ಭೀಮಾವರಂ(ಆಂಧ್ರಪ್ರದೇಶ): ರೆಬೆಲ್ ಸ್ಟಾರ್ ಜನಪ್ರಿಯತೆಯ ನಟ ಪ್ರಭಾಸ್ ಮತ್ತು ನಿರ್ದೇಶಕ ಮಾರುತಿ ಅವರ ಮುಂಬರುವ ಚಿತ್ರದ ಹೆಸರು ಅಂತಿಮಗೊಂಡಿದೆ. ಸಂಕ್ರಾಂತಿ ಹಬ್ಬದ ಸಂದರ್ಭದಲ್ಲಿ ಹೊಸ ಸಿನಿಮಾ ಹೆಸರನ್ನು ನಿರ್ಮಾಪಕರು ಘೋಷಿಸಿದ್ದಾರೆ. ಈ ಚಿತ್ರಕ್ಕೆ 'ರಾಜಾಸಾಬ್' ಎಂದು ಟೈಟಲ್ ಇಡಲಾಗಿದೆ. ಆಂಧ್ರಪ್ರದೇಶದ ಭೀಮಾವರಂ ಮೈದಾನದಲ್ಲಿ ಬೃಹತ್ ಡಿಜಿಟಲ್ ಕಟೌಟ್ (ಎಲ್‌ಇಡಿ ಸ್ಕ್ರೀನ್) ಮೂಲಕ ನಿರ್ಮಾಪಕರು ಚಿತ್ರದ ಹೆಸರು ಮತ್ತು ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆ ಮಾಡಿದರು.
ಭೀಮಾವರಂ ಪಂಡೆಂಕೋಡಿ ಬ್ಯಾರಿ ಮೈದಾನದಲ್ಲಿ 'ರಾಜಾಸಾಬ್' ಮೇಕರ್ಸ್ ಬೃಹತ್ ಡಿಜಿಟಲ್ ಕಟೌಟ್ ನಿರ್ಮಿಸಿದ್ದಾರೆ. ಇಂದು ಬೆಳಿಗ್ಗೆಯಿಂದಲೇ ಮೈದಾನಕ್ಕೆ ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳು ಆಗಮಿಸುತ್ತಿದ್ದಾರೆ. ಪಟಾಕಿ ಸಿಡಿಸುವ ಮೂಲಕ ಸಂಭ್ರಮಾಚರಣೆ ನಡೆದಿದೆ. ಡಿಜಿಟಲ್ ಕಟೌಟ್ ಮೂಲಕ ಸಿನಿಮಾ ಅಪ್‌ಡೇಟ್, ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆ ಮಾಡುತ್ತಿರುವುದು ಟಾಲಿವುಡ್‌ನಲ್ಲಿ ಇದೇ ಮೊದಲು ಎಂಬುದು ವಿಶೇಷ.
'ಡಾರ್ಲಿಂಗ್', 'ಬುಜ್ಜಿಗಾಡು' ಚಿತ್ರಗಳಂತೆ 'ರಾಜಾಸಾಬ್' ಚಿತ್ರದಲ್ಲೂ ವಿಂಟೇಜ್ ಶೈಲಿಯಲ್ಲಿ ಪ್ರಭಾಸ್ ಅಭಿನಯವಿರಲಿದೆ ಎಂದು ನಿರ್ದೇಶಕ ಮಾರುತಿ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ. ಅದರಂತೆ, ಫಸ್ಟ್ ಲುಕ್ ಪೋಸ್ಟರ್ನಲ್ಲಿ ನಟ ಲುಂಗಿಯಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಪ್ರಭಾಸ್ ಆ್ಯಕ್ಷನ್ ಮೋಡ್ ಬದಲು ಕೂಲ್ ಮತ್ತು ಕಾಮಿಡಿ ಟೈಮಿಂಗ್ ಮೂಲಕ ಮನರಂಜನೆ ನೀಡುತ್ತಾರಂತೆ.