ಆರ್ಆರ್ಆರ್ ಸಿನಿಮಾದ ಸೂಪರ್ಹಿಟ್ ನಾಟು ನಾಟು ಹಾಡು ಅತ್ಯುತ್ತಮ ಮೂಲ ಗೀತೆ ವಿಭಾಗದಲ್ಲಿ ಆಸ್ಕರ್ ಪ್ರಶಸ್ತಿ ಪಡೆದುಕೊಂಡಿದೆ. ಅವಾರ್ಡ್ ಪಡೆದುಕೊಂಡ ಆರ್ಆರ್ಆರ್ ತಂಡ ಸಂತಸದಲ್ಲಿ ಮುಳುಗಿದೆ. ಜೊತೆಗೆ ತಮ್ಮ ಯಶಸ್ಸಿಗೆ ಕಾರಣರಾದ ಎಲ್ಲರಿಗೂ ಚಿತ್ರತಂಡ ಧನ್ಯವಾದ ತಿಳಿಸಿದೆ. ಸೂಪರ್ಸ್ಟಾರ್ಗಳಾದ ಜೂನಿಯರ್ ಎನ್ಟಿಆರ್ ಮತ್ತು ರಾಮ್ಚರಣ್ ಕೂಡ ತಮ್ಮ ಖುಷಿ ವ್ಯಕ್ತಪಡಿಸಿದ್ದಾರೆ. ಜೊತೆಗೆ ಹಾಡನ್ನು ಹಿಟ್ ಮಾಡಿದ ಅಭಿಮಾನಿಗಳಿಗೆ ಕೃತಜ್ಞತೆ ಅರ್ಪಿಸಿದ್ದಾರೆ.
ಈ ಬಗ್ಗೆ ಮಾತನಾಡಿರುವ ಜೂನಿಯರ್ ಎನ್ಟಿಆರ್, "ಈ ಸುಸಂದರ್ಭದಲ್ಲಿ ನನಗಾಗುತ್ತಿರುವ ಖುಷಿಯನ್ನು ವ್ಯಕ್ತಪಡಿಸಲು ಪದಗಳೇ ಸಿಗುತ್ತಿಲ್ಲ. ಈ ಪ್ರಶಸ್ತಿಯು ಕೇವಲ ಆರ್ಆರ್ಆರ್ಗೆ ಮಾತ್ರವಲ್ಲ, ಇಡೀ ಭಾರತ ದೇಶಕ್ಕೆ ಸಂದ ಗೌರವ. ಅಲ್ಲದೇ ಇದು ಕೇವಲ ಆರಂಭವಷ್ಟೇ. ಜೊತೆಗೆ ಭಾರತ ಚಿತ್ರರಂಗವು ಎಷ್ಟು ದೂರ ಹೋಗಬಹುದು ಎಂಬುದನ್ನು ಇದು ತೋರಿಸುತ್ತಿದೆ. ಕೀರವಾಣಿ ಮತ್ತು ಚಂದ್ರಬೋಸ್ ಅವರಿಗೆ ಅಭಿನಂದನೆಗಳು" ಎಂದು ಹೇಳಿದರು.
ಮುಂದುವರೆದು, "ರಾಜಮೌಳಿ ಎಂಬ ಮೇರು ಕಥೆಗಾರ ಇಲ್ಲದಿದ್ದರೆ ಸಹಜವಾಗಿ ಇದ್ಯಾವುದೂ ಸಾಧ್ಯವಾಗುತ್ತಿರಲಿಲ್ಲ. ಜೊತೆಗೆ ತಮ್ಮ ಪ್ರೀತಿಯನ್ನೇ ಧಾರೆಯೆರದ ಪ್ರೇಕ್ಷಕರಿಲ್ಲದೇ ಈ ಯಶಸ್ಸು ಖಂಡಿತ ಸಿಗುತ್ತಿರಲಿಲ್ಲ. ಇಂದು ಭಾರತಕ್ಕೆ ಮತ್ತೊಂದು ಆಸ್ಕರ್ ತಂದುಕೊಟ್ಟಿರುವ 'ದಿ ಎಲಿಫೆಂಟ್ ವಿಸ್ಪರರ್ಸ್' ತಂಡವನ್ನು ನಾನು ಅಭಿನಂದಿಸಲು ಬಯಸುತ್ತೇನೆ" ಎಂದು ಹೇಳಿದರು. ಜೊತೆಗೆ ಆಸ್ಕರ್ ಪ್ರಶಸ್ತಿಯನ್ನು ಕೈಯಲ್ಲಿ ಹಿಡಿದಿರುವ ಫೋಟೋವನ್ನು ಟ್ವಿಟರ್ನಲ್ಲಿ ಹಂಚಿಕೊಂಡು, "ಕೊನೆಗೂ ನಾವು ಆಸ್ಕರ್ ಪ್ರಶಸ್ತಿಯನ್ನು ಪಡೆದುಕೊಂಡೆವು. ಎಂಎಂ ಕೀರವಾಣಿ, ರಾಜಮೌಳಿ, ಚಂದ್ರಬೋಸ್, ಆರ್ಆರ್ಆರ್ ತಂಡ ಮತ್ತು ಇಡೀ ಭಾರತ ದೇಶಕ್ಕೆ ಅಭಿನಂದನೆಗಳು" ಎಂದು ಟ್ವೀಟ್ ಮಾಡಿದ್ದಾರೆ.