'ಲವ್ ಮಾಕ್ಟೇಲ್' ಖ್ಯಾತಿಯ ಡಾರ್ಲಿಂಗ್ ಕೃಷ್ಣ ನಟನೆಯ 'ಕೌಸಲ್ಯಾ ಸುಪ್ರಜಾ ರಾಮ' ಸಿನಿಮಾ ಬಿಡುಗಡೆಗೆ ಮುಹೂರ್ತ ನಿಗದಿಯಾಗಿದೆ. ಮೊಗ್ಗಿನ ಮನಸು, ಬಚ್ಚನ್, ಮುಂಗಾರು ಮಳೆ 2 ಮುಂತಾದ ಹಿಟ್ ಚಿತ್ರಗಳನ್ನು ನೀಡಿರುವ ಸ್ಯಾಂಡಲ್ವುಡ್ ಸ್ವ-ಮೇಕ್ ನಿರ್ದೇಶಕ ಶಶಾಂಕ್ ಅವರು ಈ ಸಿನಿಮಾವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಈಗಾಗಲೇ ಸಿನಿಮಾದ ಸಾಕಷ್ಟು ಪೋಸ್ಟರ್ಗಳು ರಿಲೀಸ್ ಆಗಿದ್ದು, ಸಿನಿಮಾದ ಬಿಡುಗಡೆಗೂ ದಿನಾಂಕ ಗೊತ್ತು ಮಾಡಲಾಗಿದೆ. ನಿಮ್ಮ ಕ್ಯಾಲೆಂಡರ್ನಲ್ಲಿ ಯಾವ ದಿನಾಂಕವನ್ನು ಗೊತ್ತು ಮಾಡಬೇಕು ಎಂಬುದನ್ನು ನಾಳೆ ಚಿತ್ರತಂಡ ಅಧಿಕೃತವಾಗಿ ತಿಳಿಸಲಿದೆ.
ಇದರ ಸಲುವಾಗಿಯೇ ಇಂದು 'ಕೌಸಲ್ಯಾ ಸುಪ್ರಜಾ ರಾಮ' ಟೀಮ್, ರಿಲೀಸ್ ಡೇಟ್ ಪ್ರಿ-ಅನೌನ್ಸ್ಮೆಂಟ್ ವಿಡಿಯೋವೊಂದನ್ನು ಹಂಚಿಕೊಂಡಿದೆ. ಇದು ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ. ನಿರ್ದೇಶಕ ಶಶಾಂಕ್, ಡಾರ್ಲಿಂಗ್ ಕೃಷ್ಣ ಮತ್ತು ಮಿಲನಾ ನಾಗರಾಜ್ ಮಾತನಾಡುತ್ತಿರುವ ದೃಶ್ಯ ಇದಾಗಿದೆ. ಸಿನಿಮಾ ಬಿಡುಗಡೆಯ ದಿನಾಂಕವನ್ನು ಶನಿವಾರ ಅನೌನ್ಸ್ ಮಾಡಲಾಗುವುದು ಎಂದು ತಿಳಿಸುವುದಕ್ಕೆ ಈ ವಿಡಿಯೋ ಮಾಡಲಾಗಿದೆ. ಸದ್ಯ ಟ್ರೆಂಡಿಂಗ್ ಆಗಿದೆ.
ವಿಡಿಯೋದಲ್ಲೇನಿದೆ?:ಡಾರ್ಲಿಂಗ್ ಕೃಷ್ಣ ಮತ್ತು ಮಿಲನಾ ನಾಗರಾಜ್ ಟೆನ್ನಿಸ್ ಆಡ್ತಾ ಇರ್ತಾರೆ. ಈ ವೇಳೆ ಅಲ್ಲಿಗೆ ನಿರ್ದೇಶಕ ಶಶಾಂಕ್ ಎಂಟ್ರಿ ಕೊಡ್ತಾರೆ. ಒಂದು ಗುಡ್ ನ್ಯೂಸ್ ಇದೆ ಅಂತಾರೆ. 'ಏನ್ ಸರ್, ಇನ್ನೊಂದು ಮದುವೆ ಆಗ್ತಿದ್ದೀರಾ?' ಅಂತ ಕೃಷ್ಣ ತಮಾಷೆಯಾಗಿ ಪ್ರಶ್ನೆ ಮಾಡ್ತಾರೆ. 'ಆ ಯೋಗ ನಮಿಗೆಲ್ಲಿದೆಯಪ್ಪಾ' ಅಂತ ಡೈರೆಕ್ಟರ್ ನಗ್ತಾ ಹೇಳ್ತಾರೆ. ಅಷ್ಟರಲ್ಲಿ ಕೃಷ್ಣ, 'ಮತ್ತೇನು, ರಿಲೀಸ್ ಡೇಟಾ? ಯಾವಾಗ' ಅಂತಾ ಪ್ರಶ್ನಿಸ್ತಾರೆ. ಕೃಷ್ಣನ ಕಿವಿಯಲ್ಲಿ ರಿಲೀಸ್ ಡೇಟ್ ಅನ್ನು ಗುಟ್ಟಾಗಿ ಹೇಳ್ತಾರೆ. 'ಏನ್ ಸರ್, ಕರ್ನಾಟಕದ ಜನತೆಗೂ ಹಿಂಗೆ ಕಿವಿಯಲ್ಲಿ ಹೇಳ್ತಿರಾ?' ಅಂತ ಕೃಷ್ಣ ಪ್ರಶ್ನಿಸ್ತಾರೆ.
'ಇಲ್ಲಪ್ಪಾ, ನಾಳೆ ಅನೌನ್ಸ್ಮೆಂಟ್ಗೆ ಒಂದೊಳ್ಳೆ ಮೋಷನ್ ಪೋಸ್ಟರ್ ಮಾಡ್ಸಿದ್ದೀನಿ' ಅಂತ ಶಶಾಂಕ್ ಹೇಳ್ತಾರೆ. ಅಷ್ಟರಲ್ಲಿ ಮಿಲನಾ ಎಂಟ್ರಿ ಕೊಟ್ಟು, 'ಏನ್ ಸರ್, ರಿಲೀಸ್ ಡೇಟ್ ಇಷ್ಟು ಸಿಂಪಲ್ಲಾಗಿ ಅನೌನ್ಸ್ ಮಾಡ್ತಿದ್ದೀರಾ? ಹೈಪು, ಬಿಲ್ಡಪ್ಪು ಏನೂ ಬೇಡ್ವಾ ಸಿನಿಮಾಗೆ' ಅಂತ ಕೇಳ್ತಾರೆ. 'ಮಿಲನಾ, ಸರಳತೆ ಮತ್ತು ಪ್ರಾಮಾಣಿಕತೆ ಯಾವತ್ತಿಗೂ ಕೆಲಸ ಮಾಡುತ್ತೆ. ಈ ಬಿಲ್ಡಪ್ಪು, ಹೈಪು ಎಲ್ಲನೂ ಸಿನಿಮಾದ ಒಳಗಡೆ ಇರ್ಬೇಕಮ್ಮ' ಅಂತಾರೆ.
'ಸರ್, ಇದೆಲ್ಲಾ ಅಣ್ಣೋರ ಕಾಲದಲ್ಲಿ ಆಯ್ತು. ಇವತ್ತೇನಿದ್ರೂ, ನಮ್ಮ ಪೀಪಿ ನಾವೇ ಊದ್ಬೇಕು. ನಮ್ ಹಾರ ನಾವೇ ಹಾಕೋಬೇಕು. ನಮ್ ಕೇಕ್ ನಾವೇ ಕಟ್ ಮಾಡ್ಬೇಕು' ಅಂತ ಕೃಷ್ಣ ಹೇಳ್ತಾರೆ. ಅಷ್ಟರಲ್ಲಿ ಶಶಾಂಕ್, 'ಲವ್ ಮಾಕ್ಟೇಲ್ 2ಗೆ ಯಾವ ಪೀಪಿ ಊದಿದೆ, ಯಾವ ಕೇಕ್ ಕಟ್ ಮಾಡ್ದೇಪ್ಪ? ಕಂಟೆಂಟ್ ಚೆನ್ನಾಗಿದೆ ಅಂತಾನೇ ಜನ ಬಂದು ನೋಡಿ ಬ್ಲಾಕ್ ಬಸ್ಟರ್ ಮಾಡಿಲ್ವ' ಅಂತ ತಿರುಗೇಟು ನೀಡ್ತಾರೆ. ಅದಕ್ಕೆ ಕೃಷ್ಣ 'ಎಲ್ಲಾ ಹಂಗೇ ವರ್ಕ್ ಆಗಲ್ಲ ಸರ್' ಅಂತಾರೆ. ಅದೇ ಮೂಮೆಂಟ್ಗೆ ಮಿಲನಾ ಹೇಳೋ ಮಾತು ಸಖತ್ ಕಾಮಿಡಿಯಾಗಿದೆ.
'ಕೃಷ್ಣ, ನಿನ್ ತಲೇಲಿ ಉದುರಿರೋದು ಎರಡೇ ಕೂದಲು. ಅವರ ತಲೇಲಿ ನೋಡಿ, ಅರ್ಧ ಕೂದಲೇ ಇಲ್ಲ. ಸುಮ್ನೆ ಅವರು ಹೇಳಿದಂಗೆ ಕೇಳೋದು ಒಳ್ಳೇದು' ಅಂತಾರೆ. ಆಗ ಕೃಷ್ಣ ಅವ್ರು ಶಶಾಂಕ್ಗೆ, 'ಸರಿ ಸರ್, ನಾಳೆ ರಿಲೀಸ್ ಡೇಟ್ ಅನೌನ್ಸ್ ಮಾಡ್ಕೊಳ್ಳಿ. ಸಿನಿಮಾ ಕಂಟೆಂಟ್ ತುಂಬಾ ಚೆನ್ನಾಗಿದೆಯಲ್ವಾ. ಹಾಗಿದ್ರೆ ಪ್ರೊಮೋಷನ್ ಬೇಕು ಅಂತೇನಿಲ್ಲ. ಹಂಗೇ ರಿಲೀಸ್ ಮಾಡ್ಬಿಡಿ. ನಾನು ಆಟ ಆಡ್ತಾ ಇರ್ತೀನಿ' ಅಂತಾರೆ. ಅಷ್ಟರಲ್ಲಿ ಶಶಾಂಕ್ಗೆ ಪ್ಯಾಥೋ ಮ್ಯೂಸಿಕ್ ಪ್ಲೇ ಆಗುತ್ತೆ. ಅಲ್ಲಿಗೆ ನಾಳೆ ರಿಲೀಸ್ ಡೇಟ್ ಅನೌನ್ಸ್ ಮಾಡ್ತೀವಿ ಎಂದ ಬರಹದ ಮೂಲಕ ವಿಡಿಯೋ ಕೊನೆಗೊಳ್ಳುತ್ತದೆ. ಸದ್ಯ ಈ ಸಂಭಾಷಣೆ ಸಖತ್ ವೈರಲ್ ಆಗುತ್ತಿದೆ.
ಇದನ್ನೂ ಓದಿ:'ಕೌಸಲ್ಯಾ ಸುಪ್ರಜಾ ರಾಮ'ನಾದ ಡಾರ್ಲಿಂಗ್ ಕೃಷ್ಣ.. ಮೊಗ್ಗಿನ ಮೊನಸು ಖ್ಯಾತಿಯ ಶಶಾಂಕ್ ನಿರ್ದೇಶನ
