ಬಹುನಿರೀಕ್ಷೆಯಿಂದ ಕಾಯುತ್ತಿರುವ 'ಜಿಗರ್ತಂಡ ಡಬಲ್ ಎಕ್ಸ್' ಚಿತ್ರದ ಟೀಸರ್ ಇಂದು ಅನಾವರಣಗೊಂಡಿದೆ. ಟಾಲಿವುಡ್ ಸೂಪರ್ಸ್ಟಾರ್ ಮಹೇಶ್ ಬಾಬು, ಮಾಲಿವುಡ್ ನಟ ದುಲ್ಕರ್ ಸಲ್ಮಾನ್, ಕಾಲಿವುಡ್ ಸೂಪರ್ಸ್ಟಾರ್ ಧನುಷ್, ಸ್ಯಾಂಡಲ್ವುಡ್ ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ಸೇರಿ 'ಜಿಗರ್ತಂಡ ಡಬಲ್ ಎಕ್ಸ್' ಸಿನಿಮಾದ ಸಣ್ಣ ತುಣುಕನ್ನು ಬಿಡುಗಡೆಗೊಳಿಸಿದ್ದಾರೆ. 2014ರ ಜಿಗರ್ತಂಡ ಚಿತ್ರದ ಮುಂದುವರಿದ ಭಾಗವಾಗಿರುವ ಈ ಚಿತ್ರವು 2023ರ ದೀಪಾವಳಿ ಸಂದರ್ಭದಲ್ಲಿ ಚಿತ್ರಮಂದಿರಗಳಿಗೆ ಬರಲು ಸಿದ್ಧವಾಗಿದೆ.
ಕಾರ್ತಿಕ್ ಸುಬ್ಬರಾಜ್ ಪೋಸ್ಟ್: 'ಜಿಗರ್ತಂಡ ಡಬಲ್ ಎಕ್ಸ್' ಚಿತ್ರದ ಟೀಸರ್ ಲಿಂಕ್ ಅನ್ನು ಹಂಚಿಕೊಳ್ಳಲು ನಿರ್ದೇಶಕ ಕಾರ್ತಿಕ್ ಸುಬ್ಬರಾಜ್ ಸೋಷಿಯಲ್ ಮೀಡಿಯಾವನ್ನು ವೇದಿಕೆಯನ್ನಾಗಿ ಬಳಸಿಕೊಂಡರು. "#ಜಿಗರ್ತಂಡ ಡಬಲ್ ಎಕ್ಸ್ ಟೀಸರ್. ಪಂದ್ಯಾ ವೆಸ್ಟರ್ನ್ ಕಥೆ. ಈ ದೀಪಾವಳಿಗೆ ಥಿಯೇಟರ್ಗಳಲ್ಲಿ. #APandyaaWestern #JigarthandaDoubleXTeaser #DoubleXDiwali." ಎಂದು ಕ್ಯಾಪ್ಶನ್ ನೀಡಿದ್ದಾರೆ. ಈ ಬಾರಿಯ ದೀಪಾವಳಿಗೆ ಅನೇಕ ಸಿನಿಮಾಗಳು ತೆರೆ ಕಾಣಲು ಸಜ್ಜಾಗಿದ್ದು, ಆ ಸಾಲಿಗೆ 'ಜಿಗರ್ತಂಡ ಡಬಲ್ ಎಕ್ಸ್' ಕೂಡ ಸೇರಿದೆ.
ಇದಕ್ಕೂ ಮುನ್ನ ನಿರ್ದೇಶಕರು ಭಾನುವಾರ ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಚಿತ್ರದ ಪೋಸ್ಟರ್ ಅನ್ನು ಹಂಚಿಕೊಂಡಿದ್ದರು. "ಜಿಗರ್ತಾಂಡ ಡಬಲ್ ಎಕ್ಸ್ನ ಟೀಸರ್ ಅನ್ನು ಧನುಷ್, ಮಹೇಶ್ ಬಾಬು, ರಕ್ಷಿತ್ ಶೆಟ್ಟಿ ಮತ್ತು ದುಲ್ಕರ್ ಸಲ್ಮಾನ್ ನಾಳೆ ಮಧ್ಯಾಹ್ನ 12.12ಕ್ಕೆ ಬಿಡುಗಡೆ ಮಾಡಲಿದ್ದಾರೆ" ಎಂದು ಬರೆದುಕೊಂಡಿದ್ದರು. ಮತ್ತೊಂದು ಪೋಸ್ಟ್ನಲ್ಲಿ ಕಾರ್ತಿಕ್, "ಟೀಸರ್ಗಿಂತಲೂ ಹೆಚ್ಚು. ಸೆಪ್ಟಂಬರ್ 11, 12.12ಕ್ಕೆ ಬಿಡುಗಡೆಯಾಗುತ್ತಿದೆ. #MorethanATeaser #DoubleXDiwali" ಎಂಬ ಅಡಿಬರಹ ನೀಡಿದ್ದರು.