ಹೈದರಾಬಾದ್:ಟಾಲಿವುಡ್ ನಟ ಮಹೇಶ್ ಬಾಬು ನಟನೆಯ ಬಹುನಿರೀಕ್ಷಿತ SSMB28 ಚಿತ್ರದ ಮೊದಲ ಪೋಸ್ಟರ್ ಬಿಡುಗಡೆಯಾಗಿದೆ. ಚಿತ್ರದ ಪೋಸ್ಟರ್ ಅನ್ನು ತಮ್ಮ ಟ್ವೀಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದು ಫ್ಯಾನ್ಸ್ ಫಿದಾ ಆಗಿದ್ದಾರೆ. ತಮ್ಮ ತಂದೆ ಕೃಷ್ಣ ಅವರಿಗೆ ಅರ್ಪಿಸಿದ್ದಾರೆ. ಇಂದು ಕೃಷ್ಣ ಅವರ ಜನ್ಮದಿನದ. ಈ ನೆನಪಿಗಾಗಿ ಮಹೇಶ್ ಬಾಬು ಚಿತ್ರದ ಪೋಸ್ಟರ್ ಬಿಡುಗಡೆ ಮಾಡಿದ್ದಾರೆ. "ಇಂದು ಬಹಳ ವಿಶೇಷ ದಿನವಾಗಿದೆ! ನೀವು ಇದಕ್ಕೆ ಅರ್ಹರು" ಎಂದು ಟ್ವೀಟ್ಗೆ ಶೀರ್ಷಿಕೆ ಬರೆದಿದ್ದಾರೆ.
ಅವರು ಪೋಸ್ಟರ್ ಹಂಚಿಕೊಳ್ಳುತ್ತಿದ್ದಂತೆ ಚಿತ್ರದ ಬಗ್ಗೆ ಅಭಿಮಾನಿಗಳ ಕ್ರೇಜ್ ಇಮ್ಮಡಿಗೊಂಡಿದ್ದು, ತಲೆಗೆ ಬಟ್ಟೆ ಕಟ್ಟಿಕೊಂಡು ರಗಡ್ ಲುಕ್ನಲ್ಲಿ ಕಾಣಿಸಿಕೊಂಡಿರುವುದನ್ನು ಪೋಸ್ಟರ್ನಲ್ಲಿ ಕಾಣಬಹುದು. ಮಹೇಶ್ ಬಾಬು ಅವರ 28 ಚಿತ್ರ ಇದಾಗಿದ್ದು, ಸದ್ಯಕ್ಕೆ SSMB28 ತಾತ್ಕಾಲಿಕ ಹೆಸರು ಇಡಲಾಗಿದೆ.
12 ವರ್ಷಗಳ ಬಳಿಕ ತ್ರಿವಿಕ್ರಮ್ ಶ್ರೀನಿವಾಸ್ ಅವರು ಮಹೇಶ್ ಬಾಬು ಅವರಿಗೆ ಆ್ಯಕ್ಷನ್ ಕಟ್ ಹೇಳುತ್ತಿರುವುದರಿಂದ ಅಭಿಮಾನಿಗಳ ಕೌತುಕ ಹೆಚ್ಚಾಗುತ್ತಿದೆ. 12 ವರ್ಷದ ಹಿಂದೆ ಇದೇ ಜೋಡಿ ಅಥಡು ಮತ್ತು ಖಲೇಜಾ ಎಂಬ ಹಿಟ್ ಸಿನಿಮಾಗಳನ್ನು ನೀಡಿತ್ತು. ಇದೀಗ ಮತ್ತೆ ಒಂದಾಗಿದ್ದಾರೆ. SSMB28 ಚಿತ್ರವು ಇವರ ಕಾಂಬಿನೇಷನ್ನಲ್ಲಿ ಸಿದ್ಧಗೊಳ್ಳುತ್ತಿರುವುದು ಮೂರನೇ ಚಿತ್ರವಾಗಿದೆ.
ಪೂಜಾ ಹೆಗ್ಡೆ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದು, ಎಸ್ ಥಮನ್ ಸಂಗೀತದ ಹೊಣೆ ಹೊತ್ತಿದ್ದಾರೆ. ಸಂಕ್ರಾಂತಿಯ ಹಬ್ಬದ ಪ್ರಯುಕ್ತ ಜನವರಿ 13, 2024 ರಂದು SSMB28 ಚಿತ್ರ ಬಿಡುಗಡೆಯಾಗಲಿದೆ. ಇನ್ನು ಕೃಷ್ಣ ಅವರ ಜನುಮದಿನದ ಪ್ರಯುಕ್ತ ಅವರ ನಟನೆಯ 'ಮೋಸಗಾಳ್ಳಕು ಮೋಸಗಾಳ್ಳು' ಚಿತ್ರ ಕೂಡ ಮರು ಬಿಡುಗಡೆಯಾಗಿದೆ.