ಹಾಲಿವುಡ್​ ಪ್ರತಿಭಟನೆಗೆ ಪ್ರಿಯಾಂಕಾ ಸಾಥ್ - ವಿದೇಶದಲ್ಲಿ ರಾಜಕೀಯ ನಿಲುವು ನಟರ ಮೇಲೆ ಪರಿಣಾಮ ಬೀರಲ್ಲ ಎಂದ ಭಾರತೀಯ ನಟಿ

ಹಾಲಿವುಡ್​​ನಲ್ಲಿ ನಡೆಯುತ್ತಿರುವ ಹೋರಾಟಕ್ಕೆ ಪ್ರಿಯಾಂಕಾ ಚೋಪ್ರಾ ಬೆಂಬಲ ಸೂಚಿಸಿದ್ದಾರೆ. ಈ ಬಗ್ಗೆ ಸ್ವರಾ ಭಾಸ್ಕರ್​ ಬೆಂಬಲ ಸೂಚಿಸಿದ್ದಾರೆ.

ಗ್ಲೋಬಲ್​ ಐಕಾನ್ ಪ್ರಿಯಾಂಕಾ ಚೋಪ್ರಾ ಹಾಲಿವುಡ್​​ನಲ್ಲಿ ನಡೆಯುತ್ತಿರುವ SAG AFTRA ಮುಷ್ಕರಕ್ಕೆ ತಮ್ಮ ಬೆಂಬಲ ಸೂಚಿಸಿದ್ದಾರೆ. ತಮ್ಮ ಮುಂಬರುವ ಬಹುನಿರೀಕ್ಷಿತ ಚಿತ್ರ ಹೆಡ್ಸ್ ಆಫ್ ಸ್ಟೇಟ್​ ಶೂಟಿಂಗ್​ಗೂ ತಡೆ ಇದ್ದು, ಈ ಮಧ್ಯೆ ಪ್ರಿಯಾಂಕಾ SAF - AFTRA (Screen Actors Guild-American Federation of Radio and Television Artists) ಮುಷ್ಕರಕ್ಕೆ ತಮ್ಮ ಬೆಂಬಲ ವ್ಯಕ್ತಪಡಿಸಿದ್ದಾರೆ. ಈ ಬಗ್ಗೆ ಬಾಲಿವುಡ್ ನಟಿ ಸ್ವರಾ ಭಾಸ್ಕರ್ ಪ್ರತಿಕ್ರಿಯಿಸಿದ್ದಾರೆ. ಪ್ರಪಂಚದ ಕೆಲ ಭಾಗಗಳಲ್ಲಿ 'ರಾಜಕೀಯ ನಿಲುವುಗಳ ಹಿನ್ನೆಲೆ ನಟರನ್ನು ಶಿಕ್ಷಿಸುವುದಿಲ್ಲ' ಎಂದು ತಿಳಿಸಿದ್ದಾರೆ.

ಪ್ರಿಯಾಂಕಾ ಚೋಪ್ರಾ ನಿಲುವೇನು?ಇನ್‌ಸ್ಟಾಗ್ರಾಮ್‌ನಲ್ಲಿ ನಟಿ ಪ್ರಿಯಾಂಕಾ ಚೋಪ್ರಾ ''ನಾನು ನನ್ನ ಒಕ್ಕೂಟ ಮತ್ತು ಸಹುದ್ಯೋಗಿಗಳೊಂದಿಗೆ ನಿಲ್ಲುತ್ತೇನೆ. ಒಗ್ಗಟ್ಟಿನಿಂದ ನಾವು ಉತ್ತಮ ನಾಳೆಯನ್ನು ನಿರ್ಮಿಸುತ್ತೇವೆ'' ಎಂದು ಬರೆದುಕೊಂಡಿದ್ದಾರೆ. ಈ ಮುಷ್ಕರದಿಂದಾಗಿ ನಟಿಯ ಮುಂಬರುವ ಹಾಲಿವುಡ್​ ಪ್ರಾಜೆಕ್ಟ್ ಹೆಡ್ಸ್ ಆಫ್ ಸ್ಟೇಟ್‌ನ ಚಿತ್ರೀಕರಣವೂ ಕೂಡ ಅದ್ಯಕ್ಕೆ ಸ್ಥಗಿತಗೊಳ್ಳುತ್ತದೆ ಅಥವಾ ಮುಂದೂಡಲ್ಪಡುತ್ತದೆ ಎಂದು ಹಲವು ವರದಿಗಳು ಹೇಳಿವೆ.

ಪ್ರಿಯಾಂಕಾ ಈ ಪೋಸ್ಟ್ ಅನ್ನು ಹಂಚಿಕೊಂಡ ಕೂಡಲೇ, ಅಭಿಮಾನಿಗಳು ಮತ್ತು ಸ್ನೇಹಿತರು ಕಾಮೆಂಟ್ ವಿಭಾಗದಲ್ಲಿ ತಮ್ಮ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. "ನಿಮಗೆ ಹೆಚ್ಚಿನ ಶಕ್ತಿ ಸಿಗಲಿ ರಾಣಿ" ಎಂದು ಅಭಿಮಾನಿಯೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಮತ್ತೋರ್ವ ಅಭಿಮಾನಿ "ಉತ್ತಮ" ಎಂದು ಬರೆದಿದ್ದಾರೆ. ಸ್ವರಾ ಭಾಸ್ಕರ್ ಕೂಡ ಹಿಂದೆ ಸರಿದಿಲ್ಲ.

ರಾಜಕೀಯ ನಿಲುವು ನಟರ ಮೇಲೆ ಪರಿಣಾಮ ಬೀರಲ್ಲ: ಬಾಲಿವುಡ್​ ನಟಿ ಸ್ವರಾ ಭಾಸ್ಕರ್ ಶುಕ್ರವಾರ ತಮ್ಮ ಇನ್​ಸ್ಟಾಗ್ರಾಮ್​ ಸ್ಟೋರಿಯಲ್ಲಿ, ಈ ಮುಷ್ಕರಕ್ಕೆ ಹಾಲಿವುಡ್ ನಟರು ಬೆಂಬಲ ನೀಡುವುದರ ಕುರಿತಾಗಿರುವ ಮಾಧ್ಯಮ ವರದಿಯನ್ನು ಹಂಚಿಕೊಂಡಿದ್ದಾರೆ. ಈ ವರದಿಯನ್ನು ಹಂಚಿಕೊಂಡ ಸ್ವರಾ, ವಿದೇಶದಲ್ಲಿ ರಾಜಕೀಯ ಚಟುವಟಿಕೆಗಳ ಹಿನ್ನೆಲೆ ಕಲಾವಿದರು ಯಾವುದೇ ಪರಿಣಾಮಗಳನ್ನು (ದಂಡ, ಶಿಕ್ಷೆ, ಟೀಕೆ) ಎದುರಿಸುವುದಿಲ್ಲ ಎಂದು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಬಾಲಿವುಡ್​ನಲ್ಲಿ ಗುರುತಿಸಿಕೊಂಡಿರುವ ಸ್ವರಾ ಭಾಸ್ಕರ್​ ಅವರು ಸಾಮಾಜಿಕ-ರಾಜಕೀಯ ವಿಷಯಗಳ ಬಗ್ಗೆ ಆಗಾಗ್ಗೆ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಾರೆ. ಈ ಹಿನ್ನೆಲೆ ಕೆಲವೊಮ್ಮೆ ಟ್ರೋಲ್​ಗೊಳಗಾಗುತ್ತಾರೆ. ಸದ್ಯ ಹಾಲಿವುಡ್​ ವಿಚಾರ ತೆಗೆದುಕೊಂಡು, ಪ್ರಿಯಾಂಕಾ ಚೋಪ್ರಾ ಸೇರಿದಂತೆ ಅಲ್ಲಿನವರಿಗೆ ಪರೋಕ್ಷವಾಗಿ ತಮ್ಮ ಮೆಚ್ಚುಗೆ ಕೊಟ್ಟಿದ್ದಾರೆ. ಜೊತೆಗೆ ಬೆಂಬಲವನ್ನೂ ವ್ಯಕ್ತಪಡಿಸಿದ್ದಾರೆ.

ವರದಿಗಳ ಪ್ರಕಾರ, SAG-AFTRA ಒಕ್ಕೂಟ ಗುರುವಾರ ಚಲನಚಿತ್ರ ಮತ್ತು ದೂರದರ್ಶನ ಉದ್ಯಮಗಳ (streaming services) ವಿರುದ್ಧ ತನ್ನ ಮುಷ್ಕರವನ್ನು ಘೋಷಿಸಿತು. ಮಾರ್ಗಸೂಚಿಗಳ ಪ್ರಕಾರ, ಮುಷ್ಕರ ಜಾರಿಯಲ್ಲಿರುವಾಗ SAG - AFTRA ಸದಸ್ಯರು ಪ್ರೀಮಿಯರ್‌ಗಳಿಗೆ ಹಾಜರಾಗಲು, ಪೂರ್ಣಗೊಂಡ ಕೆಲಸಕ್ಕಾಗಿ ಸಂದರ್ಶನಗಳನ್ನು ಕೊಡಲು, ಪ್ರಶಸ್ತಿ ಕಾರ್ಯಕ್ರಮಗಳಿಗೆ ಹೋಗಲು, ಚಲನಚಿತ್ರೋತ್ಸವಗಳಿಗೆ ಹಾಜರಾಗಲು ಅಥವಾ ಸಾಮಾಜಿಕ ಮಾಧ್ಯಮದಲ್ಲಿ ಯೋಜನೆಗಳನ್ನು ಪ್ರಚಾರ ಮಾಡಲು ಆಗುವುದಿಲ್ಲ.

ಇದನ್ನೂ ಓದಿ:ರಾಜಮೌಳಿ ಸಿನಿಮಾದಲ್ಲಿ ಒಡಹುಟ್ಟಿದವರಾಗಿ ಕಾಣಿಸಿಕೊಳ್ಳಲಿದ್ದಾರೆ ಜೂ. ಎನ್​​ಟಿಆರ್​ - ಮಹೇಶ್​ ಬಾಬು ಮಕ್ಕಳು

ನಾವು ಅತ್ಯಂತ ದುರಾಸೆಯ ಉದ್ಯಮಗಳಿಂದ ಬಲಿಯಾಗುತ್ತಿದ್ದೇವೆ ಎಂದು SAG-AFTRA ಅಧ್ಯಕ್ಷ ಫ್ರಾನ್ ಡ್ರೆಸ್ಚರ್ ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದರು. "ಕೆಲ ಹಂತದಲ್ಲಿ ನೀವು 'ಇಲ್ಲ' ಎಂದು ಹೇಳಬೇಕಾಗುತ್ತದೆ. ನಾವು ಇದನ್ನು ಇನ್ನು ಮುಂದೆ ಸಹಿಸುವುದಿಲ್ಲ'' ಎಂದು ತಿಳಿಸಿದ್ದರು.

ಇದನ್ನೂ ಓದಿ:ತೂಕ ಇಳಿಸಿಕೊಳ್ಳಲು ಮುಂದಾಗಿ ಜೀವಕ್ಕೆ ಕುತ್ತು.. ಗಾಯಕಿ ಲಿಸಾ ಮೇರಿ ಪ್ರೀಸ್ಲಿ ಸಾವಿನ ಕಾರಣ ಬಹಿರಂಗ!

ರೈಟರ್ಸ್ ಗಿಲ್ಡ್ ಆಫ್ ಅಮೇರಿಕಾ (WGA)ದ 11,000ಕ್ಕೂ ಹೆಚ್ಚು ಸದಸ್ಯರು ಮೇ ತಿಂಗಳಲ್ಲಿ ಮುಷ್ಕರವನ್ನು ಪ್ರಾರಂಭಿಸಿದ್ದರು. ತಮಗೆ ನ್ಯಾಯಯುತವಾಗಿ ಸಂಬಳ ಪಾವತಿಸುತ್ತಿಲ್ಲ, ಹೆಚ್ಚು ಲಾಭ ಪಡೆಯುತ್ತಿರುವ ಸ್ಟುಡಿಯೋ, ಸ್ಟ್ರೀಮಿಂಗ್ ಸರ್ವಿಸ್​ಗಳು​ ನಮಗೆ ಸೂಕ್ತ ಸಂಬಳ ಕೊಡುತ್ತಿಲ್ಲ ಎಂದು ಆರೋಪಿಸಿದ್ದರು. ಬರಹಗಾರರ ಹೋರಾಟ ಮೇನಿಂದಲೇ ಪ್ರಾರಂಭವಾಗಿದ್ದು, ಇದೀಗ ನಟರು ಅವರಿಗೆ ಸಾಥ್ ನೀಡಿದ್ದಾರೆ. ನ್ಯಾಯಯುತ ಪಾವತಿ ಆಗಬೇಕೆಂಬುದು ಈ ಹೋರಾಟಗಾರರ ಒತ್ತಾಯ.