮಾನಿಗಳ ನಡುವೆ ಇರಲಿದೆ. ಶುಭ ಕೋರಿದ, ಆಶೀರ್ವದಿಸಿದ ಸರ್ವರಿಗೂ ತುಂಬು ಹೃದಯದ ಧನ್ಯವಾದಗಳು ಎಂದು ಹೇಳಿದರು.