ಸೌತ್ ಸೂಪರ್ ಸ್ಟಾರ್ ಮಹೇಶ್ ಬಾಬು ಮತ್ತು ದಕ್ಷಿಣ ಚಿತ್ರರಂಗದ ಯಂಗ್ ಆ್ಯಂಡ್ ಎನರ್ಜಿಟಿಕ್ ನಟಿ ಶ್ರೀಲೀಲಾ ನಟನೆಯ ಬಹು ನಿರೀಕ್ಷಿತ ಸಿನಿಮಾ 'ಗುಂಟೂರು ಖಾರಂ'. ಸಿನಿಮಾ ಬಿಡುಗಡೆಗೆ ದಿನಗಣನೆ ಆರಂಭವಾಗಿದ್ದು, ಪ್ರಚಾರ ಶುರುವಾಗಿದೆ. ಇಂದು ಕುರ್ಚಿ ಮಡತಪೆಟ್ಟಿ (Kurchi Madathapetti) ಹಾಡು ಅನಾವರಣಗೊಂಡಿದೆ. ಸಾಂಗ್ ಬೀಟ್ಸ್ ಮತ್ತು ಮಹೇಶ್ ಬಾಬು, ಶ್ರೀಲೀಲಾ ಭರ್ಜರಿ ಡ್ಯಾನ್ಸ್ ಪ್ರೇಕ್ಷಕರನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿದೆ.
'ಗುಂಟೂರು ಖಾರಂ'ನ ಕುರ್ಚಿ ಮಡತಪೆಟ್ಟಿ ಸಂಗೀತವನ್ನು ಥಮನ್ ಎಸ್ ಸಂಯೋಜಿಸಿದ್ದಾರೆ. ಶೇಖರ್ ವಿ.ಜೆ ಡ್ಯಾನ್ಸ್ ಕೊರಿಯೋಗ್ರಾಫಿ ಮಾಡಿದ್ದಾರೆ. ರಾಮಜೋಗಯ್ಯ ಶಾಸ್ತ್ರಿಯವರ ಸಾಹಿತ್ಯವಿದ್ದು, ಸಾಹಿತಿ ಚಗಂಟಿ ಮತ್ತು ಶ್ರೀಕೃಷ್ಣ ಅವರು ದನಿಯಾಗಿದ್ದಾರೆ. ಒಟ್ಟಾರೆ ಇಂದು ಅನಾವರಣಗೊಂಡಿರುವ ಮೂರು ನಿಮಿಷ, 43 ಸೆಕೆಂಡುಗಳ ಲಿರಿಕಲ್ ವಿಡಿಯೋಗೆ ಪ್ರೇಕ್ಷಕರು ಮೆಚ್ಚುಗೆ ಸೂಚಿಸಿದ್ದಾರೆ. ಈಗಾಗಲೇ ದಮ್ ಮಸಾಲಾ ಮತ್ತು ಓ ಮೈ ಬೇಬಿ ಹಾಡುಗಳು ಬಿಡುಗಡೆ ಆಗಿವೆ. ಕುರಚಿ ಮಡತಪೆಟ್ಟಿ 'ಗುಂಟೂರು ಕಾರಂ'ನ ಮೂರನೇ ಟ್ರ್ಯಾಕ್ ಆಗಿದ್ದು, ಪ್ರೇಕ್ಷಕರನ್ನು ಸೆಳೆಯುವಲ್ಲಿ ತಂಡ ಯಶಸ್ಸು ಕಂಡಿದೆ.
ಸಿನಿಮಾ 2024ರ ಸಂಕ್ರಾಂತಿ ಸಂದರ್ಭ ತೆರೆಕಾಣಲಿದೆ. ಜನವರಿ 12 ರಂದು ತೆರೆಕಾಣಲಿರುವ ಈ ಸಿನಿಮಾ ತೆಲುಗು ಚಲನಚಿತ್ರೋದ್ಯಮದಲ್ಲಿ ಧೂಳೆಬ್ಬಿಸುವ ನಿರೀಕ್ಷೆಗಳಿವೆ. ಹನುಮಾನ್, ಈಗಲ್ ಮತ್ತು ನಾ ಸಾಮಿ ರಂಗದಂತಹ ಸಿನಿಮಾದೊಂದಿಗೆ ಗುಂಟೂರು ಖಾರಂ ಸ್ಪರ್ಧಿಸಲಿದೆ. ಮಹೇಶ್ ಬಾಬು ಪ್ರಸ್ತುತ ತಮ್ಮ ಕುಟುಂಬಸ್ಥರೊಂದಿಗೆ ಯುಎಸ್ಎನಲ್ಲಿದ್ದಾರೆ. ನ್ಯೂ ಇಯರ್ ಸೆಲೆಬ್ರೇಶನ್ ಸಲುವಾಗಿ ಕುಟುಂಬ ಸಮೇತ ವಿದೇಶಕ್ಕೆ ಹಾರಿದ್ದಾರೆ. ಹಿಂದಿರುಗಿದ ಬಳಿಕ ತಮ್ಮ ಈ ಚಿತ್ರದ ಪ್ರಚಾರದಲ್ಲಿ ಬ್ಯುಸಿಯಾಗಲಿದ್ದಾರೆ ಎಂದು ಹೇಳಲಾಗಿದೆ.