ಬಾಲಿವುಡ್ ಬೇಡಿಕೆ ನಟರಾದ ಶಾರುಖ್ ಖಾನ್, ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ ನಟನೆಯ ಪಠಾಣ್ ಸಿನಿಮಾ ನಿರೀಕ್ಷೆಗೂ ಮೀರಿ ಯಶಸ್ಸು ಸಾಧಿಸಿದೆ. ಸತತ ಸೋಲಿನಿಂದ ಕಂಗೆಟ್ಟಿದ್ದ ಬಾಲಿವುಡ್ಗೆ ಬೂಸ್ಟರ್ ಡೋಸ್ ಕೊಟ್ಟಿದೆ ಪಠಾಣ್ ಸಿನಿಮಾ. ಬಿಡುಗಡೆ ಕಂಡ 9 ದಿನಗಳಲ್ಲಿ 700 ಕೋಟಿ ರೂಪಾಯಿ ಕಲೆಕ್ಷನ್ ಮಾಡುವ ಮೂಲಕ ಈ ಹಿಂದೆ ಇದ್ದ ಎಲ್ಲ ದಾಖಲೆಗಳನ್ನು ಪುಡಿಗಟ್ಟಿದೆ.
ಎಸ್ಆರ್ಕೆ ಓರ್ವ "ರಾಜ":ಪಠಾಣ್ ಚಿತ್ರದ ಅಗಾಧ ಯಶಸ್ಸಿನ ನಂತರ, ಪ್ರಸಿದ್ಧ ಲೇಖಕ ಪೌಲೊ ಕೊಯೆಲೊ (Paulo Coelho) ಗುರುವಾರದಂದು ಶಾರುಖ್ ಖಾನ್ ಅವರನ್ನು "ಮಹಾನ್ ನಟ" ಎಂದು ಹಾಡಿ ಹೊಗಳಿದ್ದಾರೆ. ಮುಂಬೈನಲ್ಲಿರುವ ತಮ್ಮ ಮನೆ ಮನ್ನತ್‌ನ ಹೊರಗೆ ನಟ ಶಾರುಖ್ ಖಾನ್ ತಮ್ಮ ಅಭಿಮಾನಿಗಳಿಗೆ ಕೃತಜ್ಞತೆ ವ್ಯಕ್ತಪಡಿಸಿದ್ದರು. ಟ್ವಿಟರ್‌ನಲ್ಲಿ ಶಾರುಖ್ ಅವರ ಜನವರಿ 30ರ ಪೋಸ್ಟ್ ಕುರಿತು ಪ್ರತಿಕ್ರಿಯಿಸಿದ ಲೇಖಕ ಪೌಲೊ ಕೊಯೆಲೊ ಬಾಲಿವುಡ್ ತಾರೆ ಎಸ್ಆರ್ಕೆ ಓರ್ವ "ರಾಜ" ಎಂದು ಮೆಚ್ಚುಗೆಯ ಮಳೆ ಸುರಿಸಿದರು.
ಮೆಚ್ಚುಗೆ ಸುರಿಮಳೆ:ಲೇಖಕ ಪೌಲೊ ಕೊಯೆಲೊ, ಶಾರುಖ್ ಖಾನ್ ಅವರನ್ನು ಹೊಗಳಿದ್ದು ಇದೇ ಮೊದಲಲ್ಲ. ಈ ಹಿಂದೆ 2017ರಲ್ಲಿ 'ಮೈ ನೇಮ್ ಈಸ್ ಖಾನ್' ಚಿತ್ರ 7 ವರ್ಷ ಪೂರೈಸಿದಾಗ ಕೂಡ ಶಾರುಖ್ ಅವರನ್ನು ಹೊಗಳಿದ್ದರು. ಇದೀಗ ಶಾರುಖ್ ಅವರ 2010ರ ಚಲನಚಿತ್ರ 'ಮೈ ನೇಮ್ ಈಸ್ ಖಾನ್' ವೀಕ್ಷಿಸಲು ತಮ್ಮ ಅಭಿಮಾನಿಗಳಿಗೆ ಲೇಖಕ ಪೌಲೊ ಕೊಯೆಲೊ ಶಿಫಾರಸು ಮಾಡಿದ್ದಾರೆ.
"ರಾಜ, ದಂತಕಥೆ, ಸ್ನೇಹಿತ, ಎಲ್ಲಕ್ಕಿಂತ ಹೆಚ್ಚಾಗಿ ಮಹಾನ್ ನಟ'' ಎಂದು ಗುಣಗಾನ ಮಾಡಿದ್ದಾರೆ. ಪಾಶ್ಚಿಮಾತ್ಯದಲ್ಲಿ ಅವರ ಬಗ್ಗೆ ತಿಳಿದಿಲ್ಲದವರು ಮೈ ನೇಮ್ ಈಸ್ ಖಾನ್ ಚಿತ್ರ ನೋಡಿ ಎಂದು ಹೇಳಿದ್ದಾರೆ. ಮತ್ತು ಮೈ ನೇಮ್ ಈಸ್ ಖಾನ್ ಅಂಡ್ ಐ ಆ್ಯಮ್ ನಾಟ್ ಎ ಟೆರರಿಸ್ಟ್ ಎಂಬ ಚಿತ್ರದ ಫೇಮಸ್ ಡೈಲಾಗ್ ಅನ್ನು ಕೂಡ ಅವರು ಈ ಪೋಸ್ಟ್ ಜೊತೆ ಹಂಚಿಕೊಂಡಿದ್ದಾರೆ.