ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ಅಭಿನಯದ ಸಲಾರ್ ಈ ಸಾಲಿನ ಬಹುನಿರೀಕ್ಷಿತ ಸಿನಿಮಾಗಳಲ್ಲೊಂದು. ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣದ ಈ ಸಿನಿಮಾವನ್ನು ಕೆಜಿಎಫ್ ಖ್ಯಾತಿಯ ಪ್ರಶಾಂತ್ ನೀಲ್ ನಿರ್ದೇಶಿಸಿರುವುದರಿಂದ ನಿರೀಕ್ಷೆ ಕೊಂಚ ಹೆಚ್ಚೇ. ಸೆಪ್ಟಂಬರ್ 28ರಂದು ಅದ್ಧೂರಿಯಾಗಿ ತೆರೆ ಕಾಣಲು ಸಜ್ಜಾಗುತ್ತಿರುವ ಈ ಸಿನಿಮಾದ ಟೀಸರ್ ಇಂದು ಬೆಳಗ್ಗೆ 5-12ಕ್ಕೆ ಅನಾವರಣಗೊಂಡಿದೆ.
ಸಾಮಾಜಿಕ ಮಾಧ್ಯಮದಾದ್ಯಂತ ಸಲಾರ್ ಟೀಸರ್ ಸದ್ದು ಮಾಡುತ್ತಿದೆ. ಅಭಿಮಾನಿಗಳಿಂದ ವಿಭಿನ್ನ ಪ್ರತಿಕ್ರಿಯೆಗಳನ್ನು ಸ್ವೀಕರಿಸುತ್ತಿದೆ. ಸಲಾರ್ ಟೀಸರ್ ನಟ ಪ್ರಭಾಸ್ ಅವರನ್ನು ರೆಬೆಲ್ ಸ್ಟಾರ್ ಎಂದು ಬಿಂಬಿಸಿದೆ. ಸಾಕಷ್ಟು ಆ್ಯಕ್ಷನ್ ಸೀನ್ಗಳೊಂದಿಗೆ ಕುತೂಹಲ ಮೂಡಿಸಿದೆ. 1 ನಿಮಿಷ ಮತ್ತು 45 ಸೆಕೆಂಡ್ಸ್ ಇರುವ ಈ ಕ್ಲಿಪ್ ನಟನ ಆ್ಯಕ್ಷನ್ ಸೀಕ್ವೆನ್ಸ್‌ಗಳನ್ನು ಹಿಂಬದಿಯಿಂದ ಮಾತ್ರ ತೋರಿಸಿದೆ. ನಟನ ಮುಖದ ಕ್ಷಣಿಕ ನೋಟ ಮಾತ್ರ ಈ ಟೀಸರ್ನಲ್ಲಿದೆ. ಹಾಗಾಗಿ ಪ್ರಭಾಸ್ ಅಭಿಮಾನಿಗಳು ನಿರಾಶೆಗೊಂಡಿದ್ದಾರೆ.
ಅನುಭವಿ ನಟ ಟಿನು ಆನಂದ್ ಅವರು ಸಲಾರ್ ಟೀಸರ್ನಲ್ಲಿ ಕಥೆಯನ್ನು ವಿವರಿಸಿದ್ದಾರೆ. ಪ್ರಭಾಸ್ ಕಥೆಯನ್ನು ಹೇಳುತ್ತಾರೆ. ಈ ಚಲನಚಿತ್ರವು ಕೆಜಿಎಫ್ ಸರಣಿಗೆ ಹೋಲುತ್ತಿದೆ. ಪ್ರಭಾಸ್ ಪಾತ್ರವನ್ನು ಕೆಜಿಎಫ್ ನಾಯಕ ರಾಕಿ ಭಾಯ್ ಪಾತ್ರದಂತೆಯೇ ಚಿತ್ರಿಸಲಾಗಿದೆ ಎಂಬುದು ನೆಟ್ಟಿಗರ ಅಭಿಪ್ರಾಯ. ಟೀಸರ್ನಲ್ಲಿ ಬಹಿರಂಗವಾಗಿರುವ ಅತ್ಯಂತ ಕುತೂಹಲಕಾರಿ ಮಾಹಿತಿಯೆಂದರೆ ಸಲಾರ್ ಎರಡು ಭಾಗಗಳ ಚಲನಚಿತ್ರವಾಗಿದೆ.
ಸಲಾರ್ ಭಾಗ 1 - ಚಿತ್ರದ ಮೊದಲ ಕಂತಿನ ಶೀರ್ಷಿಕೆ. ಇದನ್ನು ಕೆಜಿಎಫ್ ಖ್ಯಾತಿಯ ಪ್ರಶಾಂತ್ ನೀಲ್ ನಿರ್ದೇಶಿಸಿದ್ದಾರೆ. ಪ್ರಭಾಸ್ ಜೊತೆಗೆ ನಟ ಪೃಥ್ವಿರಾಜ್ ಸುಕುಮಾರನ್ ಕಾಣಿಸಿಕೊಂಡಿದ್ದಾರೆ. ಪೃಥ್ವಿರಾಜ್ ಅವರ ಸಂಕ್ಷಿಪ್ತ ನೋಟವನ್ನು ಟೀಸರ್ ನೀಡಿದೆ. ಆದರೆ, ಮುಖ್ಯಭೂಮಿಕೆಯಲ್ಲಿರುವ ಪ್ರಭಾಸ್ ಮತ್ತು ಅವರಿಗೆ ಜೋಡಿಯಾಗಿ ನಟಿಸಿರುವ ಶ್ರುತಿ ಹಾಸನ್ ಟೀಸರ್ನಲ್ಲಿ ಕಾಣಿಸಿಕೊಂಡಿಲ್ಲ. ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ನೆಟ್ಟಿಗರು ಅಸಮಧಾನ ಹೊರಹಾಕಿದ್ದಾರೆ.