'ಕಾಂತಾರ' ಕನ್ನಡ ಚಿತ್ರರಂಗದ ಹಿರಿಮೆಯನ್ನು ಉತ್ತುಂಗಕ್ಕೆ ಕೊಂಡೊಯ್ದ ಚಿತ್ರ. ದೇಶ ವಿದೇಶಗಳಲ್ಲಿ ಸದ್ದು ಮಾಡಿದ ಕನ್ನಡ ಸಿನಿಮಾ. ಪ್ರೇಕ್ಷಕರ ಬಹು ಬೇಡಿಕೆ ಮೇರೆಗೆ ತೆಲುಗು, ತಮಿಳು, ಹಿಂದಿ, ಮಲಯಾಳಂ ಭಾಷೆಗೆ ಡಬ್ ಆಗಿ ಎಲ್ಲೆಡೆ ಅಬ್ಬರಿಸಿದ ಈ ಚಿತ್ರದ ಮತ್ತೊಂದು ಭಾಗ ಸಿದ್ಧ ಆಗ್ತಿದೆ.
ನೀವು ನೋಡಿದ್ದು ಕಾಂತಾರ 2, ಇನ್ನು ಬರುವುದು ಕಾಂತಾರ ಪ್ರೀಕ್ವೆಲ್ ಎಂದ ರಿಷಬ್ ಶೆಟ್ಟಿ ಅವರೀಗ ಕಥೆ ಹೆಣೆಯೋದ್ರಲ್ಲಿ ಬ್ಯುಸಿ ಆಗಿದ್ದಾರೆ. ಪ್ರೀಕ್ವೆಲ್ ಕಥೆ ಹೆಣೆಯೋ ಸಲುವಾಗಿ ಮಾರ್ಚ್ನಿಂದ ಫೋನ್ ಆಫ್ ಮಾಡುತ್ತೇನೆ ಎಂದು ತಿಳಿಸಿದ್ದರು. ಅದರಂತೆ ಶೆಟ್ರು ತಮ್ಮ ತಂಡದ ಜೊತೆ ಬರವಣಿಗೆ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ. ಅಲ್ಲದೇ ಪ್ರೀಕ್ವೆಲ್ ಕಥೆಗಾಗಿ ಹೊಸಬರನ್ನು ತಂಡಕ್ಕೆ ಸ್ವಾಗತಿಸಿದ್ದಾರೆ ಎನ್ನುವ ಮಾಹಿತಿಯೂ ಇದೆ.
ಕೆಜಿಎಫ್ 2 ಭಾರತೀಯ ಚಿತ್ರರಂಗವೇ ಕನ್ನಡ ಚಿತ್ರರಂಗದತ್ತ ತಿರುಗಿ ನೋಡುವಂತೆ ಮಾಡಿತ್ತು. ಕೆಜಿಎಫ್ ನಂತರ ಬಂದ ಹಲವು ಚಿತ್ರಗಳು ಯಶಸ್ವಿ ಆದವು. ಸ್ಯಾಂಡಲ್ವುಡ್ನ ರಿಷಬ್ ಶೆಟ್ಟಿ ನಟಿಸಿ, ನಿರ್ದೇಶನ ಮಾಡಿರುವ ಕಾಂತಾರ ಚಿತ್ರ ಮಾತ್ರ ಕನ್ನಡ ಸಿನಿಮಾಗಳನ್ನು ಕಡೆಗಣಿಸುವ ಮಂದಿಯ ಹುಬ್ಬೇರುವಂತೆ ಮಾಡಿತು. ಇಂದಿಗೂ ಕಾಂತಾರ ಕುರಿತ ಚರ್ಚೆ ಕಡಿಮೆ ಆಗಿಲ್ಲ ಅನ್ನೋದು ಈ ಚಿತ್ರದ ವಿಶೇಷತೆ.
ಕಾಂತಾರ ಗೆಲುವಿನ ಬೆನ್ನಲ್ಲೇ ರಿಷಬ್ ಶೆಟ್ಟಿ ಜೊತೆ ಕಾಂತಾರ ಪ್ರೀಕ್ವೆಲ್ ಮಾಡಲು ಪ್ಲಾನ್ ಮಾಡಿರುವ ಹೊಂಬಾಳೆ ಫಿಲ್ಮ್ ತಂಡ ರಿಷಬ್ ಬಳಗಕ್ಕೆ ಬೇಕಾದ ಎಲ್ಲಾ ಸಿದ್ಧತೆ ಮಾಡಿಕೊಟ್ಟಿದೆ. ವಿಶೇಷ ಅಂದ್ರೆ ಕಳೆದ ಎರಡು ತಿಂಗಳಿನಿಂದಲೇ ರಿಷಬ್ ತಂಡ ಕಥೆಯಲ್ಲಿ ನಿರತವಾಗಿದೆ. ಅದ್ರೆ ಆ ಕಥೆ ಫೈನಲ್ ಆಗಿಲ್ಲ. ಸ್ಟೋರಿಯನ್ನು ಫೈನಲ್ ಮಾಡಿಕೊಂಡು ಆದಷ್ಟು ಬೇಗ ಶೂಟಿಂಗ್ ಶುರು ಮಾಡುವ ಸಲುವಾಗಿ ತಮ್ಮ ತಂಡದ ಜೊತೆ ಸೇರಿದ್ದಾರೆ ರಿಷಬ್ ಶೆಟ್ರು.