ಫೋಟೋಗ್ರಾಫರ್‌ಗೆ ಗುದ್ದಿದ ಕರೀನಾ ಕಾರು: ತಾಳ್ಮೆ ಕಳೆದುಕೊಂಡು ಕೂಗಿದ ನಟಿ

ಬಾಲಿವುಡ್​ ನಟಿ ಮಲೈಕಾ ಅರೋರಾ ಆರೋಗ್ಯ ವಿಚಾರಿಸಲು ಬಂದಿದ್ದ ವೇಳೆ ಕರೀನಾ ಕಪೂರ್ ಖಾನ್ ಕಾರು ಪಾಪರಾಜಿಗಳಿಗೆ ಗುದ್ದಿದ್ದು, ಈ ವೇಳೆ ಕರೀನಾ ತಾಳ್ಮೆ ಕಳೆದುಕೊಂಡು "ಹಿಂದೆ ಸರಿಯಿರಿ" ಎಂದು ಜೋರಾಗಿ ಕೂಗಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಮುಂಬೈ: ರಸ್ತೆ ಅಪಘಾತದಲ್ಲಿ ಗಾಯಗೊಂಡಿರುವ ಮಲೈಕಾ ಅರೋರಾ ಆರೋಗ್ಯ ವಿಚಾರಿಸಲು ನಟಿ ಕರೀನಾ ಕಪೂರ್ ಖಾನ್ ಅವರ ಮನೆಗೆ ಬಂದಿದ್ದರು. ಈ ವೇಳೆ ಅಲ್ಲಿದ್ದ ಪಾಪರಾಜಿಗಳು ಕರೀನಾ ಫೋಟೋ ತೆಗೆಯಲು ಮುಗಿಬಿದ್ದಿದ್ದರು. ಈ ವೇಳೆ ಮತ್ತೊಂದು ಅವಘಡ ನಡೆದಿದೆ. ಫೋಟೋಗ್ರಾಫರ್‌ ಕಾಲಿಗೆ ಕಾರು ಡಿಕ್ಕಿ ಹೊಡೆದ ಪರಿಣಾಮ ಆತನಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.

ಮಹಾರಾಷ್ಟ್ರ ನವ ನಿರ್ಮಾಣ ಸೇನೆಯ ಪರವಾಗಿ ಪ್ರಚಾರಕ್ಕೆ ತೆರಳುತ್ತಿದ್ದಾಗ ಬಾಲಿವುಡ್​ ನಟಿ ಮಲೈಕಾ ಅರೋರಾ ಅವರ ಕಾರು ಅಪಘಾತಕ್ಕೀಡಾಗಿ ನಟಿ ತೀವ್ರ ಗಾಯಗೊಂಡಿದ್ದರು. ಬಳಿಕ ಮುಂಬೈ ಆಸ್ಪತ್ರೆಯೊಂದರಲ್ಲಿ ದಾಖಲಿಸಿ ಚಿಕಿತ್ಸೆ ನೀಡಲಾಗಿದ್ದು, ಭಾನುವಾರ ಅವರನ್ನು ಡಿಸ್ಚಾರ್ಜ್ ಮಾಡಲಾಗಿದೆ. ಸ್ನೇಹಿತೆಯ ಆರೋಗ್ಯ ವಿಚಾರಿಸಿ, ಮಲೈಕಾ ಮನೆಯಿಂದ ಕರೀನಾ ಕಪೂರ್ ಹೊರಡುತ್ತಿದ್ದಂತೆ ಫೋಟೋಗ್ರಾಫರ್‌ಗಳು ಅವರ ಸುತ್ತ ಮುಗಿಬಿದ್ದರು.

ಈ ಸಂದರ್ಭದಲ್ಲಿ ನಟಿ ಕರೀನಾ ಕಪೂರ್​ ಅವರ ಕಾರು ಕೂಡ ಅವರ ಹತ್ತಿರ ಬರುತ್ತಿತ್ತು. ಆಗ ಗುದ್ದಿದ ಪರಿಣಾಮ ಫೋಟೋಗ್ರಾಫರ್‌ಗೆ ಸಣ್ಣ ಗಾಯಗಳಾಗಿವೆ. ಇದನ್ನು ನೋಡಿದ ಕರೀನಾ "ಹಿಂದೆ ಸರಿಯಿರಿ" ಎಂದು ಜೋರಾಗಿ ಕೂಗಿದ್ದಾರೆ. ನಟಿಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ಕರೀನಾ ಕಾಳಜಿಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಇದನ್ನೂ ಓದಿ:ಕಾರು ಅಪಘಾತ: ಬಾಲಿವುಡ್​ ನಟಿ ಮಲೈಕಾ ಅರೋರಾ ತಲೆಗೆ ಗಾಯ