ರಾಜಸ್ಥಾನದ ಉದಯಪುರದ ಲೀಲಾ ಪ್ಯಾಲೆಸ್ ಹೋಟೆಲ್ನಲ್ಲಿ ನಟಿ ಪರಿಣಿತಿ ಚೋಪ್ರಾ ಹಾಗೂ ಸಂಸದ ರಾಘವ್ ಚಡ್ಡಾ ಜೋಡಿಯ ವಿವಾಹ ಶಾಸ್ತ್ರಗಳು ಜರುಗುತ್ತಿವೆ. ರಾಗ್ನೀತಿ ಪ್ರೇಮಪಕ್ಷಿಗಳು ಇನ್ನೇನು ಕೆಲ ಹೊತ್ತಿನಲ್ಲಿ ಕುಟುಂಬಸ್ಥರು, ಆಪ್ತರು ಮತ್ತು ಗಣ್ಯರ ಸಮ್ಮುಖದಲ್ಲಿ ಹಾರ ಬದಲಾಯಿಸಿಕೊಳ್ಳಲಿದ್ದಾರೆ. ಇದೊಂದು ಅದ್ಧೂರಿ ಮದುವೆ ಆಗಿದ್ದು, ಫೋಟೋ, ವಿಡಿಯೋಗಳಿಗಾಗಿ ಅಭಿಮಾನಿಗಳು ಕಾತರರಾಗಿದ್ದಾರೆ.
ಪಿಚೋಲಾ ಸರೋವರದ ನಡುವೆ ಇರುವ ಹೋಟೆಲ್ನಲ್ಲಿ ಪರಿಣಿತಿ ಮತ್ತು ರಾಘವ್ ವಿವಾಹ ನಡೆಯುತ್ತಿದೆ. ಸಂಜೆ 4.30ಕ್ಕೆ ಸಪ್ತಪದಿ ತುಳಿಯಲಿದ್ದು, ನಂತರ ಆರತಕ್ಷತೆ ನಡೆಯಲಿದೆ. ಆರತಕ್ಷತೆಗೂ ಮುನ್ನ ವಧುವಿನ ಬೀಳ್ಕೊಡುಗೆ ಶಾಸ್ತ್ರವೂ ನಡೆಯಲಿದೆ.
ಸಹೋದರಿಯೊಂದಿಗೆ ಉದಯಪುರ ತಲುಪಿದ ಸಾನಿಯಾ ಮಿರ್ಜಾ: ವಧು ಪರಿಣಿತಿ ಚೋಪ್ರಾ ಆಪ್ತ ಸ್ನೇಹಿತೆ ಮಾಜಿ ಟೆನಿಸ್ ಆಟಗಾರ್ತಿ ಸಾನಿಯಾ ಮಿರ್ಜಾ ಅವರು ಈ ಅದ್ಧೂರಿ ವಿವಾಹ ಸಮಾರಂಭದಲ್ಲಿ ಪಾಲ್ಗೊಳ್ಳಲು ಉದಯಪುರ ತಲುಪಿದ್ದಾರೆ. ಇಂದು ಬೆಳಗ್ಗೆ ಉದಯಪುರ ವಿಮಾನ ನಿಲ್ದಾಣದಲ್ಲಿ ಸಾನಿಯಾ ಮಿರ್ಜಾ ತಮ್ಮ ಸಹೋದರಿ ಅನಮ್ ಮಿರ್ಜಾ ಜೊತೆ ಕಾಣಿಸಿಕೊಂಡಿದ್ದಾರೆ. ಪಾಪರಾಜಿಗಳು ಶೇರ್ ಮಾಡಿರುವ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ.
ವಧುವಿನ ಕಿರಿಯ ಸಹೋದರರಾದ ಸಹಜ್ ಚೋಪ್ರಾ ಮತ್ತು ಶಿವಾಂಗ್ ಚೋಪ್ರಾ ವಿವಾಹ ಸ್ಥಳದಲ್ಲಿ ಕಾಣಿಸಿಕೊಂಡಿದ್ದಾರೆ. ಸಹಜ್ ಹಾಗೂ ಶಿವಾಂಗ್ ಅತಿಥಿಗಳೊಂದಿಗೆ ದೋಣಿಯಲ್ಲಿ ಹೋಟೆಲ್ ಲೀಲಾ ಪ್ಯಾಲೆಸ್ಗೆ ಹೋಗುತ್ತಿರುವುದು ಪಾಪರಾಜಿಗಳ ಕ್ಯಾಮರಾಗಳಲ್ಲಿ ಸೆರೆಯಾಗಿದೆ. ಎರಡೂ ಹೋಟೆಲ್ಗಳ ಸುತ್ತ ಪಿಚೋಲಾ ಸರೋವರ, ಬೆಟ್ಟಗುಡ್ಡಗಳು ಆವೃತವಾಗಿದೆ. ನೈಸರ್ಗಿಕ ಸೌಂದರ್ಯದ ನಡುವೆ ಈ ಜೋಡಿ ಮದುವೆ ಆಗುತ್ತಿದ್ದಾರೆ.