ಸಲ್ಮಾನ್ ಖಾನ್ ಹಾಗೂ ಕತ್ರಿನಾ ಕೈಫ್ ನಟನೆಯ ಮುಂಬರುವ ಬಹುನಿರೀಕ್ಷಿತ ಚಿತ್ರ ಟೈಗರ್ 3. ಈ ಸಿನಿಮಾ ಬಿಡುಗಡೆಗೆ ಇನ್ನೆರಡು ದಿನ ಬಾಕಿ ಇದೆ. ನವೆಂಬರ್ 12 ರಂದು ಸಿನಿಪ್ರಿಯರಿಗೆ ದೀಪಾವಳಿ ಉಡುಗೊರೆಯಾಗಿ ಟೈಗರ್ 3 ತೆರೆಗಪ್ಪಳಿಸಲಿದ್ದು, ಆಭಿಮಾನಿಗಳು ಸಾಕಷ್ಟು ಕುತೂಹಲದಿಂದ ಕಾಯುತ್ತಿದ್ದಾರೆ.
ಬಿಗ್ ಬಾಸ್ 17ರಲ್ಲಿ ಕತ್ರಿನಾ ಕೈಫ್ ಭಾಗಿ:ಸಲ್ಲು ಆ್ಯಂಡ್ ಕ್ಯಾಟ್ ಅಭಿಮಾನಿಗಳಿಗಾಗಿ ದೀಪಾವಳಿಗೆ ಸಿನಿಮಾದ ಜೊತೆಗೆ ಹೆಚ್ಚಿನ ಮನರಂಜನೆ ನೀಡಲು ಮನಸ್ಸು ಮಾಡಿದ್ದಾರೆ. ಟೈಗರ್ 3 ಪ್ರಮೋಶನ್ ಭಾಗವಾಗಿ ಬಹುಬೇಡಿಕೆ ನಟಿ ಕತ್ರಿನಾ ಕೈಫ್ ಅವರು ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ನಡೆಸಿಕೊಡುವ ಜನಪ್ರಿಯ ರಿಯಾಲಿಟಿ ಶೋ ಬಿಗ್ ಬಾಸ್ 17ರಲ್ಲಿ ಭಾಗಿಯಾಗಲಿದ್ದಾರೆ. ಒಂದೇ ವೇದಿಕೆಯಲ್ಲಿ ತಮ್ಮ ಮುಂದಿನ ಬಹುನಿರೀಕ್ಷಿತ ಚಿತ್ರ ಟೈಗರ್ 3ರ ಪ್ರಚಾರ ಮಾಡಲಿದ್ದಾರೆ.
ಹಿಂದಿ ಬಿಗ್ ಬಾಸ್ ಪ್ರೋಮೋ: ಕಲರ್ಸ್ ಟಿವಿ ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ಗಳಲ್ಲಿ ಬಿಗ್ ಬಾಸ್ 17ರ ಪ್ರೋಮೋ ಹಂಚಿಕೊಂಡಿದೆ. ದಿವಾಲಿ ಥೀಮ್ನಲ್ಲಿ ಈ ವಾರದ ವೀಕೆಂಡ್ ಎಪಿಸೋಡ್ಗಳು ಪ್ರಸಾರವಾಗಲಿವೆ. ಪ್ರೋಮೋ ಹಂಚಿಕೊಂಡಿರುವ ಚಾನಲ್, ''ತಾರೆಯರಿಂದ ಜಗಮಗಿಸಲಿರುವ ಬಿಗ್ ಬಾಸ್ ದಿವಾಲಿ ಪಾರ್ಟಿಗೆ ಸಿದ್ಧರಾಗಿ'' ಎಂದು ಬರೆದುಕೊಂಡಿದೆ. ಪ್ರೋಮೋ ಪ್ರಕಾರ ನಟಿ ಕತ್ರಿನಾ ಕೈಫ್ ಅವರು, ಖ್ಯಾತ ನಿರೂಪಕಿ ಭಾರತಿ ಸಿಂಗ್ ಮತ್ತು ಅವರ ಪತಿ ಹರ್ಷ್ ಲಿಂಬಾಚಿಯಾ ಜೊತೆ ಕಾಣಿಸಿಕೊಳ್ಳಲಿದ್ದು, ಬಿಗ್ ಬಾಸ್ನಲ್ಲಿ ನಡೆಯಲಿರುವ ದಿವಾಲಿ ಪಾರ್ಟಿಯ ಮೆರುಗು ಹೆಚ್ಚಿಸಲಿದ್ದಾರೆ. ಪ್ರೋಮೋದಲ್ಲಿ ಬಿಗ್ ಬಾಸ್, "ದಿವಾಲಿ ಸಂಜೆಯನ್ನು ಬೆಳಗಿಸಲು ಕತ್ರಿನಾ ಕೈಫ್ ಬರಲಿದ್ದಾರೆ" ಎಂದು ಉಲ್ಲೇಖಿಸಿದ್ದಾರೆ.